ޣައްޒާގައި ގިނަ އަދަދެއްގެ އާންމުން މަރުވެދާނެ ކަމުގެ ބިރު އޮތުމުން، މީގެ ދެ އަހަރު ކުރިން ބައިޑަން ސަރުކާރުން ހިފެހެއްޓި 2,000 ޕައުންޑުގެ ބާރުގަދަ ބޮންތައް އިޒްރޭލަށް ފޮނުވުމަށް ޓްރަމްޕް ސަރުކާރުން ދަނީ ތައްޔާރުވަމުންނެވެ.

މި މުއާމަލާތާ ގުޅޭ މައުލޫމާތު އެނގޭ ބައެއް ފަރާތްތަކާ ހަވާލާދީ ރިޕޯޓްކޮށްފައިވާ ގޮތުގައި، 2.8 ބިލިއަން ޑޮލަރުގެ މި އެހީގެ ދަށުން 40,000 ބޮން ފޯރުކޮށްދިނުމަށް ވަނީ ހަމަޖެހިފަ އެވެ. މީގެ ތެރޭގައި 20,000 އެމްކޭ 84 ބޮމާއި، 20,000 ބީއެލްޔޫ-117 ބޮން ހިމެނެ އެވެ.

މި އެއްބަސްވުމާ ބެހޭގޮތުން އެމެރިކާގެ ކޮންގްރެސްއަށް މިހާރު ވަނީ ނުރަސްމީކޮށް އަންގާފަ އެވެ. މި ހަތިޔާރުތަކަށް ފައިސާ ދެއްކުމަށް ހަމަޖެހިފައިވަނީ އެމެރިކާގެ ޓެކްސް ދައްކާ މީހުންގެ ފައިސާއިން އިޒްރޭލަށް ދޭ އަސްކަރީ އެހީގެ ތެރެއިންނެވެ. މިއީ އެމެރިކާއިން އިޒްރޭލަށް ދޭ ފައިސާ އަނބުރާ އެމެރިކާގެ ކުންފުނިތަކުން ހަތިޔާރު ގަތުމަށް ބޭނުންކުރާ ނިޒާމެކެވެ.

މިއީ އިޒްރޭލުގެ އަސްކަރީ ގާބިލުކަން އިތުރުކުރުމަށް ޓްރަމްޕް ސަރުކާރުން އަޅަމުންދާ ފިޔަވަޅުތަކުގެ ތެރެއިން އެންމެ ފަހުގެ ނިންމުމެވެ. ޣައްޒާގައި ހިނގަމުންދާ ހަމަނުޖެހުންތަކުގައި ފަލަސްތީނުގެ އެތައް ހާސް ބަޔަކު މަރުވެ، އެ ސަރަހައްދު ވަނީ ބިމާ ހަމަވެފަ އެވެ. އެމެރިކާ މެދުވެރިވެގެން ބަލިކަށި ހަނގުރާމާ ހުއްޓާލުމެއް ގާއިމުކުރި ނަމަވެސް، އަދިވެސް އަނިޔާވެރިކަން ދަނީ ކުރިއަށެވެ.

ހަމާސްއިން 2023 ވަނަ އަހަރުގެ އޮކްޓޫބަރު 7 ގައި ދިން ހަމަލާއަށް ރައްދުދިނުމުގެ ނަމުގައި އިޒްރޭލުން ޣައްޒާގައި ކުރިއަށްގެންދާ ހަނގުމާގެ ސަބަބުން ބައިނަލްއަގުވާމީ ދުނިޔޭގައި އިޒްރޭލު އެކަހެރިވަމުންދާ ދަނޑިވަޅެއްގައި، މި ހަތިޔާރުގެ އެހީ ދިނުމަކީ އެމެރިކާއާއި އިޒްރޭލުގެ ގުޅުން ބަދަހިކަން ދައްކުވައިދޭ ކަމެކެވެ. ރައީސް ޓްރަމްޕާއި ބެންޖަމިން ނަތަންޔާހޫއާ ދެމެދު އީރާނުގެ މައްސަލާގައި ބައެއް ހިޔާލުތަފާތުވުންތައް ހުރި ނަމަވެސް، އެކަމުގެ ސަބަބުން ދެ ގައުމުގެ އަސްކަރީ ގުޅުމަށް ބުރޫނާރާކަން މީގެން ސާފުވެ އެވެ.

2024 ވަނަ އަހަރު ބައިޑަން ސަރުކާރުން ހިފެހެއްޓި ބޮންތައް ފޮނުވުމުގެ ހުއްދަ، ޓްރަމްޕް ވެރިކަމާ ހަވާލުވެވަޑައިގަތުމަށްފަހު ވަނީ ދެއްވާފަ އެވެ. މީގެ އިތުރުން، މިދިޔަ އަހަރު ވެސް ކޮންގްރެސްގެ އާންމު މަރުހަލާތަކުން ބޭރުން 3 ބިލިއަން ޑޮލަރުގެ ހަތިޔާރު ވިއްކުމަށް ޓްރަމްޕް ސަރުކާރުން ވަނީ ހުއްދަ ދީފަ އެވެ.

މި ފޮނުވާ 2,000 ޕައުންޑުގެ ބޮންތަކުގެ ތެރޭގައި ބިމުގެ އަޑީގައި ހުންނަ އަމާޒުތަކަށް ހަމަލާދޭ ބޮންތަކާއި، ބިމުން މަތީގައި ގޮވައި ބޮޑެތި ގެއްލުންތައް ދޭ ބޮންތައް ހިމެނެ އެވެ. ތަޖުރިބާކާރުން ބުނާ ގޮތުގައި އިޒްރޭލުން ޣައްޒާގެ މީހުން ދިރިއުޅޭ ސަރަހައްދުތަކަށް ދޭ ހަމަލާތަކުގައި މި ބާވަތުގެ އެމެރިކާގެ ބޮންތައް ދަނީ ބޭނުންކުރަމުންނެވެ.

އޮކްޓޫބަރު މަހުން ފެށިގެން ހަނގުރާމަ ކުޑަކޮށް މަޑުޖެހިފައި އޮތް ނަމަވެސް، އިޒްރޭލުން ދަނީ މެދުކެނޑުމެއްނެތި ޣައްޒާއަށް ހަމަލާދެމުންނެވެ. މިއީ ޓްރަމްޕްގެ ދަނބިދަރިފުޅު ޖެރެޑް ކުޝްނާ، ހަމަލާ ބަދަލުކުރުން ހުއްޓާލުމަށް ބާރުއެޅުމުގެ ގޮތުން ނަތަންޔާހޫއާ ބައްދަލުކޮށްފައި ވަނިކޮށް ހިނގަމުންދާ ކަންކަމެވެ.

ޣައްޒާގެ ސިއްހީ ވުޒާރާއިން ހާމަކޮށްފައިވާ ގޮތުގައި، 2023 ވަނަ އަހަރުން ފެށިގެން އިޒްރޭލުން ދެމުންދާ ހަމަލާތަކުގައި މިހާތަނަށް 73,264 އަށްވުރެ ގިނަ ފަލަސްތީނު ރައްޔިތުން ވަނީ މަރުވެފަ އެވެ.