ހުޅުމާލޭ ދެވަނަ ފިޔަވަހީގައި ހުންނަ އަމާން އުދަރެސް ފަސް ވަނަ ޓަވަރުގެ ގްރައުންޑް ފްލޯގައި ހުރި ކުނިތަކެއްގައި ރޯވި އަލިފާން އެއްކޮށް ކޮންޓްރޯލްކޮށްފި އެވެ.

ފަހި ދިރިއުޅުން ކޯޕަރޭޝަނުން ބުނީ މި ހާދިސާ ހިނގާފައި ވަނީ އެ ޓަވަރުގެ ގްރައުންޑް ފްލޯގައި އެއްކޮށްފައި ހުރި ކުނިތަކެއްގައި ކަމަށެވެ. އަދި މި ހާދިސާގެ ސަބަބުން އެއްވެސް މީހަކަށް އަނިޔާއެއް ނުވަތަ ގެއްލުމެއް ލިބިފައި ނުވާ ކަމަށް އެ ކޯޕަރޭޝަނުން ކަށަވަރުކޮށްދެ އެވެ.

ނަމަވެސް، އަލިފާނުގެ ސަބަބުން އެ ޓަވަރުގެ ބައެއް ފެންހޮޅިތަކަށް ވަނީ އެކި ވަރުގެ ގެއްލުންތައް ލިބިފަ އެވެ. އެފްޑީސީގެ ޓީމުން މިހާރު ދަނީ އެ ހޮޅިތައް މަރާމާތުކުރުމުގެ މަސައްކަތް ކުރަމުންނެވެ.

މަރާމާތުގެ މަސައްކަތް ނިމެންދެން އަމާން އުދަރެސް ފަސް ވަނަ ޓަވަރުގެ ބައެއް ޔުނިޓުތަކަށް ފެނުގެ ހިދުމަތް މެދުކެނޑޭނެ ކަމަށް އެފްޑީސީން ބުނެ އެވެ. މިކަމުގެ ސަބަބުން ދިމާވެދާނެ ދަތިތަކަށްޓަކައި އެ ކޯޕަރޭޝަނުން ވަނީ މާފަށް އެދިފަ އެވެ.

މި ހާދިސާއާ ގުޅިގެން ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، އަލިފާން ރޯވި ވަގުތު އެ ސަރަހައްދަށް ގިނަ އަދަދެއްގެ އާންމުން އެއްވެފައިވެ އެވެ. އަދި އަލިފާންގަނޑު ކޮންޓްރޯލްކޮށް ނިއްވާލުމަށް އާންމުންގެ ބައެއް މީހުން އަމަލީ ގޮތުން މަސައްކަތް ކުރަމުންދިޔަ މަންޒަރުވެސް އެ ވީޑިއޯތަކުން ފެނެ އެވެ.