ރައީސް މުހައްމަދު މުއިއްޒު ރިޔާސީ އިންތިހާބުގައި ވައުދުވެ ވަޑައިގެންނެވި ގޮތަށް ފްލެޓުތައް ހަވާލު ނުކުރައްވާނެކަމަށް ވައިކަރަދޫ ދާއިރާގެ މަޖިލިސް މެންބަރު ހުސެން ޒިޔާދު ވިދާޅުވެއްޖެ އެވެ.

ރޭ އިދިކޮޅު އެމްޑީޕީން ބޭއްވި ހަރުގެ ޖަލްސާގައި ވާހަކަ ދައްކަވަމުން ޒިޔާދު ވިދާޅުވީ ރައީސް މުއިއްޒު ވައުދުވެ ވަޑައިގެންނެވީ ދިން އެއްޗެއް ދިންގޮތަށް ދެއްވާނެކަމަށް ކަމަށާއި ނަމަވެސް މިއަދު ރައީސް ދައްކަވަނީ އެހެން ވާހަކައެއް ކަމަށެވެ.

ރައީސް މުއިއްޒު އިއްޔެ ހުވަދޫގެ ބައެއް ރަށްތަކަށް ކުރެއްވި ދަތުރުފުޅުގައި ފުލެޓު ތަކާއި ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ވިދާޅުވީ އެމަނިކުފާނު ވައުދުވެ ވަޑައިގެންނެވިގޮތަށް ފްލެޓުތައް ހަވާލުކުރައްވާނެކަމަށެވެ. އެގޮތުން އަންނަ ރޯދައިގެ ކުރިން ފްލެޓު ލިސްޓް އާންމުކުރެއްވޭނެކަމަށް ގަބޫލުކުރެއްވޭ ކަމަށް ރައީސް ވިދާޅުވި އެވެ.

ނަމަވެސް ރައީސް ވިދާޅުވީ އޮޅުވާލައިގެން ދޮގު ހަދައިގެން ނުވަތަ އެހެނިހެން ގޮތްގޮތުން ފުލެޓް ދީފައި ހުރި ނަމަ އެފަދަ ފަރާތްތަކަށް ފުލެޓު ނުދެއްވޭނެ ކަމަށެވެ.

"އަޅުގަނޑުމެނަށް އެނގޭ ހައުސިން މިނިސްޓްރީވެސް އަނދައިފިކަން، ޖެހިގެންހުރި ހުރިހާ މިނިސްޓްރީއެއް އަނދައިފި. ކުލައުޑުގައި ހުރި އެއްޗެއް ވެއްޖެއްޔާ އަނދައިގެން ހިނގައްޖެ. ނަމަވެސް އެ ވައުދު އަނދައިގެން ނުދޭ." ޒިޔާދު ވިދާޅުވި އެވެ.

ޒިޔާދު ވިދާޅުވީ ރައީސް މިހާރު އެ ހައްދަވަނީ ބުހުތާނު ދޮގުކަން ސާބިތުކަމާއެކު ދަންނަވަން އެނގިވަޑައިގަންނަވާ ކަމަށެވެ.

ރައީސް މުއިއްޒު ތަކުރާރުކޮށް އެއް ވައުދުތަކެއް ވެވަޑައިގެންނެވިނަމަވެސް އެއްވެސް ވައުދެއް ނުފުއްދެވޭކަމަށް ޒިޔާދު ވިދާޅުވި އެވެ.

ކުރީގެ ސަރުކާރުން ހިންގި "ގެދޮރުވެރިޔާ" ސްކީމްގެ ދަށުން ދޫކުރަން ނިންމައި ލިސްޓު އާންމުކުރި 4000 ފުލެޓް މި ސަރުކާރުން ދޫކުރުން ހުއްޓުވައި ލިސްޓުތައް އިވަލުއޭޓު ކުރުމުގެ ނަމުގައި އެތައް ދުވަހެއް ވަންދެން ރައްޔިތުންގެ ބޯހިޔާވަހިކަމަށް ހުރަސްއަޅަމުންދާ ކަމަށް ބުނެ ގިނަ ބައެއްގެ ފާޑުކިޔުން ރައީސް މުއިއްޒަށާއި ސަރުކާރަށް ދަނީ އަމާޒުވަމުންނެވެ.