ރައީސް މުހައްމަދު މުއިއްޒު ޕްރޮމޯޓްކުރުމަށް ރައީސް އޮފީހުގެ މިނިސްޓަރު އިބްރާހިމް ހަލީލް އިސްވެ ހުންނަވައި، ރޭ ލޯންޗްކުރި "އެމްއެމް ޓީވީ" ޗެނަލް ހިންގާ އިމާރާތުގެ ކުލި އެންސްޕާ މެދުވެރިކޮށް ހަމަޖައްސާކަން ފަޅާއަރައިފި އެވެ.

ސޯޝަލް މީޑިއާގައި ދައުރުވަމުން އަންނަ ލިޔެކިޔުތަކުން އެނގޭ ގޮތުގައި އެންސްޕާ އާއި އެމްއެމް ޓީވީ ހިންގާ ކުންފުނި މޯލްޑިވްސް މީޑިއާ ހައުސްއާ ދެމެދު 34.8 މިލިއަން ރުފިޔާގެ އެއްބަސްވުމެއް ހަދާފައިވެ އެވެ. އެއީ އެންސްޕާ ހިންގުމަށް ފަސް އަހަރު ދުވަހު މއ. ސީރާޒީގެ ދެ ފަންގިފިލާ ކުއްޔަށް ހިފުމާ ގުޅޭ އެއްބަސްވުމެކެވެ.

މި އެއްބަސް ވުމުގެ ދަށުން އެ ގެއިން ހަތަރު ފަންގިފިލާ ހިފާފައިވަނީ މަހަކު 580،000ރ އަށެވެ.

މިނިސްޓްރީ އޮފް ފިނޭންސްއިން ހިންގާ ޓެންޑާ ބޯޑް މެދުވެރިކޮށް ހަދާފައިވާ މި އެއްބަސްވުމުގެ ދަށުން، މީޑިއާ ހައުސްއިން ހަމަ އެ އިމާރާތުން 4 ފަންގިފިލާ ކުއްޔަށް ހިފާފައިވެ އެވެ.

ޓެންޑާ ބޯޑުން މޯލްޑިވްސް މީޑިއާ ހައުސްއަށް ބިޑް އެވޯޑްކުރި ލިޔުން

އޭގެ ތެރެއިން 2 ފަންގިފިލާ އެންސްޕާ އަށް ދޫކޮށްފައިވާއިރު، އަނެއް 2 ފަންގިފިލާ ބޭނުންކުރަނީ ރައީސް މުއިއްޒުގެ ޓީވީ ސްޓޭޝަންގެ މަސައްކަތްތަކަށެވެ.

އެނގިފައިވާ ގޮތުގައި އެ ހަތަރު ފިލާއަށް ޖުމްލަ ދައްކަން ޖެހެނީ 580،000ރ އެވެ. އެހެންކަމުން އެންސްޕާ މެދުވެރިކޮށް އެމްއެމް ޓީވީ ހިންގާ ދެ ފަންގިފިލާގެ ކުލި ވެސް ހަމަޖައްސާފައިވެ އެވެ.

އެންސްޕާއަށް އަމިއްލަ ފަރުދުންގެ އިމާރާތަކުން އޮފީސް ހިންގާނެ ތަން ކުއްޔަން ނެގެން އޮންނައިރު، ބޮޑު އަގުގައި ރައީސް މުއިއްޒުގެ ޓީވީ ހިންގާ ކުންފުންޏަށް މަންފާވާ ގޮތަށް ވަނީ ރައްޔިތުންގެ އާސަންދަ ފައިސާ އިސްރާފުކޮށް ހިޔާނާތުގެ ވަރުގަދަ ޑީލެއް ހަދާފަ އެވެ.

ރައީސް އޮފީހުގެ މިނިސްޓަރު އިބްރާހީމް ހަލީލް.

