ކޮށިކޮށް އިނގިރޭސި ބަހުން ވާހަކަ ދައްކާ ޓޫރިޒަމް މިނިސްޓަރު އިބްރާހިމް ފައިސަލް ކޯޗެއްގެ އެހީ ހޯދައިގެން އެ ބަސް ރަނގަޅަށް ދަސްކުރަން ނިންމައިފި އެވެ.

ރަނގަޅަށް އިނގިރޭސި ބަހުން ވާހަކަ ދައްކަން ނޭނގޭތީ ގިނަ ބަޔަކު އަންނަނީ ފައިސަލަށް ފާޑުކިޔަމުންނެވެ.

ފައިސަލް ވިދާޅުވީ އާންމު ތަންތަނުގައި ރަނގަޅަށް ވާހަކަ ދައްކަން ނޭނގޭތީ ގިނަ ބަޔަކު ކިޔާ ފާޑުކިޔުންތަކަށް ހައްލެއް ހޯދުމަށް މަސައްކަތް ކުރަމުން އަންނަ ކަމަށެވެ. އެގޮތުން ކޯޗެއް ނަގައިގެން އެ މައްސަލައަށް ކުރިއަށް އޮތް ހަ މަސް ދުވަސްތެރޭ ހައްލެއް ހޯދާނެ ކަމަށް މިނިސްޓަރު ވިދާޅުވި އެވެ.

"އެއީ، ދިވެހި ރާއްޖޭގެ ޓުއަރިޒަމް މިނިސްޓަރު ވީމަ، ދިވެހި ރާއްޖޭގެ ރައްޔިތުން ބޭނުންވާ ވަކި ސްޓެންޑަޑެއް ހުންނަކަން އަޅުގަނޑު އަމިއްލައަށް ގަބޫލުކޮށް، އަޅުގަނޑު އެ ޕްރެކްޓިސްކޮށް، އެ ޓްރައިނިންތައް ހަދާ، އިރާދަކުރެއްވިއްޔާ ކުރިއަށް އޮތް ހަ މަސް ތެރޭ މިކަން ރަނގަޅު ކުރާނަން،" މިނިސްޓަރު ފައިސަލް ވިދާޅުވި އެވެ.

މިމަހުގެ ކުރީކޮޅު ދުބާއީގައި އޮތް އެރެބިއަން ޓްރެވަލް މާކެޓްގައި ޓޫރިޒަމް މިނިސްޓަރު ފައިސަލް ވާހަކަދައްކަވަނީ. ފޮޓޯ: އެމްއެމްޕީއާރުސީ

މީގެ އިތުރުން ފައިސަލް ވިދާޅުވީ އޭނާ ޓޫރިޒަމް މިނިސްޓަރުކަމުގެ މަގާމަށް އައްޔަންކޮށް، އެ މަގާމުގައި މިއަދު އެ ހުރެވެނީ ރައީސް މުއިއްޒުގެ ފުރިހަމަ އިތުބާރު އޭނާއަށް އޮތުމުން ކަމަށެވެ.

ރާއްޖޭގެ އިގުތިސާދީގެ މައިނާރު ކަމަށްވާ ޓޫރިޒަމް ދާއިރާގެ ކަންކަން ބެލެހެއްޓުމަށް ޕީއެންސީގެ ޗެއާޕާސަން އަދި ރައީސް މުހައްމަދު މުއިއްޒުގެ ސްޕެޝަލް އެޑްވައިޒަރު އަބްދުއްރަހީމް އަބްދުﷲ ގެ ދަރިކަލުން ފައިސަލް ހަމަޖެއްސެވުމުން ގިނަ ބައެއްގެ ފާޑުކިޔުން އަމާޒުވި އެވެ. އަދި އޭނާ އަކީ އެ މިނިސްޓްރީ ހިންގުމުގެ ގާބިލްކަން އަދި ތަޖުރިބާ ވެސް ނެތް މީހެއް ކަމަށް ގިނަ ބަޔަކު އަންނަނީ ބުނަމުންނެވެ.

އޭނާ އިނގިރޭސި ބަހުން ދައްކަވާ ވާހަކަ ހަމަނުޖެހޭ ކަމަށާއި މިނިސްޓަރަކަށް ހުންނަވާ ބޭފުޅަކު އެފަދަ އިން ވާހަކަ ދެއްކެވުމަކީ ގަބޫލު ކުރެވޭ ކަމެއް ނޫން ކަމަށް ގިނަ ބަޔަކު ބުނެ އެވެ.

ފަތުރުވެރިކަމުގައި ދުނިޔޭގެ އެއްވަނަ މަންޒިލުގެ ގޮތުގައި ރާއްޖެ އޮތްއިރު، އެ ދާއިރާގެ ކަންތައް ބަލަހައްޓަން ހުންނެވި އެންމެ އިސްވެރިޔާގެ "ފެންވަރު ދަށްވުމަކީ" ކަންބޮޑުވުމެއް އަދި ލަދުގަންނަން ޖެހޭ ކަމެއް ކަމަށް ބުނެ ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ.