މޯލްޑިވްސް ހައްޖު ކޯޕަރޭޝަނުން ހުޅުމާލޭގައި ތަރައްގީކުރަމުން އަންނަ ލަގްޒަރީ ހައުސިން މަޝްރޫއު "ނިއާމް ރެސިޑެންސް"ގެ އަގުބޮޑު ޕެންޓްހައުސްތައް އެ ކުންފުނީގެ ކުރީގެ އިސްވެރިންނަށް އަގުހެޔޮކޮށް ލިބޭ ގޮތަށް ހެދި މުއާމަލާތްތަކަށް އާއްމުން ފާޑުކިޔަން ފެށުމުން އެ ނިންމުންތައް އެންމެފަހުން ބާތިލްކުރަން ނިންމައިފި އެވެ.

މި މައްސަލަ ފެންމަތިވެފައިވަނީ، ހައްޖު ކޯޕަރޭޝަންގެ ވެރިންނަށް ނާޖާއިޒު ފައިދާ ލިބޭ ގޮތަށް މި މުއާމަލާތް ހިންގާފައިވާ ކަމަށް ބުނެ "ދައުރު" ނޫހުން އިއްޔެ ގެނެސްދިން ރިޕޯޓަކާ ގުޅިގެންނެވެ. އެއާއެކު އާންމުންގެ ބޮޑެތި ފާޑުކިޔުންތަކެއް ވަނީ އެ ކުންފުންޏަށް އަމާޒުވެފަ އެވެ.

ހައްޖު ކޯޕަރޭޝަނުން ރިއަލް އެސްޓޭޓް ވިޔަފާރީގެ ތެރެއަށް ވަނުމަށް ނިންމައި އެކަން އިއުލާންކުރީ 2024 ވަނަ އަހަރުގެ ކުރީކޮޅުގަ އެވެ. އަދި ހަމަ އެ އަހަރު ހުޅުމާލެ ދެވަނަ ފިޔަވަހީގެ ޕްލޮޓް ނަންބަރު 22313 އިން ވަނީ އެ މަޝްރޫއަށް ބިން ގަނެފަ އެވެ. ފަހި ދިރިއުޅުން ކޯޕަރޭޝަން (އެފްޑީސީ) އާ ޑިޒައިނިން ހަވާލުކޮށްގެން ކުރިއަށްގެންދާ 15 ފަންގިފިލާގެ މި އިމާރާތުގެ މަސައްކަތް ފެށުމުގެ ތެރޭގައި، މިއަހަރުގެ މެދުތެރޭގައި ކުންފުނީގެ އޭރުގެ މެނޭޖްމަންޓުން ވަނީ ހާއްސަ އުސޫލެއް އެކުލަވާލާފަ އެވެ.

މި އުސޫލުގެ ދަށުން ކުންފުނީގެ މަޝްރޫއުތަކުން މުވައްޒަފުންނަށް އިސްކަންދީ، އަގުހެޔޮކޮށް ޔުނިޓު ގަނެވޭނެ ގޮތް ހަމަޖެއްސި އެވެ. އެއާއެކު މި އިމާރާތުގެ އެންމެ އަގުބޮޑު ޔުނިޓުތައް ކަމަށްވާ ޕެންޓްހައުސްތައް ރިޒާވްކުރީ ކުންފުނީގެ އިސްވެރިންނެވެ.

އަގުހެޔޮކޮށް ޕެންޓްހައުސް ރިޒާވްކުރި ބޭފުޅުންގެ ތެރޭގައި ހައްޖު ކޯޕަރޭޝަންގެ ކުރީގެ މެނޭޖިން ޑިރެކްޓަރު އަދި މިހާރުގެ އިލެކްޝަންސް ކޮމިޝަންގެ ރައީސް މުހައްމަދު ޝަކީލް އާއި، ކުރީގެ ސީއޯއޯ ނަޖީލް އަހްމަދުގެ އިތުރުން މިހާރު ވެސް އެ ކުންފުނީގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި މުހައްމަދު ޝިހާބު ހިމެނިވަޑައިގަންނަވަ އެވެ. މީގެ ތެރެއިން ބައެއް ބޭފުޅުންނަކީ މި މުއާމަލާތަށް ފަހު ކުންފުނިން ވަކިވެފައިވާ ފަރާތްތަކެވެ.

މި މައްސަލައިގައި އާންމުންގެ ފާޑުކިޔުން އިންތިހާއަށް ބޮޑުވެފައިވަނިކޮށް، ހައްޖު ކޯޕަރޭޝަނުން ރޭ ނެރުނު ނޫސްބަޔާނެއްގައި ބުނީ ނިއާމް ރެސިޑެންސްގެ އެޕާޓްމަންޓުތައް މުވައްޒަފުންނަށް ވިއްކުމަށް މިހާތަނަށް ކޮށްފައިވާ އެންމެހައި މުއާމަލާތްތައް ބާތިލުކުރުމަށް ނިންމާފައިވާ ކަމަށެވެ.

އެ ބަޔާނުގައި އިތުރަށް ފާހަގަކޮށްފައިވާ ގޮތުގައި، މި މަޝްރޫއަކީ ހައްޖު ކޯޕަރޭޝަންގެ މާލީ ހާލަތު ރަނގަޅުކޮށް މާލީ ގޮތުން އެންމެ ބޮޑު މަންފާއެއް ހޯދުމަށް ކުރިއަށްގެންދާ މަޝްރޫއެކެވެ. އެހެންކަމުން ކުންފުންޏަށް އެންމެ ބޮޑު ފައިދާއެއް ލިބޭނެ ގޮތަށް ޔުނިޓުތަކުގެ އަގު އަލުން ކަނޑައެޅުމަށްފަހު، އެ ތަންތަން ވިއްކުމަށް އާންމުކޮށް ހުޅުވާލާނެ ކަމަށް ވެސް އެ ކޯޕަރޭޝަނުން ވަނީ ހާމަކޮށްފަ އެވެ.

މި ލިޔުމާ ގުޅޭ އިތުރު ލިޔުން
Hajju Corporation ge penthouse thah aguheyokoh kureege verinnah ހައްޖު ކޯޕަރޭޝަންގެ ޕެންޓުހައުސްތައް ކުރީގެ ވެރިންނަށް