Shamman ge 25 aharuge jalu hukum High Court gi isthiunaafu koffi

ކޮންޓްރޯލާ ޖެނެރަލް އޮފް އިމިގްރޭޝަންގެ މަގާމުގައި ކުރިން ހުންނެވި މުހައްމަދު ޝައްމާން ވަހީދު 25 އަހަރަށް ޖަލަށްލުމަށް ކްރިމިނަލް ކޯޓުން ކޮށްފައިވާ ހުކުމް ހައިކޯޓުގައި އިސްތިއުނާފު ކޮށްފި އެވެ.

ޝައްމާންގެ މައްޗަށް މިދިޔަ ޖޫން މަހު ކްރިމިނަލް ކޯޓުން ޖުމްލަ 25 އަހަރުގެ ޖަލު ހުކުމެއް އިއްވީ އޭނާގެ މައްޗަށް ދައުލަތުން އުފުލި ތިން ދައުވާއެއް ސާބިތުވުމާ ގުޅިގެންނެވެ. އެއީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާއާއި، ފޭރުމުގައި ބައިވެރިވުމުގެ ކުށުގެ ދައުވާގެ އިތުރުން މަނީ ލޯންޑްރިންގެ ކުށުގެ ދައުވާ އެވެ.

މި ދައުވާތައް ޝައްމާންގެ މައްޗަށް އުފުލީ، އިމިގްރޭޝަންގެ ބައެއް މުވައްޒަފުންނާ ބައިވެރިވެގެން ގަވާއިދާ ޚިލާފަށް ހިންގި އޮޕަރޭޝަނެއްގައި ބިދޭސީ މަސައްކަތްތެރިންތަކެއް ހައްޔަރުކޮށް، އޭގެ ތެރެއިން އެކެއްގެ އަތުން 530،000 ރުފިޔާ ނެގި ކަމަށް ތުހުމަތުކުރެވުނު މައްސަލައިގަ އެވެ. ނަމަވެސް، ޝައްމާންގެ ފަރާތުން މި ހުކުމްތައް ހައިކޯޓުގައި އިސްތިއުނާފު ކުރި ނަމަވެސް، އެ މައްސަލަ އެ ކޯޓުން ބަލައިގަތް ކަމެއް އަދި މިހާތަނަށް ސާފުވެފައެއް ނުވެ އެވެ.

މި މައްސަލައާ ގުޅިގެން ޝައްމާންގެ އާއިލާއިން ކުރިން ބުނެފައިވަނީ، އޭނާ ހައްޔަރުކުރީ ހޯމް މިނިސްޓަރު އަލީ އިހުސާންގެ ކޮރަޕްޝަންގެ ވާހަކަތައް އާންމުންނާ ހިއްސާކޮށްފާނެ ކަމުގެ ބިރަށް އެކަން ފޮރުވުމުގެ ބޭނުމުގައި ކަމަށެވެ. އަދި އޭނާ ބަންދުކުރަން މަސައްކަތް ފެށީ ހޯމް މިނިސްޓަރުގެ ވީޑިއޯއެއް އޭނާގެ އަތުގައި އޮތްކަން އެނގުމުން ކަމަށްވެސް އާއިލާއިން ވަނީ ތުހުމަތުކޮށްފަ އެވެ. މި ސަރުކާރާ ގުޅޭގޮތުން ބޮޑެތި ތުހުމަތުތަކެއް ޝައްމާން ކޮށްފައިވަނީ އޭނާ ކޯޓަށް ހާޒިރުކުރި ދުވަހު އެވެ.