ސަރުކާރުގެ ގެރެންޓީއާ އެކު އެސްޓީއޯއިން ރާއްޖެއަށް ކާޑާއި ބޭސް އެތެރެކުރުމުގެ ނަމުގައި 50 މިލިއަން ޑޮލަރުގެ ލޯނެއް ނަގައިފި އެވެ.

އެސްޓިއޯއިން މި ލޯނު ނަގައިފައިވާކަން ފިނޭންސް މިނިސްޓްރީން ވަނީ ރައްޔިތުން މަޖިލީހުގެ މާލިއްޔަތު ކޮމެޓީއަށް ސިޓީ އަކުން އަންގާފަ އެވެ.

ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމުގެ ރިޔާސަތުގައި އިންނެވި ނައިބު މުގައްރިރު އަދި، މަޖިލީހުގެ އޭދަފުށީ ދާއިރާގެ މެންބަރު އަހުމަދު ސަލީމް (ރެޑްވޭވް ސަލީމް) ވަނީ އެސްޓީއޯއިން ނަގާފައިވާ ލޯނެއްގެ މައުލޫމާތު ހިއްސާކުރުމުގެގޮތުން ފިނޭންސް މިނިސްޓްރީން ފޮނުވި ސިޓީއެއް މެންބަރުންނަށް އިއްވާފަ އެވެ.

އެ ސިޓީއާ ހަވަލާދެއްވައި ސަލީމް ވިދާޅުވީ، އެސްޓީއޯއިން ލޯނު ނަގާފައި ވަނީ ކާޑާއި ބޭހުގެ އިތުރުން ޒަރޫރީ ތަކެތި އެތެރެކުރުމަށް ކަމަށެވެ.

އެސްޓީއޯއިން މި ލޯން ނަގާފައިވަނީ އެމެރިކާގެ ޕްރައިވެޓް ކްރެޑިޓަރެއް ކަމަށްވާ ކާގިލް ފައިނޭންޝަލް ސާވިސަސް އިންޓަނޭޝަނަލް (ސީއެފްއެސްއައިޓީ އިންކް) އިންނެވެ.

ނަމަވެސް މި ލޯނާ ގުޅިގެން އެސްޓީއޯގެ އޮފިޝަލަކު ވިދާޅުވި ގޮތުގައި މިއީ ސަރުކާރު ޒިންމާވާ ގޮތަށް، ސަރުކާރުން ބޭނުންވެގެން، ދައުލަތަށް ނަގައިދިން ލޯނެއް ކަމަށެވެ.

ސަރުކާރު ކުންފުންޏެއްގެ ހައިސިއްޔަތުން މި ގޮތަށް ބައެއް ހާލަތްތަކުގައި އެސްޓީއޯއިން ކަން ކުރާ ކަމަށް ވެސް އޭނާ ވިދާޅުވި އެވެ.

ސަރުކާރުން ގެރެންޓީ ދީފައިވާ މި ލޯން ނަގަން އެސްޓީއޯއިން ސޮއިކުރީ މިދިޔަ މަހުގެ އަށް ވަނަދުވަހެވެ. ސަރުކާރުން ލޯނަށް ގެރެންޓީ ދިނީ ނޮވެމްބަރު މަހުގެ 20 ވަނދުވަހު އެވެ.

މި ލޯން ނަގާފައިވަނީ ތިން އަހަރު ދުވަހުގެ ތެރޭގައި އަނބުރާ ދައްކާ ނިންމާ ގޮތަށެވެ. އަދި ލޯންގެ އިންޓަރެސްޓް ރޭޓަކީ 13.13 ޕަސެންޓެވެ.