ރައީސް ޑރ. މުހައްމަދު މުއިއްޒުގެ އެޑްވައިޒަރުންގެ ގޮތުގައި މަޝްހޫރު ދެ ވިޔަފާރިވެރިން ކަމުގައިވާ މުހައްމަދު އަލީ ޖަނާހު އާއި މަންޓާ އެއާގެ ސީއީއޯ މުހައްމަދު ހަލީލު އައްޔަން ކުރައްވައިފި އެވެ.

ޖަނާހު އައްޔަން ކުރެއްވީ ޕްރިންސިޕަލް އެޑްވައިޒާ ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓް މަގާމަށެވެ. ހަލީލު އައްޔަން ކުރެއްވީ އެޑްވައިޒާ ޓު ދަ ޕްރެޒިޑެންޓް އޮން ޓޫރިޒަމް ޑިވެލޮޕްމަންޓް މަގާމަށެވެ.

ޖަނާހު އަކީ ރާއްޖޭގެ ކޮންސްޓްރަކްޝަން ދާއިރާގައި ވެސް ފާހަގަކޮށްލެވޭ މަޝްހޫރު ވިޔަފާރިވެރިއެކެވެ. އޭނާ ވިޔަފާރި ފެއްޓެވީ 1987 ގަ އެވެ.

އޭނާ ވަނީ ކޮންސްޓްރަކްޝަން ވިޔަފާރިވެރިންގެ ޖަމިއްޔާގެ ރައީސްކަން ހަ ދައުރެއްގައި ކުރައްވާފަ އެވެ. އޭނާ އަކީ މިހާރު ވެސް އެ ޖަމްއިއްޔާގެ ރައީސެވެ. ނިމިދިޔަ ރިޔާސީ އިންތިހާބުގައި އޭނާ ތާއީދު ކުރެއްވީ އޭރުގެ ރައީސް އިބްރާހީމް މުހައްމަދު ސޯލިހަށެވެ.

މަންޓާ އެއާގެ ސީއީއޯ ހަލީލުއަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އެމްއެމްޕީއާރުސީގެ ޗެއާމަންގެ މަގާމު ފުރުއްވި ބޭފުޅެކެވެ.