މާލޭ ސިޓީ ކައުންސިލްގެ މެމްބަރު އިބްރާހީމް އަބޫބަކުރު، ކުރީގެ ރައީސް އަބްދުﷲ ޔާމީން އަބްދުލްގައްޔޫމް އިސްވެ ހުންވައި އުފައްދަވަން މަސައްކަތް ކުރައްވާ ޕީއެންއެފްއާ ގުޅިއްޖެ އެވެ.

އިބްރާހީމް އަބޫބަކުރަކީ ޕީޕީއެމްގެ ޓިކެޓްގައި އެ ކައުންސިލަށް އިންތިހާބުވި ބޭފުޅެކެވެ. ޕީއެންއެފްއަށް ސޮއިކުރެއްވުމަށްފަހު ޗެނަލް13 އަށް ދެއްވި އިންޓަވިއުއެއްގައި އޭނާ ވިދާޅުވީ މާލޭ ސިޓީ ކައުންސިލުން ބޭނުންވާ ގޮތަށް ކަންކަން ނުކުރެވޭ ކަމަށާއި ސަރުކާރުން އަންނަނީ އެ ކައުންސިލަށް ނުފޫޒު ފޯރުވަމުން ކަމަށެވެ.

އޭނާ ވިދާޅުވީ ޔާމީންގެ ފޮޓޯ ބޭނުންކޮށްގެން ކެމްޕޭންކޮށް އެމަނިކުފާނު މިނިވަންކުރުމުގެ ވައުދާއެކު ރައީސް ޑރ. މުހައްމަދު މުއިއްޒު ވެރިކަަމަށް ވަޑައިގަތަސް އެމަނިކުފާނު މިނިވަންކުރުމަށްޓަކައި އެއްވެސް މަސައްކަތެއް ކުރަމުން ނުދާ ކަމަށެވެ.

ޕީއެންއެފް އުފެއްދުމަށް ބޭނުންވާ 3000 މެމްބަރުން ހަމަކޮށްފައި ވިޔަސް ޔާމީންގެ އިސްތިއުނާފު މައްސަލަ އަދި ނިމިފައިނުވާތީ ޕާޓީ އުފެއްދުމަށް އިލެކްޝަންސް ކޮމިޝަނަށް ހުށަހެޅުން ވަނީ ފަސްކޮށްފަ އެވެ.

ކޮންމެ ދުވަހަކު ވެސް އެ ޕާޓީއަށް ގިނަ ބަޔަކު އަންނަނީ ސޮއިކުރަމުންނެވެ.