ރަސްމާލޭގައި ޔޫއޭއީގެ އީގަލް ހިލްސް ކުންފުނިން ހިންގާ 'ވޯޓާފްރަންޓް އެންޑް މެރީނާ' މަޝްރޫއު ދެފުށް ފެންނަ ގޮތަށް އައްޑޫ ސިޓީއަށް ގެނައުމަށް މަރުހަބާ ކިޔާނެ ކަމަށް އައްޑޫ ސިޓީގެ މޭޔަރު އަލީ ނިޒާރު މިއަދު ވިދާޅުވެއްޖެ އެވެ.

އެމްޑީޕީގެ ކޮންގްރެސްގެ ތެރެއިން ކުރިއަށްދިޔަ އިންވެސްޓްމަންޓް ފޯރަމްގައި ވާހަކަދައްކަވަމުން މޭޔަރު ނިޒާރު ވިދާޅުވީ، އީގަލް ހިލްސްއިން ރަސްމާލޭގައި މިހާރު އެ މަޝްރޫއު ކުރިއަށްގެންދާ ގޮތަށް އައްޑޫއަށް ގެންނަން އެއްބަސްވެވަޑައިނުގަންނަވާ ކަމަށެވެ. ނަމަވެސް ރައްޔިތުންނަށް ދެފުށް ފެންނަ ގޮތަށް، ވާނުވާ ސާފުކޮށް ބުނެދެވޭފަދަ އުސޫލަކުން އެފަދަ މަޝްރޫއެއް އައްޑޫއަށް އައުމަކީ މައްސަލައެއް ނޫން ކަމަށް އޭނާ ފާހަގަކުރެއްވި އެވެ.

"އީގަލް ހިލްސްގެ ޕްރޮޖެކްޓް މިހާރު އެއޮތް ގޮތަށް އައްޑޫއަށް ގެންދާކަށް އަޅުގަނޑު ބޭނުމެއް ނޫން. ދެފުށް ފެންނަ ގޮތަށް ރައްޔިތުންނަށް އެނގޭ ގޮތަށް އައްޑޫ ރައްޔިތުންނަށް ވެސް މިވާ އެއްޗެއް ބުނެދެވޭ ގޮތަށް އަންނަންޔާމުން މަރުހަބާ. އަޅުގަނޑުމެން މަރުހަބާ ކިޔާނަން،" ނިޒާރު ވިދާޅުވި އެވެ.

ސަރުކާރުން އީގަލް ހިލްސްއާއެކު ވެފައިވާ އެއްބަސްވުމުގައި އެކުއިޒިޝަން ފީއެއް ނުވަތަ ބިމު ކުއްޔެއް ނެގުން ނުހިމެނެ އެވެ. އެ އެއްބަސްވުމުގެ ދަށުން ދައުލަތަށް ލިބެނީ ރަސްމާލޭގެ ކޮމާޝަލް މުދާ ވިއްކައިގެން ލިބޭ އާމްދަނީގެ 10 އިންސައްތައާއި، އެޕާޓްމަންޓުތައް ވިއްކައިގެން ލިބޭ އާމްދަނީގެ 4 އިންސައްތަ އެވެ. ފަތުރުވެރިކަމުގެ މަންޒިލެއްގެ ގޮތުގައި ތަރައްގީކުރާ ރަސްމާލޭގައި ބިދޭސީންނަށް ދިގު މުއްދަތަކަށް ދިރިއުޅެވޭ ގޮތަށް ހަދާ އެޕާޓްމަންޓްތަކާއި ވިލާތައް ވިއްކުމުގެ މަސައްކަތް އީގަލް ހިލްސްއިން މިހާރު ވެސް ވަނީ ހުޅުވާލާފަ އެވެ.

ރާއްޖޭގެ ސިޔާސީ ޕާޓީއަކުން ބޭއްވި ފުރަތަމަ އިންވެސްޓްމަންޓް ފޯރަމްގެ ތެރެއިން އައްޑޫ ސިޓީ ކައުންސިލުގެ ފަރާތުން ޖުމްލަ އަށް މަޝްރޫއެއް ވަނީ ހުށަހަޅާފަ އެވެ. އޭގެ ތެރޭގައި މޫސުމީ ބަދަލުތަކާއި ކަނޑުގެ ދިރާސާތަކަށް ހާއްސަ މަރުކަޒަކާއި، ކޮންވެންޝަން ސެންޓަރަކާއި ހޮޓަލެއް ގާއިމުކުރުމާއި، ޕަބްލިކް ބީޗް ތަރައްގީކުރުމާއި، ގްރީން ވޭސްޓް ކޮމްޕޯސްޓިން ފެސިލިޓީއެއް ގާއިމުކުރުން ހިމެނެ އެވެ. މީގެއިތުރުން ހޯމް ސޯލާ އެންޑް ބެޓަރީ ޕްރޮގްރާމާއި، މިއުޒިއަމް އެންޑް ކަލްޗަރަލް ސެންޓަރާއި، ނޭޗާ ޕާކް އިކޯ-އިންވެސްޓްމަންޓް އަދި ވާރޭފެން ނަގައި ރައްކާކުރާ ފެސިލިޓީ މަޝްރޫއު ހިމެނެ އެވެ.

އެމްޑީޕީ ކޮންގްރެސްގައި މިއަދު އިންވެސްޓްމަންޓް ފޯރަމް ކުރިއަށްދިޔައިރު، މާދަމާގެ އެޖެންޑާގައި އޮތީ ޕާޓީގެ އަސާސީ ގަވާއިދަށް ބަދަލުތައް ގެނައުމާއި ގަރާރުތައް ފާސްކުރުމުގެ މަސައްކަތެވެ.