ޚާއްސަ ތަނަކަށް ދާން ތައްޔާރުވާއިރު ލާނެ ހެދުމެއް ކަނޑައެޅުމަކީ އުނދަގޫ ކަމެކެވެ. ވަގުތު ކުޑަތަން ވަމުން އަންނައިރު ވެސް އެތައް ހެދުމެއް ލާފަ ބަދަލު ކުރެވެނީ ހިތްހަމަޖެހޭ ފަދަ ހެދުމަކާއި ދިމާނުވާތީ އެވެ. ހެދުމެއް ފައިނަލް ކުރެވެނީ އެހެދުމަކުން އުފާވެރި އިހްސާސެއް ގުނަވައިދޭ ހެދުމަކާއި ދިމާވުމުންނެވެ.
ކުލައަކީ ވަރަށް އަޖައިބު ކުރަނިވި އެއްޗެކެވެ. އެކިކުލައިން އެކި އިހްސާސްތައް ގެނުވަދޭކަން އަމިއްލަ ތަޖުރިބާއިންވެސް އެނގެ އެވެ. އަހަރުމެން ލާހެދުމުގެ ކުލައިން، އަމިއްލައަށް ހިތަހަމަޖެހުން ލިބޭ ފަދައިން ބަލާ މީހުނަށް ވެސް ހެދުމުގެ ކުލައިން ތަފާތު އިހްސާސްތަކެއް ކުރެވެ އެވެ. އަދި ހެދުމުގެ ވެރިޔާއާމެދު ދެކެވޭ ގޮތް ތަފާތުވެ އެވެ.
ސައިންސުގެ ހޯދުންތަކުން އެނގޭ ގޮތުގައި ލައިގެން ހުންނަ ހެދުމުގެ ސަބަބުން މީހާގެ ހިއްސުތަކަށް ވެސް ބަދަލުތަކެއް ގެނުވަ އެވެ. ނޫކުލައިގެ ހެދުންލުމަކީ ނަފްސާނީ ދުޅަހެޔޮކަމަށް މަގުފަހިކުރާ ކަމެއް ކަމަށް ސައިކޮލިޖިސްޓުން ވެސް އެއްބަސްވެ އެވެ. އެދުޅަހެޔޮކަމަކީ ނޫކުލަ ފެނުމުން އުފައްދައިދޭ އިހްސާސްތަކެވެ. އޭގެ ސަބަބުން އެމީހެއްގެ އުޅުމަށް ހެޔޮ ބަދަލުތަކެއް ގެނުވަ އެވެ. އަދި މިއުފެދޭ ރަނގަޅު އިހްސާސްތަކާއެކު މީހުންނާ މުއާމަލާތް ކުރެވޭ ގޮތަށް ވެސް ބަދަލުތަކެއް އާދެ އެވެ.
ނޫކުލަ: ހިއްސުތަކާއި ކުޅެލާ ވަރަށް ޚާއްސަ ކުލައެއް
ކުލައާ ބެހޭ މާހިރުން ވިދާޅުވާ ގޮތުގައި ނޫކުލައަކީ މަޑުމައިތިރި ކަމާއި އަމާންކަން ވާކަން އިހްސާސް ކޮށްދޭ ކުލަ އެކެވެ. ނޫކުލައިގެ ހެދުމެއް ލައިގެން ހުންނަ މީހާއަކީ އިތުބާރު ހިފޭ، ހުނަރުވެރި މީހެއްކަން ދައްކައިދެ އެވެ. އެމެރިކާގެ ކުލައިގެ މާހިރެއް ކަމަށްވާ އެންޖެލާ ރައިޓް ވިދާޅުވާގޮތުގައި ނޫކުލައަކީ ހިއްސުތަކަށް ހަމަޖެހުން ގެނެސްދޭ ކުލައެކެވެ. ނޫކުލައަކީ ހަމަޖެހުން ގެނެސްދޭ ކުލައެއްކަން ސައެންސްގެ އަލީގައި ވެސް ހޯދިފައިވެ އެވެ.
ހާއްސަ މާހައުލުތަކުގައި ނޫކުލައިން އިތުރު ފައިދާތަކެއް
މަޑުނޫކުލަ ފެނުމުން ތަނަވަސްކަމާއި ސާފުކަން ދައްކައިދެ އެވެ. އެހެންވުމުން މަޑުނޫކުލައަކީ ސަމާލުކަން އިތުރު ކުރުމަށާއި ހިތްހަމަޖެހުން އުފެއްދުމަށް ޚާއްސަ މާހައުލުތަކަށް އެންމެ ރަނގަޅު ކުލަ އެވެ. މުވައްޒިފުންގެ ޔުނިފޯމާއި، ހިދުމަތްދޭ ތަންތަނުގެ ފާރުގައި ނޫކުލަ ބޭނުންކުރެވެނީ މިސަބަބަށްޓަކަ އެވެ. ނޫކުލައިގެ ހެދުމެއް ލައިގެން ހުންނަނަމަ، އެއީ ބިޒީ ދުވަހެއް ނަމަވެސް އެކުލަ އަބަދު ފެންނަން ހުރުމުގެ ސަބަބުން ހިތްހަމަޖެހުން ގެނުވަ އެވެ.
