ޓޫރިޒަމް މިނިސްޓަރު އިބްރާހިމް ފައިސަލް އާއި އެމްއެމްޕީއާރުސީގެ ބޮޑު ޚިޔާނާތުގެ މުގުލުގައި ހުރި ކުރީގެ ނައިބު ރައީސް އަހުމަދު އަދީބު ބޭރު ގައުމެއްގައި ބައްދަލުކުރައްވައިފި އެވެ.

ފައިސަލް އާއި އަދީބު ބޭއްވި ބައްދަލުވުމުގެ ފޮޓޯއެއް ވަނީ ސޯޝަލް މީޑިއާގައި އާއްމުވެފަ އެވެ.

އެމްއެމްޕީއާރުސީގެ ހިޔާނާތާ ގުޅިގެން އަދީބުގެ މައްޗަށް ގިނަ ދައުވާތަކެއް ސާބިތުވެފައިވެ އެވެ. އޭނާ މިނިވަންވީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހު ދުވަސްވަރު އެވެ. އެއަށްފަހު ބޭސްފަރުވާއަށް ކަމަށް ބުނެ ބޭރު ގައުމަކަށް ފުރައިގެން ދިއުމަށްފަހު އެނބުރި ރާއްޖެ އައިސްފައި ނުވެ އެވެ.

ރައީސް މުހައްމަދު މުއިއްޒު ވެސް އަދީބު އާއި ބައްދަލުކުރެއްވިކަމަށް މީގެ ކުރިން އަޑުފެތުރިފައިވެ އެވެ. ނަމަވެސް ރައީސް ވަނީ އެކަން ދޮގު ކުރައްވާފަ އެވެ. ނަމަވެސް އަދީބު އާއި މި ސަރުކާރާ ގުޅުން ބަދަހިކަމަށް ފެނެ އެވެ. އެގޮތުން އަދީބު ގެންދަވަނީ ރައީސް މުއިއްޒު އާއި ސަރުކާރުގެ ދިފާއުގައި ވާހަކަދައްކަވަމުންނެވެ.

ފައިސަލްގެ ބައްޕާފުޅު، މަޖިލިސް ރައީސް އަބްދުއްރަހީމް އަބްދުﷲ ކުރީގެ ރައީސް މުހައްމަދު ނަޝީދުއާއި ބައްދަލުކުރެއްވި ކަމަށް ވެސް މިއަދު ބައެއް މީޑިއާތަކުން ރިޕޯޓުކުރި އެވެ. ނަމަވެސް މަޖިލިސް އިދާރާއިން ވަނީ އެކަން ދޮގުކޮށް މިއަދު ބަޔާނެއް ނެރެފަ އެވެ.