ކުރިއަށް އޮތް ލޯކަލް ކައުންސިލް އިންތިހާބަށް ކުރިމަތިލާން އިތުރު 10 ދުވަސް ދިނުމަށް އިދިކޮޅު އެމްޑީޕީން އިލެކްޝަންސް ކޮމިޝަނަށް ގޮވާލައިފި އެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ކައުންސިލް އިންތިހާބަށް އެމްޑީޕީން ކަނޑައަޅާފައިވާ ތަރުޖަމާނު އަދި ދިއްދޫ ދާއިރާގެ ކުރީގެ މަޖިލިސް މެންބަރު އަބްދުﷲ ވަހީދު ވިދާޅުވީ ކުށުގެ ރެކޯޑު ސާފުކުރުން ލަސްވުމުގެ ސަބަބުން އިންތިހާބަށް ކުރިމަތިލާން ދަތިތަކަކާ ކުރިމަތިވާ ކަމަށެވެ.

ކުށުގެ ރެކޯޑު ސާފުކޮށްދިނުން ލަސްވުމަކީ އެތައް ބަޔަކަަށް އިންތިހާބުގައި ކުރިމަތިލުމުގެ ހައްގު ގެއްލިގެންދާނެ ކަމެއް ކަމަށްވާތީ، އިތުރު 10 ދުވަހަށް އިންތިހާބަށް ކުރިމަތިލުމުގެ މުއްދަތު އިތުރުކުރަން އޭނާ ގޮވާލެއްވި އެވެ.

"ގޮތްދޫނުކުރުމާއި އަޑު ނޭހުމާއި އެގޮތުގައި އިލެކްޝަންސް ކޮމިޝަން ނޯތުމަށް އަޅުގަނޑުމެން ގޮވާލަން،" ވަހީދު ވިދާޅުވިއެވެ.

އިންތިހާބަށް ކުރިމަތިލުމުގެ މުއްދަތު ހަމަވާނީ އަންނަ މަހުގެ އެއް ވަނަ ދުވަހުގެ މެންދުރުފަހު 3:00ގަ އެވެ.

ވަހީދު ވިދާޅުވީ ވެރިކަންކުރާ ޕީއެންސީއަށް ފަހިވާގޮތަށް އިލެކްޝަންސް ކޮމިޝަނުން ކަންކަން ކުރަމުންދާ ކަމުގެ ތުހުމަތު ކުރެވޭ ކަމަށެވެ. އަދި އިންތިހާބަށް ނުފޫޒުފޯރުވަން ސަރުކާރުގެ އިދާރާތަކުން ކުރަމުން އަންނަ މަސައްކަތްތައް ހުއްޓާލުމަށް އޭނާ ގޮވާލެއްވި އެވެ.