ރާއްޖޭގެ ވެރިކަން ހިންގުމުގެ ނިޒާމަށް ބޮޑެތި ބަދަލުތަކެއް ގެނައުމަށްޓަކައި، ދައުލަތުގެ އެންމެ އިސްވެރިޔާ ހޮވައި ވަކިކުރުމާއި ގާނޫނުއަސާސީ އިސްލާހުކުރުމުގެ ބާރު ލިބިދޭ "ހާއްސަ މަޖިލީހެއް" އުފެއްދުމަށް "ބޮޑު ބަދަލު" އިސްލާހީ މަގުޗާޓުގެ ގަރާރުގައި ހިމަނައިފި އެވެ.

ރާއްޖޭގެ ވެރިކަމުގެ ނިޒާމު އިސްލާހުކުރުމުގެ މަގްސަދުގައި ކުރީގެ ރައީސް މުހައްމަދު ނަޝީދާއި ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް އިސްވެ އިއުލާންކުރެއްވި "ބޮޑު ބަދަލު" ސިޔާސަތުގެ ދަށުން މި ގަރާރު ވަނީ އެކުލަވާލާފަ އެވެ. އެމްޑީޕީގެ ރަސްމީ ތާއިދު ހޯދުމަށް މިރޭ ފަށާ އެ ޕާޓީގެ ކޮންގްރެސްއަށް މި ގަރާރު ހުށަހަޅުއްވަނީ ފައްޔާޒް އިސްމާއީލެވެ. ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބު ތާއިދުކުރައްވާ މި ގަރާރަށް ބަހުސްކޮށް ގޮތެއް ނިންމުން އޮންނާނީ ހޮނިހިރު ދުވަހުގެ މެންދުރުފަހުގަ އެވެ.

މި ގަރާރުގެ އެންމެ މުހިންމު އެއް ކަމަކީ ދައުލަތުގެ ނިންމުންތަކުގައި ރައްޔިތުންގެ ބަސް އިތުރުކުރުމަށްޓަކައި، ރައްޔިތުންގެ މަޖިލީހުގެ މެންބަރުންނާއި ހުރިހާ އިންތިހާބީ ކައުންސިލަރުން ހިމެނޭ "ހާއްސަ މަޖިލީހެއް" އުފެއްދުމެވެ. މި މަޖިލީހަކީ ވަކި އުޖޫރައެއް ނެތި، ހަމައެކަނި ކަމެއް ނިންމަން ޖެހިއްޖެ ހާލަތެއްގައި ބައްދަލުވާ މަޖިލީހެކެވެ.

ހާއްސަ މަޖިލީހަށް ދިނުމަށް ހުށަހަޅާފައިވާ މައިގަނޑު ބާރުތައް:

  • ގާނޫނުއަސާސީއަށް އިސްލާހު ގެނައުން ފާސްކުރުން.
  • ދައުލަތުގެ އެންމެ އިސްވެރިޔާ އައްޔަންކުރުމާއި މަގާމުން ވަކިކުރުން.
  • ދައުލަތުގެ މުހިންމު ކަންކަން ނިންމުމާއި ބައެއް އިސް މަގާމުތަކަށް މީހުން އައްޔަންކުރުމާއި ވަކިކުރުން.
  • މިނިވަން މުއައްސަސާތައް ޖަވާބުދާރީކުރުވަން އުފައްދާ ހާއްސަ ކޮމިޝަނުގެ މެންބަރުން އައްޔަންކުރުމާއި ވަކިކުރުން.

މީގެއިތުރުން، މިހާރު އޮތް ރިޔާސީ ނިޒާމު ބަދަލުކޮށް، ދައުލަތުގެ އެންމެ އިސްވެރިޔާ އަދި ސަރުކާރުގެ އެންމެ އިސްވެރިޔާއަކީ ވަކި ދެ ފަރާތެއްގެ ގޮތުގައި ކަނޑައަޅާ "މަސްއުނި ނިޒާމެއް" ތައާރަފްކުރުމަށް ވެސް ވަނީ ހިމަނާފަ އެވެ. އެގޮތުން، ސަރުކާރުގެ އެންމެ އިސްވެރިޔާ ރައްޔިތުންގެ ސީދާ ވޯޓުން އިންތިހާބުކޮށް ރައްޔިތުންގެ މަޖިލީހުން ވަކިކުރެވޭއިރު، ދައުލަތުގެ އެންމެ އިސްވެރިޔާ އައްޔަންކޮށް ވަކިކުރާނީ ހާއްސަ މަޖިލީހުންނެވެ.

ހަމައެއާއެކު، ރައްޔިތުންގެ މަޖިލީހުން މިނިވަން މުއައްސަސާތައް ޖަވާބުދާރީކުރުވުން ވަކިކޮށް، އާންމުންގެ މައްޗަށް އެކުލެވޭ ވަކި ކޮމިޝަނެއް އުފެއްދުމަށާއި، ޖޭއެސްސީގެ އެކުލެވުން ބަދަލުކުރުމަށް ވެސް ގަރާރުގައި ހުށަހަޅާފައިވެ އެވެ.

ގަރާރުގައި ހިމެނޭ އިތުރު އިސްލާހުތައް:

  • ގާނޫނުއަސާސީއަށް ބަދަލެއް ގެނެވޭނީ ރައްޔިތުންގެ ފެންނަ ނުފެންނަ ވޯޓަކުން ކަމުގައި ހެދުން.
  • އިންތިހާބުކުރެވޭ ކޮންމެ މަގާމަކުން ވެސް ދައުރުގެ ތެރޭގައި އެމީހަކު ވަކިކުރުމުގެ ބާރު ރައްޔިތުންނަށް ދިނުން.
  • ވޯޓު ލެވޭނީ ރަށްވެހިވެފައިވާ ރަށުގެ ބަދަލުގައި ދިރިއުޅޭ ދާއިރާއަކަށް ކަމަށް ހަމަޖެއްސުން.
  • ރައްޔިތުންގެ މަޖިލިސް ދެ ގޭގެ މައްޗަށް (އަންހެނުންގެ ހާއްސަ ގޮނޑިތަކާއި ފަންނީ މީހުން ހިމެނޭ މަތިގެއަކާއެކު) އެކުލަވާލައި، މެންބަރުންގެ އަދަދު ކޮންޓްރޯލް ކުރުން.

މި ސިޔާސަތުތައް ތަންފީޒުކުރުމަށްޓަކައި އެމްޑީޕީގެ ތެރޭގައި ހާއްސަ އޮފީހެއް އުފައްދާފައިވާއިރު، އެ އޮފީހުގެ އިސްވެރިޔަކަށް ހަމަޖައްސާފައިވަނީ ޕާޓީގެ ކުރީގެ ޗެއާޕާސަން ހަސަން ލަތީފެވެ.