TGST gaanoon islaahu kuriyas gellunu ithubaaru anburaa nulibeyne: Fayyaz

ބޭރުގެ ޓުއާ އޮޕަރޭޓަރުންނާއި ޓްރެވަލް އެޖެންސީތައް އަދި އޮންލައިން ބުކިން ޕްލެޓްފޯމްތަކުން ޓީޖީއެސްޓީ ނަގާ ގޮތަށް ގާނޫނު އިސްލާހު ކުރުމަށްފަހު، އެ ނިންމުން އަނބުރާ ގެންދިޔަ ނަމަވެސް، އެކަމުގެ ސަބަބުން ރާއްޖޭގެ ފަތުރުވެރިކަމަށް ލިބުނު ބޮޑު ގެއްލުމާއި ގެއްލިގެންދިޔަ އިތުބާރު ދެން އަލުން އަނބުރާ ނުހޯދޭނެ ކަމަށް ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެ އެވެ.

އެމްޑީޕީގެ ކޮންގްރެސް ނިންމުމުގެ ގޮތުން ބޭއްވި ޖަލްސާގައި ވާހަކަދައްކަވަމުން ފައްޔާޒު ވިދާޅުވީ، ސަރުކާރުން ހުރިހާ ބާރުތަކެއް މުށުތެރެއަށް ލައިގެން ކަންކަމުގެ ހަގީގަތް ނުބަލައި ނިންމަމުންދާ ނިންމުންތަކުގެ ސަބަބުން ރާއްޖޭގެ އިގްތިސާދު ވަނީ ނާޒުކު ފައްތަރަކަށް ވެއްޓިފަ އެވެ. އަދި ބޭރުގެ ޓުއާ އޮޕަރޭޓަރުންގެ އަތުން ޓެކްސް ނަގަން އުޅުމަށްފަހު މިހާރު އަނެއްކާވެސް އެކަން އުނބަށްޖަހަން އުޅޭކަން ފާހަގަކުރައްވައި ފައްޔާޒު ސަރުކާރަށް ވަރަށް ބޮޑަށް ފާޑުވިދާޅުވި އެވެ.

މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް މިދިޔަ އޮގަސްޓު މަހު ގެނައި އިސްލާހުގެ ދަށުން، ރާއްޖޭގައި އޮފީހެއް ގާއިމުނުކޮށް ރާއްޖޭގެ ޓޫރިޒަމް ޕްރޮޑަކްޓްތައް ވިއްކާ ބޭރުގެ އެޖެންސީތަކާއި އޮންލައިން ޕްލެޓްފޯމްތަކުން %17 ގެ ޓެކުހެއް ނަގަން ވަނީ ހިމަނައިފަ އެވެ. ފަތުރުވެރިކަމުގެ ސިނާއަތުގެ ވިޔަފާރިވެރިންނާއި ބޭރުގެ ފަރާތްތަކުން އެކަމާ ދެކޮޅަށް ކަންބޮޑުވުން ފާޅުކުރަމުން ދަނިކޮށް ވެސް އެ ޓެކްސް ނަގަން ފެށި އެވެ.

ނަމަވެސް، ދުނިޔޭގެ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި ޓޫރިޒަމް މިނިސްޓަރު މުހައްމަދު އަމީން ވަނީ، ދާއިރާގެ ކަންބޮޑުވުންތަކަށް ރިއާޔަތްކޮށް އެ ގާނޫނަށް އަލުން އިސްލާހުތަކެއް ގެންނަން ނިންމާފައިވާކަން ހާމަކުރައްވާފަ އެވެ.

މިކަމާ ގުޅިގެން ފައްޔާޒު ވިދާޅުވީ، އެ ޓެކްސް ނުނަގަން ނިންމުމަކީ ރަނގަޅު ނިންމުމެއް ކަމަށް ވިޔަސް، އެފަދަ ޓެކުހެއް ނަގަން އުޅުނު ހިސާބުން ފެށިގެން މުޅި އިންޑަސްޓްރީއަށް ބޮޑެތި ލޮޅުންތަކެއް އަރައި ނިމިއްޖެ ކަމަށެވެ. އަދި ރާއްޖޭގެ ޓޫރިޒަމް ޕްރޮމޯޓްކޮށް ވިއްކަން ތިބި ބޭރުގެ ފަރާތްތަކުގެ ނުރުހުން އަމާޒުވެ، ރާއްޖެއަށް އޮތް އިތުބާރާއި ނަޒާހަތްތެރިކަން އެއްކޮށް ގެއްލިފައިވާ ކަމަށް އޭނާ ވިދާޅުވި އެވެ.

"ދެނެއް އަނބުރާ އެއެއް ނުލިބޭނެ އެ ގާނޫނު ބަދަލު ކުރިޔަކަސް. އެތައް ބިލިއަން ޑޮލަރެއްގެ ގެއްލުން އަޅުގަނޑުމެންނަށް ގެއްލިގެން އެ ދިޔައީ. ފަތު އަޑުކިޔާފައި ކުރިއަށްދިޔަ އިގްތިސާދު އެ ފުޑުފުޑުކޮށްލީ،" ފައްޔާޒު ވިދާޅުވި އެވެ.

އޭނާ އިތުރަށް ވިދާޅުވީ، އެތައް ޖީލަކުން ދިވެހި ރައްޔިތުންނާއި އަމިއްލަ ވިޔަފާރިތަކުން ބުރަ މަސައްކަތުން ބިނާކުރި މި ސިނާއަތް، ސަރުކާރުގެ ވިސްނުން ކުރު ސިޔާސަތުތަކުގެ ސަބަބުން 30 ނުވަތަ 40 އަހަރު ފަހަތަށް ސޮއްސައިލައިފައިވާ ކަމަށާއި މިއީ ފޫނުބެއްދޭ ވަރުގެ ބޮޑު ގެއްލުމެއް ކަމަށެވެ.