ބޮލީވުޑްގެ މަޝްހޫރު އެކްޓަރު އާމިރު ޚާންގެ ފިލްމެއް ނުވަ އަހަރުގެ މެދުކެނޑުމަކަށްފަހު ޖަޕާނުގެ ސިނަމާތަކުގައި އަޅުވާގޮތަށް ހަމަޖެހިއްޖެ އެވެ.

އޭނާގެ ފިލްމު "ސިތާރޭ ޒަމީން ޕަރް" ޖަޕާނުގައި ރިލީޒް ކުރުމަށް ހަމަޖެހިފައިވަނީ 2027 ވަނަ އަހަރުގެ ބަހާރު މޫސުމުގަ އެވެ.

މިއީ 2018 ވަނަ އަހަރު ރިލީޒްކުރި "ޑަންގަލް" އަށްފަހު ޖަޕާނުގެ ސިނަމާއެއްގައި އާމިރުގެ ފިލްމެއް އަޅުވާ ފުރަތަމަ ފަހަރެވެ. އޭނާގެ ޕްރޮޑަކްޝަން ހައުސްއިން ތައްޔާރުކުރި "ސީކްރެޓް ސުޕަސްޓާ" 2019 ވަނަ އަހަރުގެ އޮގަސްޓް މާހު ޖަޕާނުގައި އަޅުވާފައިވީ ނަމަވެސް، އާމިރު މުހިންމު ރޯލަކުން ފެންނަ ފިލްމެއް ޖަޕާނުގެ ސިނަމާތަކަށް މިއަންނަނީ ނުވަ އަހަރު ފަހުންނެވެ.

ޖަޕާނުގައި މި ފިލްމު ޑިސްޓްރިބިއުޓްކުރާ ކުންފުނި "ގީކް ޕިކްޗާސް" އިން ހާމަ ކޮށްފައިވާ ގޮތުގައި، ޖަޕާނުގައި މި ފިލްމު އަޅުވާނީ "ސިތާރޭ: ދަ މިރެކަލް ޓީމް އޮފް ސްޓާޑަސްޓް"ގެ ނަމުގަ އެވެ.

މި ފިލްމު ޓޯކިޔޯގެ "ހިއުމަން ޓްރަސްޓް ސިނަމާ ޔޫރަކުޗޯ" އާއި "ޔެބިސޫ ގާޑަން ސިނަމާ"ގެ އިތުރުން ޖަޕާނުގެ އެކި ސިނަމާތަކުގައި ދެއްކުމަށް ވަނީ ހަމަޖެހިފަ އެވެ.

"ސިތާރޭ ޒަމީން ޕަރް"އަކީ އާމިރު 2007 ވަނަ އަހަރު ނެރުނު މަގުބޫލު ފިލްމު "ތާރޭ ޒަމީން ޕަރް"އާ ގުޅުވައިގެން ތައްޔާރު ކޮށްފައިވާ ފިލްމެކެވެ. މިއީ 2018 ވަނަ އަހަރު ނުކުތް ސްޕެނިޝް ކޮމެޑީ ފިލްމު "ޗެމްޕިއަންސް"ގެ އޮފިޝަލް ރީމޭކެކެވެ.

މި ފިލްމުގެ ވާހަކަ ބިނާވެފައިވަނީ ގުލްޝަން ނަމަކަށް ކިޔާ ކުރީގެ ބާސްކެޓްބޯޅަ ކުޅުންތެރިއެއްގެ މައްޗަށެވެ. ނުކުޅެދުންތެރިކަން ހުންނަ ބޮޑެތި މީހުން ހިމެނޭ "ސިތާރޭ" ބާސްކެޓްބޯޅަ ޓީމަށް ކޯޗުކަން ކޮށްދޭން ޖެހެ އެވެ.

ފުރަތަމަ މިއީ މަޖުބޫރީ ކަމެއްގެ ގޮތުގައި ދެކުނު ނަމަވެސް، އެ ކުޅުންތެރިންނާއެކު ވަގުތު ހޭދަ ކުރެވެމުން ދިޔަވަރަކަށް ގުލްޝަންގެ ދިރިއުޅުމުގެ ވިސްނުމަށް ބޮޑެތި ބަދަލުތަކެއް އާދެ އެވެ.

މި ފިލްމުގައި "ސިތާރޭ" ޓީމުގެ ރޯލުތައް ކުޅެފައިވަނީ އަލަށް އެކްޓިން ދާއިރާއަށް ނުކުތް، ހަގީގަތުގައިވެސް ނުކުޅެދުންތެރިކަން ހުންނަ 10 އެކްޓަރުންނެވެ. ފިލްމުގެ މުހިންމު ރޯލުތަކުން ޖެނީލިއާ ދޭޝްމުކް، ގުރުޕާލް ސިންގް، އަދި ދޮއްލީ އަހްލުވާލިއާވެސް ފެނިގެންދެ އެވެ.

"ސިތާރޭ ޒަމީން ޕަރް" އަށް ބޮކްސް އޮފީހުގައި ބޮޑު ކާމިޔާބީއެއް ލިބިފައިވެ އެވެ. މުޅި ދުނިޔެއިން މި ފިލްމަށް 267.52 ކުރޯޑު އިންޑިއަން ރުޕީސް ލިބިފައިވާއިރު، މީގެ ތެރެއިން 200.77 ކުރޯޑު ރުޕީސްއަކީ އިންޑިއާގެ މާކެޓުން ލިބުނު އާމްދަނީ އެވެ. އަދި ބޭރުގެ މާކެޓްތަކުން 66.75 ކުރޯޑު ރުޕީސް ލިބިފައިވެ އެވެ.