ބައިނަލްއަގްވާމީ ގޮތުން ފާހަގަކުރާ ޓީޗަރުންގެ ދުވަސް ގައުމީ ފެންވަރުގައި ފާހަގަކުރުމަށް އެޑިއުކޭޝަން މިނިސްޓްރީން އެއްވެސް އިސްނެގުމެއް ނެތި، ހިމޭންކަން އިހްތިޔާރުކޮށްފައިވާ ކަމަށް ބުނެ ޓީޗާޒް އެސޯސިއޭޝަން އޮފް މޯލްޑިވްސް އިން ކަންބޮޑުވުން ފާޅުކޮށްފި އެވެ.

ޓީޗަރުންގެ ދުވަހާ ގުޅުވައިގެން ޓީޗާޒް އެސޯސިއޭޝަނުން ސޯޝަލްމީޑިއާގައި އާންމުކުރި ބަޔާނެއްގައި ބުނެފައިވަނީ، ވަކިވަކި ސްކޫލްތަކުގައި މުދައްރިސުންގެ އަގުވަޒަންކުރުމުގެ ހަރަކާތްތައް ކުލަގަދަކޮށް ކުރިއަށް ގެންދިޔަ ނަމަވެސް، ގައުމީ ފެންވަރުގައި މިނިސްޓްރީގެ ފަރާތުން މި ފަހުރުވެރި ދުވަސް ފާހަގަކުރުމަށް އެއްވެސް ހަރަކާތެއް ނުހިންގާ ހިމޭނުން އޮތުމަކީ ނުހަނު ހިތާމަހުރި ކަމެއް ކަމަށެވެ. އަދި ގައުމުގެ މުސްތަގުބަލު ބައްޓަންކުރުމުގައި ރެޔާއި ދުވާލު ބުރަ މަސައްކަތްތަކެއް ކުރައްވާ މުރާލި ޓީޗަރުންގެ އަގު، ގައުމީ ފެންވަރެއްގައި ވަޒަންކޮށްލުމަށް މިނިސްޓްރީން ފުރުސަތު ނުދިނުމަކީ ހިދުމަތްތެރި ޓީޗަރުންގެ ހިތްތަކަށް ލިބުނު ބޮޑު މާޔޫސްކަމެއްގެ ގޮތުގައި އެ ޖަމިއްޔާއިން ވަނީ ސިފަކޮށްފަ އެވެ.

މިކަމުގެ އިތުރުން، ސްކޫލް ފެންވަރުގައި މިފަދަ މުހިންމު ދުވަސްތައް ފާހަގަކުރުމުގައި ބޮޑެތި މާލީ ދަތިތަކާ ކުރިމަތިލާން ޖެހިފައިވާކަން ބައެއް ސްކޫލްތަކުގެ އިސްވެރިން ވަނީ ފާހަގަކުރައްވާފަ އެވެ. ސްކޫލްތަކުން މައުލޫމާތު ދޭ ގޮތުގައި، މީގެ ކުރިން މިފަދަ މުނާސަބަތުތައް ފާހަގަކުރަނީ ޕީޓީއޭ މެދުވެރިކޮށް ތަފާތު ފަންޑްރެއިޒިން ހަރަކާތްތައް ހިންގައިގެން އިތުރު ފައިސާ ހޯދައިގެންނެވެ. ނަމަވެސް، އެފަދަ ހަރަކާތްތައް ހިންގައިގެން އިތުރަށް ފައިސާ ނުހޯދުމަށް މިހާރު އެޑިއުކޭޝަން މިނިސްޓްރީން ވަނީ އަންގާފަ އެވެ.

މި އެންގުމާ ގުޅިގެން ސްކޫލްތަކަށް މަޖުބޫރުވެފައިވަނީ، މިނިސްޓްރީން އަހަރީ ގޮތުން ދޫކުރާ ކުޑަ ބަޖެޓުގެ ތެރެއިން މިފަދަ ހަރަކާތްތައް ހަމަޖައްސާށެވެ. ނަމަވެސް ސްކޫލްތަކުގެ ޒަރޫރީ ހަރަދުތައް ބެލެހެއްޓުމަށް ވެސް އެ ބަޖެޓު އެކަށީގެން ނުވާތީ، ޓީޗަރުންގެ ދުވަސް ފަދަ ހާއްސަ ދުވަސްތައް އެކަށޭނަ ގޮތެއްގައި ކުލަގަދަކޮށް ފާހަގަކުރުމަށް ސްކޫލްތަކަށް ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފަ އެވެ.