ސަރުކާރުން 30 މިލިއަން ނަގައިގެން މިސްކިތެއް ނޭޅުނު އެސްޖޭ ކުންފުންޏަށް ރިސޯޓެއް ތަރައްގީކުރަން ހަވާލުކޮށްފި އެވެ.

ސަރުކާރުން އެސްޖޭ ކުންފުންޏާ ހަވާލުކުރީ ޅ. އަތޮޅު ވިހަފަރު ފިނޮޅުގައި ރިސޯޓެއް ތަރައްގީކުރުމަށެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ވަނީ މާލޭގެ ޒިކުރާ މިސްކިތް ހުރި ބިމުގައި މިސްކިތަކާއެކު 10 ބުރީގެ އިމާރާތެއް އެޅުމަށް އެ ކުންފުންޏާ ހަވާލުކޮށްފަ އެވެ. ނަމަވެސް ވެރިކަން ބަދަލުވިއިރު ވެސް އެ މަސައްކަތް ފެށިފައެއްނުވެ އެވެ. އެކަމަކު އެ މަސައްކަތް ކުރުމަށް އިކުއިޑިޓީގެ ގޮތުގައި 30 މިލިއަން ރުފިޔާ ސަރުކާރުން ދީފައިވެ އެވެ.

ޖެހިގެން އައި ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން އެ ފައިސާ ހޯދަން އެ ކުންފުންޏާ ދެކޮޅަށް ދައުވާކުރި އެވެ. ނަމަވެސް ކޯޓުން ބޭރުގައި މައްސަލަ ހައްލުކޮށް ކޯޓަށް ހުށަހެޅި މައްސަލަ ސަރުކާރުން އަނބުރާ ނެގި އެވެ.

މައްސަލަ ހައްލުކުރީ އެ ފައިސާ ސަރުކާރަށް ދިނުމުގެ ބަދަލުގައި އެ ފައިސާ ހަރަދުކޮށްގެން ހުޅުމާލޭ ދެވަނަ ފިޔަވަހީގައި ދެ ބުރީގެ މިސްކިތެއް ބިނާކުރުމަށް އެސްޖޭއާއެކު އެއްބަސްވުމަކަށް އައިސްގެންނެވެ.

އެގޮތުން ޖެނުއަރީ 23، 2022 ވަނަ ދުވަހު ވަނީ އެ މިސްކިތް އެޅުމަށް އިސްލާމިކް މިނިސްޓްރީ އާއި އެސްޖޭ ކޮންސްޓްރަކްޝަނާއެކު އެއްބަސްވުމެއްގައި ސޮއިކޮށްފަ އެވެ. އެ އެއްބަސްވުމުގައިވާގޮތުން 30 މިލިއަނަށްވުރެ އިތުރަށް މިސްކިތަށް ހަރަދުވާ ފައިސާ ހަމަޖައްސަނީ އެސްޖޭގެ ސީއެސްއާރްގެ ދަށުންނެވެ.

ހުޅުމާލޭ ދެވަނަ ފިޔަވަހީގެ ސަލާހުއްދީން ސްކޫލް ކައިރީ އިމާރާތްކުރަން ފަށާފައިވާ އެ މިސްކިތުގެ މަސައްކަތް 2023 ވަނަ އަހަރު ހުއްޓުނުގޮތަށް ކުރިއަކަށް ނުދެ އެވެ.

މިސްކިތުގެ މަސައްކަތް ހުއްޓާލުމަށްފަހު މިސްކިތު ސައިޓް އެސްޖޭ އިން ބޭނުންކުރަމުން ދަނީ ހުޅުމާލޭގައި އެ ކުންފުނިން އިމާރާތްކުރާ ލަގްޒަރީ ފްލެޓްތައް އެޅުމުގައި މަސައްކަތްކުރާ ބިދޭސީ މަސައްކަތްތެރިން ނިންދަވާ ތަނެއްގެ ގޮތުގައެވެ.

މި މިސްކިތުގެ މަސައްކަތް ކުރިއަށްނުދާތީ މީގެކުރިން ކަންބޮޑުވުންފާޅުކުރި ނޫސްވެރިޔަކަށް އެސްޖޭގެ ޑިރެކްޓަރު ޝިހާދު އިބްރާހީމް ވަނީ ފުރައްސާރަކޮށްފަ އެވެ. އަދި މިސްކިތްތަކަށް މާގިނަ ބަޔަކު ނަމާދަށް ނުދާ ކަމަށް ވެސް ޝިހާދު ބުނެފައިވެ އެވެ.

އެސްޖޭ އަކީ މަޖިލިސް އިންތިހާބުގައި ޕީއެންސީގެ ކެންޑިޑޭޓުން ހޮވަން ހަރަދުކުރި ކުންފުންޏެކެވެ. ހުޅުމާލެ މެދު ދާއިރާގެ ޕީއެންސީ މެންބަރު އަބްދުﷲ ޝަޒީމަކީ އެސްޖޭ ޝިހާދުގެ ޅިޔަނެވެ. އެހެންވެ، މިސްކިތް ނޭޅިޔަސް އެ ކުންފުންޏާ މެދު އެއްވެސް ފިޔަވަޅެއް އަޅަން ރައީސް މުހައްމަދު މުއިއްޒުގެ ސަރުކާރަކަށް ނުކެރެ އެވެ.

މިހާރު އެ ކުންފުންޏަށް އެ ވަނީ ރިސޯޓެއް ތަރައްގީކުރުމަށް ހަވާލުކޮށްފަ އެވެ. ހުޅުމާލޭ ދެވަނަ ފިޔަވަހީގައި ދުވަހެއް ދުވަހަކަށް އާބާދީ އިތުރުވަމުން އަންނައިރު މިސްކިތްތައް މަދުކަމުން ހުރި ދަރިތައް ރައްޔިތުން އަންނަނީ ސޯޝަލް މީޑިއާގައި ފާޅުކުރަމުންނެވެ. ނަމަވެސް މި ކަންބޮޑުވުންތައް އަޑުއަހާނެ އިދާރާއެއް މި ގައުމުގައިނެތެވެ. އެއަށްވުރެ އެސްޖޭ ކުންފުނިން ޕީއެންސީއަށް ލިބޭ ފައިދާ މާބޮޑެވެ.