ބޮލީވުޑްގެ އެންމެ މަގުބޫލު ތިން ތަރިން ކަމަށްވާ ޝާހްރުކް ޚާންއާއި ސަލްމާން ޚާން އަދި އާމިރު ޚާން އެކުގައި ފިލްމަކުން ފެނިދާނެ ކަމުގެ އިޝާރާތެއް އާމިރު ދީފި އެވެ.

މިފަހުން ސައުދީ އަރަބިއާގެ ޖިއްދާގައި އޮތް ރެޑް ސީ ފިލްމު ފެސްޓިވަލްގައި ވާހަކަ ދައްކަމުން އާމިރު ބުނީ އެ ތިން ތަރިން އެކުގައި ފިލްމެއް ކުޅުމުގެ ވާހަކަ އެމީހުންގެ ތެރޭގައި ދެކެވިފައިވާ ކަމަށެވެ.

"މީގެ ހަ މަހެއްހާ ދުވަސް ކުރިން އަހަންނާ އެމީހުން ބައްދަލުވި. އަދި އެކުގައި ފިލްމެއްގެ މަސައްކަތް ކުރުމުގެ ހިޔާލު ހުށައެޅިން. އަހަރެން ބުނިން އަހަރުމެން އެކުގައި ފިލްމަކުން ނުފެނުމަކީ ވަރަށް ދެރަ ކަމެކޭ" އާމިރު ބުންޏެވެ.

އާމިރުގެ އެ ހިޔާލަށް ޝާހްރުކް ޚާންއާއި ސަލްމާން ވެސް އެއްބަސްވި ކަމަށާއި އިރާދަ ކުރެއްވިއްޔާ ވަރަށް އަވަހަށް އެކަން ހަގީގަތަކަށް ވާނެ ކަމަށް ވެސް އާމިރު ބުނެފައިވެ އެވެ.

މީގެ ކުރިން އެ ތިން ތަރިންގެ ތެރެއިން ދެ ތަރިން އެކުގައި ފިލްމުތަކުން ފެނުނު ނަމަވެސް ތިން ތަރިން އެއްކޮށް އެއް ފިލްމަކުން ފެނިފައެއް ނުވެ އެވެ.

ބޮލީވުޑްގެ އެންމެ ކާމިޔާބު ތިން "ޚާނުން" އެކުގައި ފިލްމަކުން ފެނުމަކީ ގިނަ ބަޔަކު ކުރަމުން އަންނަ އިންތިޒާރަކަށްވާއިރު އެ އިންތިޒާރަށް ނިމުމެއް އަންނަ ކަމުގެ ކޮޅުމަތި މިހާރު ވަނީ ފެނިފަ އެވެ.