ސިޔާސީ ޕާޓީ ތަކަށް ދައުލަތުގެ މިއަހަރުގެ ބަޖެޓުން 32.9 މިލިއަން ރުފިޔާ ޖަމާކޮށްދިނުމަށް އިލެކްޝަންސް ކޮމިޝަނުން ފިނޭންސް މިނިސްޓްރީގައި އެދިއްޖެ އެވެ.

އިލެކްޝަންސް ކޮމިޝަންގެ އޮފިޝަލަކު ވިދާޅުވީ މިދިޔަމަހުގެ ފަހުކޮޅު ޖުމްހޫރީ ޕާޓީއާއި ޕީޕީއެމް އަށް ފައިސާ ދޫކުރަން ފިނޭންސްގައި އެދިފައިވާނެ ކަމަށެވެ. އަދި މިދިޔަ ހަފްތާގެ ތެރޭގައި އެމްޑީޕީއާއި އަދާލަތު ޕާޓީއަށް ފައިސާ ދޫކުރަން ވެސް ފިނޭންސަށް ހުށަހަޅާފައިވާ ކަމަށެވެ.

ސިޔާސީ ޕާޓީ ތަކުގެ ގާނޫނުގައިވާ ގޮތުން އަހަރުގެ ފުރަތަމަ ތިން މަސް ނިމުމުގެ ކުރިން ސިޔާސީ ޕާޓީ ތަކަށް ފައިސާ ޖަމާކޮށްދޭންޖެހެ އެވެ. ނަމަވެސް ފިނޭންސް މިނިސްޓްރީން ޕާޓީ ތަކަށް ފައިސާ ޖަމާކޮށްދިން ކަން އެ މިނިސްޓްރީން ހާމަ ކޮށްފައެއް ނުވެ އެވެ.

ޕާޓީތަކަށް ފައިސާ ލިބޭ އަދަދު

  • އެމްޑީޕީ - 15،024،009.96 ރުފިޔާ
  • ޕީޕީއެމް - 9،410،483.51 ރުފިޔާ
  • ޖޭޕީ - 5،526،669.74 ރުފިޔާ
  • އަދާލަތު ޕާޓީ - 2،900،903.79

އިލެކްޝަންސް ކޮމިޝަނުން ޕާޓީ ތަކަށް ފައިސާ ދޫކުރަން ފިނޭންސްގައި އެދެނީ ފައިސާ ލިބޭ ޕާޓީ ތަކުން ކޮންމެ އަހަރަކުވެސް ހުށަހަޅަންޖެހޭ އަހަރީ ރިޕޯޓާއި، އޮޑިޓް ރިޕޯޓް ހުށަހެޅުމުން އެ ރިޕޯޓްތަކުގެ ސައްހަ ކަމަށް ބެލުމަށްފަހު އެވެ.