މީގެ އިތުރުން އެންސްޕާއަށް ގިނަ އަދަދެއްގެ މުވައްޒަފުން ހޯދުމަށް ވެސް އިއުލާންކޮށްފައިވެ އެވެ. ބައެއް ފަރާތްތަކުން ތުހުމަތު ކުރާގޮތުގައި އެންސްޕާގެ މުދަލާއި ފައިސާ އަދި މުވައްޒަފުން ބޭނުންކޮށްގެ އެތަނުގެ ސީއީއޯ ހީނާ ވަލީދު އިސްކޮށް ހުންނަވާ ގެންދަވަނީ އެމްއެމް ޓީވީ ހިންގަން އެހީތެރިވަމުންނެވެ.

"ހުރިހާ" އިން މިކަމާ ގުޅިގެން ހީނާއާ ސުވާލުކުރުމުން އެއްވެސް ޖަވާބެއް ދެއްވާފައެއް ނުވެ އެވެ.

މި ޓީވީ ޗެނަލް ހެދުމަށް ބޭނުންވާ ސާމާނު ހޯދައިދިނީ އެސްޓީއޯއިން ކަމަށް ނަން ހާމަނުކުރަން އެދި އެސްޓީއޯގެ އިސް އޮފިޝަލަކު ވިދާޅުވި އެވެ. އެ ތަކެތި ދުބާއީން ގަތުމަށް ގާތްގަނޑަކަށް 21 މިލިއަން ރުފިޔާ އެސްޓީއޯ އިން ހަރަދުކުރި ކަމަށް އޭނާ ވިދާޅުވި އެވެ.

"މިތަކެތި ގަތީ ޕީއެސްއެމްއަށް ގެންނަ ތަކެތީގެ ގޮތުގައި. އެކަމަކު ގެނައި ތަކެތީގެ ދެބައިކުޅަ އެއްބައި ގެންދިޔައީ އެމްއެމް ޓީވީއަށް،" އެ އޮފިޝަލް ވިދާޅުވި އެވެ.

ރައީސް މުއިއްޒު ޕްރޮމޯޓްކުރުމަށް ސަރުކާރުގެ ބައެއް އިސްވެރިން ގެންދަވަނީ ދައުލަތުގެ އިދާރާތަކުގެ މުދަލާއި ފައިސާ ނަހަމަ ގޮތުގައި ބޭނުންކުރައްވަމުންނެވެ. އެގޮތުން މިހާރު މީޑިއާ ހައުސްގެ ނަމުގައި ކުންފުންޏެއް އުފައްދަވާ ރައީސްގެ އަމިއްލަ ގެކޮޅުގެ ކަންކަން ބަލަހައްޓަވަން އުޅޭ މީހެއްގެ ނަމުގައި ރަޖިސްޓްރީކޮށް ހިންގަން މިވަނީ ފައްޓަވާފަ އެވެ.

މީގެ އިތުރުންވެސް ސަރުކާރުގެ އިސްވެރިން އެކި ނަންނަމުގައި އޮންލައިން މީޑިއާތަކާއި ޓީވީ ސްޓޭޝަންތައް ހިންގަމުން ގެންދާއިރު، ސަރުކާރު ހިއްސާވާ ކުންފުނިތަކުގެ ބަޖެޓުން ބޮޑު އެއްޗެއް މި މީޑިއާތަކަށް ހަރަދުކުރަމުންދާކަން ފާހަގަކޮށްލެވެ އެވެ.

ސަރުކާރުގެ އިސްވެރިންތަކެެއް ހިޔާނާތުގެ ބޮޑެތި އަމަލުތަކެއް ހިންގާއިރު، ކޮރަޕްޝަން ހުއްޓުވުމަށް އުފައްދާފައިވާ އިދާރާ، އޭސީސީގެ ރައީސް އާއި ނައިބު ރައީސް އައްޔަންކުރަން ރައީސް އޮފީހުން ވަނީ އިއުލާންކޮށްފަ އެވެ.