ހުޅުމާލެ ދެވަނަ ފިޔަވަހީގައި މިއަދު ހުޅުވި ޝަހީދު އަލީ ސްކޫލަކީ ރާއްޖޭގެ ހުރިހާ ރަށެއް ޝާމިލްވާ ސްކޫލެއް ކަމަށް އެޑިޔުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެ އެވެ.

ޝަހީދު އަލީ ސްކޫލް ހުޅުވަން މިއަދު ބޭއްވި ރަސްމިއްޔާތުގައި މިނިސްޓަރު ވިދާޅުވީ އިއްޔެއާ ހަމައަށް އެ ސްކޫލަށް 1،950 ދަރިވަރުން ވެއްދިފައިވާ ކަމަށެވެ. ނަމަވެސް މިއަދު އެ ސްކޫލްގެ ދަރިވަރުންގެ އަދަދު 2،100އާ ގާތްކުރާ ކަމަށް މިނިސްޓަރު ވިދާޅުވި އެވެ.

އެ ސްކޫލްގައި އަތޮޅުތެރޭގެ ރަށްތަކުން މާލެ ބަދަލުވި ދަރިވަރުން ވެސް އެބަތިބި ކަމަށް މިނިސްޓަރު ވިދާޅުވި އެވެ.

"ހެންވީމާ އަޅުގަނޑު ދަންނަވާލަން ބޭނުންވަނީ މާލޭގައި މި ސްކޫލު ގާއިމްވެފައި ހުއްޓަސް. ހުޅުމާލޭގެ ދެވަނަ ފިޔަވަހީގެ މި ތަނުގައި މި ސްކޫލު ހުރިކަމުގައި ވިޔަސްމެ މި ސްކޫލަކީ މުޅި ދިވެހިރާއްޖޭގެ ހުރިހާ ރަށްތަށް ޝާމިލްކުރާ ސްކޫލެއްގެ ގޮތުގައޭ އޮންނާނީ،" އޭނާ ވިދާޅުވި އެވެ.

މިނިސްޓަރު ވިދާޅުވީ އެ ސްކޫލަށް ޝަހީދު އަލީގެ ނަން ދެއްވީ ރައީސް މުހައްމަދު މުއިއްޒު ކަމަށެވެ. އޭގެ ބޭނުމަކީ ބަތަލުންގެ ހިތްވަރާއި އަޚްލާގުން ނަމޫނާ ލިބިގަންނަ ޖީލެއް ބިނާކުރުން ކަމަށް ވިދާޅުވި އެވެ.

އެ ސްކޫލް އިމާރާތްކުރަން އާރްސީސީއާ ހަވާލުކުރީ މިދިޔަ ސަރުކާރުންނެވެ. ނަމަވެސް އަމަލީ މަސައްކަތް ފެށީ މި ސަރުކާރު އައިފަހުންނެވެ.

މި އަހަރު ތެރޭގައި ހުޅުމާލޭ ދެވަނަ ފިޔަވަހީގައި އިތުރު ސްކޫލެއް އިމާރާތްކުރުމުގެ އަމަލީ މަސައްކަތް ފެށުމަށް ތައްޔާރުވަމުން އަންނަ ކަމަށް ވެސް މިނިސްޓަރު ވިދާޅުވި އެވެ.