އުމުރުން 60 އަހަރު ވާން ގާތްވެފައި ވީނަމަވެސް ބޮލީވުޑްގެ ތަރި ޝާހްރުކް ޚާންއަށް އަދިވެސް ހީވަނީ އޭނާއަކީ 30 އަހަރުގެ މީހެއް ހެން ކަމަށް ބުނެފި އެވެ.

ޝާހްރުކް މި ބީދައިން ވާހަކަ ދައްކާފައިވަނީ ދުބާއީގެ ގްލޯބަލް ވިލެޖްގައި އޮތް އިވެންޓެއްގެ ތެރެއިން އެތަނަށް އެއްވެ ތިބި މީހުންނާ މުހާތަބުކޮށް ވާހަކަ ދައްކަމުންނެވެ.

"އަހަންނަށް މިއަހަރު 60 އަހަރު ފުރޭނެ. އެކަމަކު އަދިވެސް ހީވަނީ 30 އަހަރު ހެން. ތަފާތަކީ ބައެއް ފަހަރު ކަންކަން ހަނދާން ނެތޭކަން" ޝާހްރުކް ޚާން ބުންޏެވެ.

އެ ބައްދަލުވުމުގައި ޝާހްރުކް ޚާން ވަނީ އެއްވެ ތިބި މީހުންގެ އެދުމުގެ މަތިން އޭނާގެ މަޝްހޫރު ބައެއް ފިލްމުތަކުގެ ޑައިލޮގްތައް ވެސް ކިޔައިދީފަ އެވެ.

އޭނާގެ ކުރިއަށް އޮތް ފިލްމު "ކިންގް"އާ ބެހޭގޮތުން ޝާހްރުކް ޚާން ބުނީ އެ ފިލްމުގެ މަސައްކަތް މިހާރުވެސް ކުރިއަށްދާ ކަމަށެވެ. އެ ފިލްމުގައި ޝާހުރުކްއާއެކު އޭނާގެ ދަރިފުޅު ސުހާނާ ޚާން ވެސް ފެނިގެންދާނެ އެވެ.

1965 ވަނަ އަހަރުގެ ނޮވެމްބަރު މަހުގެ ދެވަނަ ދުވަހު އުފަންވި ޝާހްރުކް ޚާންއަށް މިއަހަރު ފަހުކޮޅު 60 އަހަރު ފުރޭނެ އެވެ. އެހެން ނަމަވެސް މިއަދުވެސް އޭނާއަކީ ބޮލީވުޑްގެ އެންމެ ކުރީގައި ނަންކިޔާ ފަންނާނެކެވެ.