ގަދަނޫކުލަ އިން ވަރަށް ކޮލިޓީކަން ބުނެދޭ
ގަދަ ނޫކުލަ ނުވަތަ ނޭވީ ބްލޫ ކުލައިން ގަދަރު، ހައިބަތު އަދި ބަރޯސާވެވޭ ފަދަ މީހެއްކަން ދައްކައިދެ އެވެ. އޮފީސް މާހައުލުތަކުގައި ގަދަނޫކުލައިން ހެދުން ނުވަތަ ޔުނިފޯމު ބޭނުންކުރެވިފައިވާނަމަ، އެތަނަކީ ބާރުގަދަ އަދި އިތުބާރު ކުރެވޭ ޚިދުމަތެއްދެވޭ ތަނެއްކަން ދައްކައިދެ އެވެ. ވަޒީފާއެއްގެ އިންޓަވިއުއަކަށްދާ ނަމަވެސް ގަދަ ނޫކުލައިގެ ހެދުމެއްލުމަކީ މޮޅުކަމާއި ތެދުވެރިކަން ދައްކުވައިދޭނެ ކަމެކެވެ.
ނޫކުލައިގެ ހެދުމުން ސިއްހީ ފައިދާތަކެއް ކުރުވިއަސް ނޫކުލަ ބޭނުންކުރުން އެންމެ ރަނގަޅު ނޫން މާހައުލުތައް ވެ އެވެ. މިސާލަކަށް މީހުން ގިނަ އަދި މަޖަލާއި އުފާކުރާ މާހައުލުތަކަށް ގަދަ ނޫކުލައިގެ ހެދުމެއް ލުމަކީ އެހެން މީހުންނަށް އޭނައާ ވާހަކަ ދައްކަން އުނދަގޫ ވެދާނެކަމެކެވެ. އެއީ ގަދަ ނޫކުލައިން ޝާހީ، އިއްޒަތްތެރި ނުވަތަ މާމަތީ ފެންވަރެއްގެ މީހެއްކަން ދައްކައިދޭތީ އެވެ. ނަމަވެސް ގަދަނުލާއި އެހެން ކުލައެއް މިސާލަކަށް އޮރެންޖު ނުވަތަ ރީނދޫ ކުލައާ ގުޅުވައި ލެވިފައިވާނަމަ އޭނާ ވަށައިގެން ތިބޭ މީހުނަށް އެ މީހަކާ ވާހަކަ ދައްކަން ފަސޭހަ ވާނެ އެވެ.
އެކި ހާލަތުގައި ނޫކުލައިގެ ހެދުން ބޭނުންކުރުން
އޮފީސް ބައްދަލުވުން ނުވަތަ ބިޒްނަސް ބައްދަލުވުންތަކުގައި ނޭވީ ބްލޫ ކުލައިގެ ހެދުމެއް ބޭނުންކުރުމުން އިތުބާރު ކުރެވޭ، ގާބިލް މީހެއްގެ ގޮތުގައި ދައްކައިދެވޭނެ އެވެ.
އާދައިގެ އެއްވުންތަކަށް ދާއިރު، މަޑު ނޫކުލައިގެ ހެދުމެއް ނުވަތަ ޖީންސް އަދި މަޑުނޫކުލައިގެ ގަހަނާ ބޭނުންކުރުމަކީ އަމާން އަދި އަރާމު އިހްސާސެއް ގެނުވަދޭނެ ކަމެކެވެ. އަދި އެބައްދަލުވުމުގައި ވަކިކަމަކަށް ފޯކަސް ރަނގަޅު ކޮށްދޭނެ ވެސް ކަމެކެވެ.
ކަސްރަތުކުރަން ދާނަމަ ނޫކުލައިގެ ހެދުމަކުން ފައިދާކުރޭ
ނޫކުލައަކީ ސާފު ރީތިކަމުގެ އިހުސާސް ގެނުވައިދޭ ކުލައަކަށް ވާތީ ކަސްރަތު ކުރާނަމަ، ނޫކުލައިގެ ޓީޝާޓް ނުވަތަ ޝޯޓްސް އަދި ޓައިޓްސްލުމުން އެކުރާ ކަސްރަތަށް ފޯކަސް ކުރަން ފަސޭހަވެ ހުންނަ ކުދި ހިތްހަމަނުޖެހުންތަކުން ވެސް ދުރުކޮށްދޭނެ އެވެ. ސްޓައިލިޝް ގޮތް ދައްކުވައިދޭން ބޭނުންނަމަ ނޫކުލަ އާއި އެހެން ކުލައަކާއި ގުޅުވުމުން ތަފާތު ފެންނާނެ އެވެ.
ނޫކުލައިން ނަފްސާނީ ގިނަ ފައިދާތަކެއް ކުރުވަ އެވެ. ހިތަށާއި ސިކުނޑިއަށް ފަސޭހަކުރުވަ އެވެ. މުޅި ހަށިގަނޑަށް ލުއިލިބިގެން ދިއުމުގެ ނަތީޖާއަކަށް ވަނީ ހުނަރުވެރިކަން އިތުރުވުމެވެ. އަދި އެހެން މީހުން ތިމާއަށް ކުރާ އިތުބާރު ބޮޑުވެގެން ދިއުމެވެ. ނޫކުލައާއި އެހެނިހެން ކުލަ ގުޅުވާފައި ހުންނަ ހެދުންތަކުން ރީތިކަމާއި ސްޓައިލިޝްކަން ގެނުވައިދެ އެވެ. ނޫކުލަ ބޭނުން ކުރުމަކީ ނަފްސާނީ އަދި ޖިސްމާނީ ދުޅަހެޔޮކަން ވެސް ލިބިދޭ ކަމެކެވެ.
