ހުޅުމާލޭގައި މީހުން އާބާދުވީ ދުވަހުން ފެށިގެން ބޭނުންކުރަމުން އަންނަ ހޮސްޕިޓަލަށް އެއްވެސް ބަދަލެއް ނުގެނެސް އެ ހޮސްޕިޓަލް ޓާޝަރީ ފެންވަރުގެ ހޮސްޕިޓަލެއްގެ ގޮތުގައި ރައީސް މުހައްމަދު މުއިއްޒު މިއަދު ހުޅުއްވައިދެއްވައިފި އެވެ.

ރައީސް މުއިއްޒު ހުޅުމާލޭ ހޮސްޕިޓަލް ރަސްމީކޮށް ހުޅުއްވައިދެއްވީ މިއަދު ހަވީރު ބޭއްވި ރަސްމިއްޔާތެއްގަ އެވެ. ރައީސް އޮފީހުން ބުނީ ރަސްމީކޮށް އެ ހޮސްޕިޓަލް ހުޅުވިއިރު، އޮޕަރޭޝަން ތިއޭޓާ ކޮމްޕްލެކްސްއަކާއި އައިސީޔޫއަކާއި އެންއައިސީޔޫއެއްގެ އިތުރުން ސީއެސްޑީއެއް އަލަށް ގާއިމްކޮށްފައިވާނެ ކަމަށެވެ.

ހުޅުމާލޭ ހޮސްޕިޓަލަކީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ހުޅުވި ހޮސްޕިޓަލެކެވެ. އެ ހޮސްޕިޓަލްގައި އާ އިމާރާތެއް ގާއިމްކުރީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ. ނިމިދިޔަ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ވެސް އެ އިމާރާތް ދިޔައީ ބޭނުންކުރަމުންނެވެ.

ރަސްމީކޮށް ހުޅުމާލޭ ހޮސްޕިޓަލް ހުޅުވިޔަސް އެތަނަށް ޑޮކްޓަރުން އިތުރެއް ނުވެ އެވެ. ޑޮކްޓަރަށް ދެއްކުމަށް ކިޔޫގައި ގިނަވަގުތު ތިބެންޖެހޭ ތިބުމަށް ނިމުމެއް ނާދެ އެވެ. އެ ހޮސްޕިޓަލުން ދޭ ހިދުމަތްތަކުގެ ފެންވަރާ މެދު ރައްޔިތުންގެ އެތަކެއް ކަންބޮޑުވުންތަކެއް އަދިވެސް އެބަހުއްޓެވެ.

ދާދިފަހުން ރައީސް މުއިއްޒު ވަނީ ބޭނުންކުރަމުން އަންނަތާ ފަސް އަހަރުވެފައިވާ ދަރުމަވަންތަ ހޮސްޕިޓަލް ވެސް ރަސްމީކޮށް ހުޅުއްވައިދެއްވާފަ އެވެ.