އޯޓިޒަމާއި އޭޑީއެޗްޑީ ތަހައްމަލު ކުރަމުންދާ އުމުރުން 19 އަހަރުގެ މުހައްމަދު ފައްޔާހް (ދޮންކަލޯ) އާއި އޭނާގެ ބައްޕަ ހަސަން ފަޔާޒު ދިރިއުޅޭނެ ރަނގަޅު ގެއެއް ބިނާކުރުމަށް، ދިވެހި ޓިކްޓޮކް ކޮމިއުނިޓީން އިސްނަގައިގެން ކުރިއަށްގެންދިޔަ ހާއްސަ ލައިވްއަކުން 1.2 މިލިއަނަށް ވުރެ ގިނަ ރުފިޔާ އެހީގެ ގޮތުގައި ހޯދައިދީފި އެވެ.

ބ. ހިތާދޫގައި ވަރަށް ދުވަސްވީ ގެއެއްގައި ދޮންކަލޯއާއި އޭނާގެ ބައްޕަ އަދި މާމަ ދިރިއުޅެމުން އަންނަ ހާލަތު ފަޔާޒު ސޯޝަލް މީޑިއާގައި ހިއްސާކުރަން ފެށުމުން، ގިނަ ބައެއްގެ ސަމާލުކަމާއި ލޯބި އެ އާއިލާއަށް ވަނީ ލިބިފަ އެވެ. ދަރިފުޅު ބެލެހެއްޓުމަށްޓަކައި ފަޔާޒު ވަނީ އަދާކުރަމުން ދިޔަ ވަޒީފާ ވެސް ދޫކޮށްލައި، މުޅި ދިރިއުޅުން ދަރިފުޅަށް ހުސްކޮށްފަ އެވެ.

މިހާރު ދިރިއުޅޭ ގޭގެ މާހައުލަކީ ޖާގަ ކުޑަ، ހޫނުގަދަ އަދި ދޮންކަލޯއަށް ހަރަކާތްތެރިވެ އުޅުމަށް ދަތި ތަނަކަށް ވުމުން، ފަޔާޒު ވަނީ ދަރިފުޅަށްޓަކައި ގެއެއް ރާނައި ހިޔާކޮށްފަ އެވެ. ނަމަވެސް ވަޒީފާ ދޫކޮށްލުމާ ގުޅިގެން މާލީ ދަތިކަން ކުރިމަތިވެ، ތަޅުންއެޅުމާއި މުށިޖެހުން ފަދަ ފިނިޝިން މަސައްކަތްތައް ނުނިމި ވަނީ މަޑުޖެހިފަ އެވެ. މި ވަގުތު އެ އާއިލާ ދިރިއުޅެމުން ދަނީ ދޮންކަލޯއަށް ލިބޭ ހާއްސަ އެލަވަންސާއި، ފަޔާޒު ކޮށްއުޅޭ ކުދިކުދި މަސައްކަތްތަކުން ލިބޭ އާމްދަނީންނެވެ.

ގެ ނިންމުމަށް އެހީތެރިވުމުގެ ގޮތުން ދިވެހި ޓިކްޓޮކްގެ މަގުބޫލު ހޮސްޓުންތަކެއް ގުޅިގެން ކުރިއަށްގެންދިޔަ މި ލައިވް ފެށިތާ 30 މިނެޓުގެ ތެރޭގައި 14،000 އަށް ވުރެ ގިނަ މީހުން ބައިވެރިވި އެވެ. އަދި ދަންވަރު 1:00 އާ ހަމައަށް ފަޔާޒުގެ އެކައުންޓުތަކަށް 1.2 މިލިއަނަށް ވުރެ ގިނަ ރުފިޔާ ވަނީ ޖަމާވެފަ އެވެ. ފައިސާގެ އިތުރުން، އެ ގެއަށް ބޭނުންވާ ފަރުނީޗަރާއި އެހެނިހެން ސާމާނު ހަދިޔާކުރާނެ ކަމަށް ވެސް ގިނަ ބަޔަކު ވަނީ ބުނެފަ އެވެ.

ލިބުނު ބޮޑު ތަރުހީބާއި އެހީތެރިކަމާ ގުޅިގެން އުފަލުން ހުރެ ފަޔާޒު ބުނީ، މިވަރުގެ ބޮޑު އެހީއެއް ލިބޭނެ ކަމަށް ދުވަހަކު ވެސް އުއްމީދު ނުކުރާ ކަމަށެވެ. އަދި ދިވެހި ރައްޔިތުން އެހީތެރިވުމުގައި ދެއްކި އެއްބައިވަންތަކަމަށްޓަކައި، ދޮންކަލޯއާއި އޭނާގެ ފަރާތުން ހުރިހާ ދިވެހިންނަށް ވަރަށް ބޮޑަށް ޝުކުރު އަދާކުރާ ކަމަށް އޭނާ ބުންޏެވެ.

މީގެ ކުރިން ވެސް ދިވެހި ޓިކްޓޮކް ކޮމިއުނިޓީން އިސްނަގައިގެން، ހާލުގައި ޖެހިފައިވާ ފަރާތްތަކަށް ބޮޑެތި މާލީ އެހީތައް ހޯދައިދިނުމުގެ ކާމިޔާބު ހަރަކާތްތަކެއް ވަނީ ހިންގާފަ އެވެ.