މަޝްހޫރު ވިޔަފާރިވެރިޔާ އަދި ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް މުހައްމަދަށް އެއް އަހަރު ތެރޭގައި އާމްދަނީއާއި ޑިވިޑެންޑްގެ ގޮތުގައި 6.6 މިލިއަން އެމެރިކާ ޑޮލަރާއި 5 މިލިއަން ދިވެހި ރުފިޔާ ލިބިވަޑައިގެންފައިވާކަން އޭނާގެ މާލީ ބަޔާނުން ހާމަވެއްޖެ އެވެ.

ވިހި ވަނަ މަޖިލީހުގެ މެންބަރުންގެ ދެވަނަ އަހަރުގެ މާލީ ބަޔާން (28 މޭ 2025 އިން 27 މޭ 2026 އަށް) މަޖިލީހުގެ ވެބްސައިޓުގައި ޝާއިއުކޮށްފައިވާއިރު، ސިޔާމްގެ މާލީ ބަޔާނުގައިވާ ގޮތުން ވޭތުވެދިޔަ އަހަރު މަޖިލީހުގެ މެންބަރެއްގެ ހައިސިއްޔަތުން އޭނާއަށް 604,567 ރުފިޔާގެ އާމްދަނީއެއް ވަނީ ލިބިވަޑައިގެންފަ އެވެ. އަދި ސަން ސިޔާމް ގްރޫޕް އޮފް ކޮމްޕެނީސްއިން އާމްދަނީގެ ގޮތުގައި 6.54 މިލިއަން ޑޮލަރު ލިބިވަޑައިގެންފައިވެ އެވެ.

މީގެ އިތުރުން ކުންފުންޏާއި ޕާޓްނާޝިޕް ހިއްސާގެ ފައިދާގެ ގޮތުގައި ބޭންކް އޮފް މޯލްޑިވްސް (ބީއެމްއެލް) އިން 1.3 މިލިއަން ރުފިޔާ އަދި ކުންފުނިތަކުގެ އާމްދަނީ ޑިވިޑެންޑްގެ ގޮތުގައި 54,000 ޑޮލަރު ސިޔާމަށް ލިބިވަޑައިގެންފައިވާ ކަމަށް ބަޔާނުގައިވެ އެވެ.

ސިޔާމްގެ މާލީ ބަޔާނުގައިވާ ގޮތުން، ރާއްޖޭގައި ހުޅުވާފައިވާ ހަތަރު އެކައުންޓެއްގެ އިތުރުން ސްރީ ލަންކާގައި ދެ އެކައުންޓް އަދި ޔޫއޭއީގައި ދެ އެކައުންޓް އޮވެ އެވެ. އެ އެކައުންޓުތަކުގައި ޖުމްލަ 33.6 މިލިއަން ރުފިޔާއާއި 1.9 މިލިއަން އެމެރިކާ ޑޮލަރު ހުރި ކަމަށް މާލީ ބަޔާނުގައި ފާހަގަކޮށްފައިވެ އެވެ.