އިނގިރޭސި މަޝްހޫރު ރޮކް ބޭންޑް "ކޯލްޑް ޕްލޭ"ގެ ކޮންސެޓުތަކެއް އަަވަށްޓެރި އިންޑިއާގައި ބާއްވަން އެ ބޭންޑުން ތައްޔާރު ވެއްޖެ އެވެ.

މިރޭ ފަށަން ހަމަޖެހިފައިވާ އެ ކޮންސެޓުތައް ކުރިއަށް އޮތް ތިން ދުވަހު މުމްބާއީގެ އިތުރުން އަހުމަދު އާބާދުގައި ވެސް އޮންނާނެ ކަމަށް ހަބަރުތައް ބުނެ އެވެ.

މި ކޮންސެޓުތަކުގެ ޓިކެޓުތައް މިހާތަނަށް އެއްކޮށް ވިކި ހުސްވެފައިވާއިރު އެ ހުރިހާ ޝޯތަކަށް ވެސް ގިނަ އަދަދަކަށް މީހުން ވަންނާނެ ކަމަށް ބެލެވެ އެވެ.

މި ކޮންސެެޓުގައި ބައިވެރި ވުމަށް އެ ބޭންޑުގެ ލަވަކިޔުންތެރިޔާ ކްރިސް މާޓިން ވަނީ އިއްޔެ މުމްބާއީއަށް ގޮސްފަ އެވެ. އޭނާއާއެކު އެކްޓްރެސް ޑަކޯޓާ ޖޯންސަން ވެސް އައިސްފައިވެ އެވެ.

މީގެ ކުރިން 2016 ވަނަ އަހަރު ވެސް "ކޯލްޑް ޕްލޭ"އިން ވަނީ އިންޑިއާގައި ހުށައެޅުންތަކެއް ހުށައަޅާފަ އެވެ. އެ ފަހަރު ވެސް އެ ޝޯތަކަށް ބޮޑު ތަރުހީބެއް ލިބިފައިވެ އެވެ.

ކޯލްޑް ޕްލޭގެ ކޮންސެޓުތައް ފަށަން ތައްޔާރުވެފައިވާއިރު އެ ބޭންޑުގެ ޝޯތަކުގައި މިއުޒިކްގެ އަޑު ވަކި މިންވަރެއްގައި ބަހައްޓަން ކޯޓު އަމުރެއް ވެސް ވަނީ ނެރެފަ އެވެ.