ޓޫރިޒަމް މިނިސްޓަރު އިބްރާހީމް ފައިސަލް ރާއްޖެއިން ބޭރަށް ކުރާ ރަސްމީ ހުރިހާ ދަތުރުތައް ހުއްޓާލުމަށް ރައީސް އޮފީހުން އަންގައިފި އެވެ.

ރައީސް އޮފީހުން މިފަދައިން އަންގާފައި ވަނީ ރައީސް ޑރ. މުހައްމަދު މުއިއްޒާއި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ގުޅުން ހީނަރުވެފައިވާ ދަނޑިވަޅެއްގަ އެވެ.

ސަރުކާރުގެ އޮފިޝަލަކު ވިދާޅުވީ ރާއްޖެއިން ބޭރަށް ދަތުރުތަކެއް ކުރުމަށް ފައިސަލް ރާވާފައި ވަނިކޮށް އެ ދަތުރުތައް ނުކުރަން ރައީސް އޮފީހުން މިދިޔަ ހަފްތާގައި އޭނާއަށް އަންގާފައިވާ ކަމަށެވެ.

މިފަދައިން އެންގީ ރައީސް މުއިއްޒުގެ އެދިވަޑައިގަތުމަށް ކަމަށް ވެސް އޮފިޝަލް ވިދާޅުވި އެވެ.

ސަރުކާރު ހިންގާ ޕީއެންސީ ތެރޭގައި ވަނީ ދެ ފެކްޝަނެއް އުފެދިފަ އެވެ. އެއީ އަބްދުއްރަހީމްގެ ފެކްޝަނަކާއި މަޖިލީހުގެ ނައިބު ރައީސް އަހްމަދު ނާޒިމްގެ ފެކްޝަނެވެ. ނާޒިމަކީ ރައީސް މުއިއްޒުގެ ދެބެންގެދަރި ބޭފުޅެކެވެ.

ދިވެހިރާއްޖޭގެ އަޑަށް ދާދި ފަހުން ދެއްވި އިންޓަވިއުއެއްގައި އަބްދުއްރަހީމް ވިދާޅުވީ ރައީސް މުއިއްޒާއި އެމަނިކުފާނާ ދެމެދު އޮތް ގުޅުން ހީނަރުކުރުމަށް ބައެއް ފަރާތްތަކުން މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށެވެ. އަދި އެމަނިކުފާނަށް ފުރިހަމަ އިތުބާރު އެބައޮތް ކަމަށް ވެސް އޭނާ ވިދާޅުވި އެވެ.

ނަމަވެސް މިހާރު ފެންނަ ބައެއް މަންޒަރުތަކުން އަބްދުއްރަހީމާއި ރައީސް މުއިއްޒާ ދެމެދު މާބޮޑު ގުޅުމެއް އޮތް ކަމަކަށް ނުބެލެވެ އެވެ.

ރައީސް މައުމޫން އަބްދުލްގައްޔޫމަށާއި ރައީސް އަބްދުﷲ ޔާމީނަށް ދޯކާދީފައިވާ އަބްދުއްރަހީމް މި ސަރުކާރުގެ ތެރެއިން ސިޔާސީ ގޮތުން ބާކީ ކުރުމުގެ އަޑީގައި ހުރީ މަޖްލީހުގެ ނައިބު ރައީސް ނާޒިމް ކަމަށް އެތެރޭގެ ކޯޅުތަކުގެ މައުލޫމާތު އެނގޭ ބޭފުޅަކު ވިދާޅުވި އެވެ.

"ނާޒިމް ބޭނުން ވަނީ އަބްދުއްރަހީމް މަޖިލީހުގެ ރައީސްކަމުގެ ގޮނޑިން ބޭރުކުރުމަށްފަހު އެ ގޮނޑިއަށް އަރަން. އެކަމަށް ރައީސް މުއިއްޒު މިހާރު އާނ ބަސް ދެއްވާފައި. ރައީސް މުއިއްޒު ވިދާޅުވި ކަމަށް ވަނީ ހައެއްކަ މަސް ދެއްވުމަށް އެކަންކަން ހަމަޖައްސަން،" އޭނާ ވިދާޅުވި އެވެ.

އެ ބޭފުޅާ ވިދާޅުވީ އަބްދުއްރަހީމް ސިޔާސީ ގޮތުން "ހަތްޕުނޑަށް" ހަދާނެ ތަން މާގިނަ ދުވަހެއް ނުވެ ފެންނާނެ ކަމަށެވެ.

"ކުރިން މުރައިދޫގެއަށް ކޮންމެ ދުވަހަކު ހަވީރު ސައި ބޯން ދިޔަ އެއްވެސް މަޖްލިސް މެމްބަރަކު މިހާރަކު ނުފެނޭ. އަބްދުއްރަހީމް ގާތްގަނޑަކަށް މިހާރު އެކަނިވެ ނިމިއްޖެ. އެހެންވެ ކުރިން ދުވަހު އެއާޕޯޓުގައި އޮތް ރަސްމިއްޔާތަށް ދިޔައިރު އޭނާގެ އަންހެނުން ގެންދިޔައީ. އެތަނުގައި ބާކީ ނުވާންވެގެން،" ޕީއެންސީގެ އިސް އޮފިޝަލަކު ވިދާޅުވި އެވެ.