އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަން އަދި ކުރީގެ އިކޮނޮމިކް މިނިސްޓަ ފައްޔާޒު އިސްމާއިލް ޓެރަރިޒަމަށް ހިތްވަރުދީ، ގޮވާލެއްވީ ލޭއޮހޮރުވަން ކަމަށާއި މިހާރުން މިހާރަށް ފައްޔާޒު ހައްޔަރުކޮށް އެ މައްސަލަ ބެލުމަށް މި ސަރުކާރުގެ ސުޕަ މެޖޯރިތީ އޮންނަ ޕީއެންސީ މަޖިލިސް މެމްބަރުން ގޮވާލައްވައިފި އެވެ.

މައްސަލަ ބެލުމަކީ ލާޒިމު ކަމެއް ކަމަށާއި އެ މައްސަލަ ލަސްނުކޮށް ބަލަން ޖެހޭކަން އެ މެމްބަރުން ފާހަގަކުރެއްވި އެވެ.

އެމްޑީޕީން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ފައްޔާޒް ވަނީ އަދުގެ ރައީސް މުހައްމަދު މުއިއްޒު ރައްޔިތުންނަށް ދެރަދޭ އުސޫލުން ކަންކުރާނަމަ، ކުރީގެ ރައީސް މުހައްމަދު އަމީން އަށް ހެދިގޮތް ހަދަންޖެހޭ ކަމަށް ވިދާޅުވެފަ އެވެ.

ފައްޔާޒުގެ މި ވާހަކައާ ގުޅިގެން ސަރުކާރަށް ނިސްބަތްވެވަޑައިގަންނަވާ މަޖިލީހުގެ ގިނަ މެމްބަރުން ވިދާޅުވީ ކުރީގެ އިކޮނޮމިކް މިނިސްޓަރު ފައްޔާޒު ޓެރަރިޒަމަށް ހިތްވަރުދީ، ލޭއޮހޮރުވަން ގޮވާލުމުގެ ފިނޑި އަމަލު މިފަހަރު ހިންގެވީ އެމްޑީޕީގެ ޗެއާޕާސަން ކަމަށާއި އޭނާ މިހާރުން މިހާރަށް ހައްޔަރުކުރަން ޖެހޭ ކަމަށެވެ.

މީގެ ތެރެއިން ސަރުކާރުގެ ކޯލިޝަންގެ ތެރޭގައި ހިމެނޭ އެމްޑީއޭއަށް ނިސްބަތްވެވަޑައިގަންނަވާ ވެލިދޫ ދާއިރާގެ މަޖިލިސް މެމްބަރު މުހައްމަދު އައްބާސް ވިދާޅުވީ ފައްޔާޒު އެ ދެއްކެވީ ވަރަށް ހުތުކަން ބޮޑު ފިނޑި ވާހަކަތަކެއް ކަމަށާއި ފައްޔާޒު އެ ދެއްކެވީ ޓެރަރިޒަމަށް ހިތްވަރު ލިބޭފަދަ ވާހަކަތަކެއް ކަމަށެވެ. އެހެން ކަމުން މިރޭގެ އެމްޑީޕީން ބާއްވަން އެ އުޅޭ ޖަލްސާއަކީ ފަހަރުގައި ފައްޔާޒު އެ ފާހަގަކުރެއްވި ފަދަ އަމަލެއް ހިންގުމުގެ ބޭނުމުގައި ބާއްވާ ޖަލްސާއަކަށް ވެދާނެ ކަމުގެ ބިރުވެސް އެބައޮތް ކަމަށް އައްބާސް ވިދާޅުވި އެވެ. އެހެން ކަމުން މިހާރުން މިހާރަށް ފައްޔާޒު ހައްޔަރުކޮށް، މައްސަލަ ބެލުމަށް އައްބާސް ވަނީ ސަރުކާރަށް ގޮވާލައްވާފަ އެވެ.

"ފައްޔާޒު އެ ދެއްކެވީ ވަރަށް ހުތުކަން ބޮޑު ފިނޑި ވާހަކަތަކެއް. އެއީ ޓެރަރިޒަމަށް ހިތްވަރު ލިބޭފަދަ ވާހަކަތަކެއް. ފައްޔާޒު މިހާރުން މިހާރަށް ހައްރުކޮށް މައްސަލަ ބެލުމަށް ސަރުކާރަށް ގޮވާލަން،" މެބްބަރު އައްބާސް ވިދާޅުވި އެވެ.

މީގެ އިތުރުން ވެސް ސަރުކާރު ހިންގާ މައި ޕާޓީ ޕިއެންސީއަށް ނިސްބަތް ގިނަ މެބަރުން ވަނީ ފައްޔާޒުގެ އެ ވާހަކަތައް ކުށްވެރިކޮށް އެ މައްސަލަ ބަލައިދިނުމަށް ގޮވާލާ ވާހަކަ ދައްކަވާފަ އެވެ.

މީގެ އިތުރުން މިލަންދޫ ދާއިރާގެ މެންބަރު ހަސަން މުފީދު ވިދާޅުވީ ޓެރަރިޒަމް މަނާކުރުމުގެ ގާނޫނުގައި ސީދާ ގޮތުން އަދި ނުސީދާ ގޮތުން ވިޔަސް ޓެރަރިޒަމްގެ އަމަލެއް ކުރުމަށް ހިތްވަރު ދިނުމަކީ ކުށެއް ކަމަށާއި އެމްޑީޕީން ޕޯޑިއަމްތަކުގައި ދައްކާފައިވާ ވާހަކަތަަކަކީ ވަކި ސިޔާސީ ފިކުރެއް ކުރިއެރުވުމަށާއި އާންމުންގެ މެދުގައި ބިރުވެރިކަން އުފެއްދުމާއި އެެހެން މީހެއްގެ ފުރާނައަށް ނުރައްކަލެއް ކުރިމަތިކުރުވުމުގެ މަގުސަދުގައި ޓެރަރިޒަމްގެ އަމަލެއް ކުރުމަށް ހިތްވަރު ދިނުމަށް ދައްކާފައިވާ ވާހަކަތަކެއް ކަމަށެވެ.

"ޓެރަރިޒަމް މަނާކުރުމުގެ ގާނޫނުގައި ސީދާ ގޮތުން އަދި ނުސީދާ ގޮތުން ވިޔަސް ޓެރަރިޒަމްގެ އަމަލެއް ކުރުމަށް ހިތްވަރު ދިނުމަކީ ކުށެއް. އެމްޑީޕީން ޕޯޑިއަމްތަކުގަ ދައްކާފައިވާ ވާހަކަތަަކަކީ އާންމުންގެ މެދުގައި ބިރުވެރިކަން އުފެއްދުމުގެ މަގުސަދުގަ ދެއްކެވި ވާހަތަކެއް،" މެމްބަރު މުފީދު ވިދާޅުވި އެވެ.

ކުރީގެ ރައީސް އަމީން އާ ގުޅޭގޮތުން ފައްޔާޒު މިއަދު ދެއްކެވި ވާހަކަތަކާ ގުޅޭގޮތުން އާއްމުންގެ އިތުރުން ސިޔާސީ ބައެއް ފަރާތްތަކުން ވެސް ދަނީ ކަންބޮޑުވުން ފާޅުކުރަމުންނެވެ. މިގޮތުން ކުރީގެ ރައީސް އަމީން ދީދީގެ އާއިލާއިން ވެސް ވަނީ ފައްޔާޒުގެ ވާހަކަތަކަށް ރައްދުދީފަ އެވެ.