އީރާނުގެ ސަލާމަތާއި ރައްކާތެރިކަން ކަށަވަރު ނުކުރެވޭނަމަ، ސަރަހައްދީ އުމްރާނީ ވަސީލަތްތަކަށް ހަމަލާދޭނެކަމުގެ އިންޒާރު އީރާނުން ދީފި އެވެ.

އީރާނުގެ އިސް މަންދޫބު މުހައްމަދު ބާގިރު ޣާލިބާފް އަންގާރަ ދުވަހު ވިދާޅުވި ގޮތުގައި، އީރާނުގެ ސަލާމަތްތެރިކަން ކަށަވަރު ނުކުރެވޭ ނަމަ، އެ ސަރަހައްދުގެ އެއްވެސް އުމްރާނީ ވަސީލަތެއް ހަމަލާތަކުން ސަލާމަތެއް ނުވާނެ އެވެ.

ދައުލަތުގެ މީޑިއާއިން އާންމުކުރި ވީޑިއޯއެއްގައި، އީރާނުގެ މަޖިލީހުގެ ރައީސްކަންވެސް ކުރައްވާ ޣާލިބާފް ވިދާޅުވީ، އީރާނަށް ތެޔޮ ނުވިއްކޭ ސަރަހައްދެއްގައި އެހެން އެއްވެސް ބަޔަކަށްވެސް ތެޔޮ ނުވިއްކޭނެ ކަމަށެވެ. އަދި އީރާނުގެ ސަލާމަތީ ކަންކަން ކަށަވަރު ނުކުރެވޭނަމަ، އެއްވެސް އުމްރާނީ ވަސީލަތެއް ރައްކާތެރިކަންމަތީ ނޯންނާނެ ކަމަށް އޭނާ ވިދާޅުވި އެވެ.

މީގެ އިތުރުން، އީރާނުގެ ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ތަރުޖަމާނު ވަނީ ޑޮނަލްޑް ޓްރަމްޕަކީ "ބޮޑު ދޮގުވެރިއެއް" ކަމަށް ސިފަކުރައްވާފަ އެވެ. އޭނާ އެހެން ވިދާޅުވީ ނިއުކްލިއާ ހަތިޔާރާއި އެހެނިހެން މައްސަލަތަކާ ގުޅޭގޮތުން އެމެރިކާގެ ރައީސް ދައްކަވާފައިވާ ވާހަކަތަކަށް އިޝާރާތްކުރައްވަ އެވެ.

ހުސައިން މުހިއްބީ ވިދާޅުވީ، އެމެރިކާގެ ރައްޔިތުންނަށް ހަގީގަތް ހާމަކުރަންޖެހޭ ކަމަށާއި، އީރާނާ ދެކޮޅަށް އެމެރިކާއިން ކުރިއަށްގެންދިޔަ އަސްކަރީ ކެމްޕޭން ނާކާމިޔާބުވެފައިވާތީ، އެމެރިކާ އެ ސަރަހައްދުން ފޭބުމަށް އޭނާ ވަނީ ގޮވާލާފަ އެވެ.

މެދުއިރުމަތީގެ ހަނގުރާމަ ދިގުލައިގެން ގޮސްފައިވާ މި ދަނޑިވަޅުގައި، އީރާނަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިދީ، ހިފަހައްޓާފައިވާ ފައިސާތައް ދޫކޮށްލުމަށް ޓްރަމްޕް ހުށަހެޅުއްވި ކަމަށް އެކްސިއޯސް ނިއުސް އިން ރިޕޯޓްކޮށްފައިވާ ވާހަކަ ޓްރަމްޕް ވަނީ ދޮގުކުރައްވާފަ އެވެ. ޓްރަމްޕްގެ "ޓްރުތު ސޯޝަލް" ޕްލެޓްފޯމްގައި އޭނާ ވިދާޅުވީ އެއީ ދޮގެއް ކަމަށާއި، އީރާނަށް އެއްވެސް ކަމެއް ހުށަހަޅާފައި ނުވާނެ ކަމަށެވެ.

ބަހުގެ ހަމަލާތައް ވަރުގަދަވެފައި މިވަނީ، ހޮރްމޫޒް ކަނޑުއޮޅި ހުޅުވާލުމަށް އީރާނުން ހުށަހަޅާފައިވާ ހުށަހެޅުމަށް އެމެރިކާގެ ރަސްމީ ޖަވާބެއް އަންގާރަ ދުވަހު ލިބޭނެ ކަމަށް އުންމީދުކުރައްވާ ކަމަށް އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވެފައިވާ ދަނޑިވަޅެއްގަ އެވެ.

އަރާގްޗީ ވިދާޅުވީ، ގަތަރުގެ މެދުވެރިން ބައެއް ހިޔާލުތައް ހުށަހަޅާފައިވާ ކަމަށާއި، އެކަމާ ގުޅޭގޮތުން މަޝްވަރާކުރެވިފައިވާ ކަމަށެވެ. އަދި އެ މެދުވެރިން އަލުން އެމެރިކާއާ މަޝްވަރާކުރުމަށްފަހު، އެމެރިކާގެ އެންމެ ފަހުގެ ނިންމުން އީރާނަށް އަންގާނެ ކަމަށް އޭނާ ވިދާޅުވި އެވެ.