ދިރާސީ އާ އަހަރުގެ ކިޔެވުން ފެށުމަށްޓަކައި ސަރުކާރުން ފުރިހަމަކުރަންޖެހޭ ހުރިހާ ކަމެއް ފުރިހަމަކުރެވިފައިވާ ކަމަށް އެޑިއުކޭޝަން މިނިސްޓްރީން ބުނެފި އެވެ.

އެ މިނިސްޓްރީގެ އޮފިޝަލަކު ވިދާޅުވީ ރާއްޖޭގެ ހުރިހާ ސްކޫލްތަކަށް ޓެކްސް ފޮތްތައް ފޮނުވައިިނިމިފައިވާ ކަމަށެވެ. އެކަމަކު ފޮތްތައް ފޮނުވައިނިމޭފަހުން ބައެއް ދަރިވަރުންގެ ކިޔެވުން މާލެ ބަދަލުކޮށްފައިވާތީ، އަނބުރާ އެ ފޮތްތައް މާލެ ގެނައުމުގައި ކުޑަ ލަސްކަމެއް ދިމާވެދާނެ ކަމަށް މިނިސްޓްރީން ބުންޏެވެ.

"ޖުމްލަކޮށް ހުރިހާ ކަމެއް ވެސް ވަރަށް ރަނގަޅަށް ހަމަޖެއްސިފައި ވަނީ." އޮފިޝަލް ވިދާޅުވި އެވެ.

މިނިސްޓްރީން ބުނީ ޓީޗަރުންގެ ދަތިކަން ބައެއް ސްކޫލްތަކަށް އެބަހުރި ކަމަށެވެ. ހާއްސަކޮށް ކުރިން ހަމަޖެހިފައިވާ ބިދޭސީ ޓީޗަރުން ފަހުވަގުތު ނާދެވޭނެކަން އެނގުމުން ބަދަލުގައި ޓީޗަރުން ހޯދަން ޖެހިފައިވާކަން އޮފިޝަލް ފާހަގަކުރެއްވި އެވެ.

މާދަމާ ދިރާސީ އާ އަހަރު ފަށާއިރު، ސަރުކާރުގެ 219 ސްކޫލެއްގައި 80،715 ދަރިވަރުން ތައުލީމު އުނގެނޭނެ އެވެ. ޓީޗަރުންގެ ގޮތުގައި ޖުމްލަ 9،952 ޓީޗަރުން ހަރަކާތްތެރިވާނެ އެވެ.

ސަރުކާރު ސްކޫލްތަކުގެ ގްރޭޑު އެކެއްގައި ކިޔެވުމަށް 4،790 ދަރިވަރުން އެދިފައިވެ އެވެ. އޭގެތެރޭގައި ހިމެނެނީ އަތޮޅުތަކުގެ ރަށްތަކުގެ 3،042 ދަރިވަރުންނާއި މާލެ ސަރަހައްދުގެ ސްކޫލްތަކުގައި ގްރޭޑު އެކަކުން އަލަށް ޖާގަދޭ 1،748 ދަރިވަރުންނެވެ.

އަތޮޅުތަކުން މާލެ އަށް 1،530 ދަރިވަރުން މި އަހަރު ވަނީ ބަދަލުވެފަ އެވެ. އަދި މާލެ އިން ހުޅުމާލޭގެ ސްކޫލްތަކަށް ބަދަލުވުމަށް 836 ދަރިވަރުން އެދިފައިވެ އެވެ.