ރައީސް މުހައްމަދު މުއިއްޒުގެ ސަރުކާރުން ކުރިއަށްގެންދާ ރަސްމާލެ މަޝްރޫއުގެ ދަށުން ޔޫއޭއީގެ އީގަލް ހިލްސް ކުންފުންޏާ ގުޅިގެން ހިންގާ މަޝްރޫއުގެ ދިފާއުގައި ކުރީގެ ރައީސް މުހައްމަދު ނަޝީދު ވާހަކަފުޅު ދައްކަވަން ފެއްޓެވުމުން، އިދިކޮޅު އެމްޑީޕީގެ އެތެރޭގައި ބޮޑެތި ހިޔާލުތަފާތުވުންތަކެއް އުފެދި ހަމަނުޖެހުން ބޮޑުވެއްޖެ އެވެ.

މި މައްސަލައިގައި އެމްޑީޕީގެ އެތެރޭގައި ހިޔާލުތަފާތުވުން ބޮޑުވެ، އެ ޕާޓީގެ ޤައުމީ މަޖިލިސް މެންބަރުން ހިމެނޭ ވަޓްސްއެޕް ގްރޫޕުގައި ރޭގެ ވަގުތެއްގައި ވަނީ ވަރަށް ހޫނު ބަހުސްތަކެއް ހިނގާފަ އެވެ.

އެ ބަހުސްތަކުގެ ތެރޭގައި ރައީސް ނަޝީދު ވަނީ އީގަލް ހިލްސްގެ ޕްރޮޖެކްޓަށް ފާޅުގައި ތާއީދުކުރައްވާ ކަމަށް ވިދާޅުވެފަ އެވެ. އަދި އެމްޑީޕީން އިތުރަށް އެ ކުންފުންޏާ ދެކޮޅަށް އެއްވެސް ވާހަކައެއް ނުދެއްކުމަށާއި ފާޑުނުކިޔުމަށް އެމަނިކުފާނު ވަނީ އެދިވަޑައިގެންފަ އެވެ.

ވަޓްސްއެޕް ގްރޫޕަށް ފޮނުއްވި މެސެޖެއްގައި ރައީސް ނަޝީދު ވިދާޅުވީ، އީގަލް ހިލްސްއާ ދެކޮޅަށް ވާހަކަ ދެއްކުމަކީ އެމްޑީޕީއަށް ލިބޭނެ ވަރަށް ބޮޑު ގެއްލުމެއް ކަމަށެވެ. އަދި އޭގެ މައިގަނޑު ސަބަބަކީ ޔޫއޭއީ އަކީ އަބަދުވެސް އެމްޑީޕީއާ ގާތް ގުޅުމެއް އޮންނަ ޤައުމަކަށް ވުން ކަމަށް އެމަނިކުފާނު ފާހަގަކުރެއްވި އެވެ.

އެމްޑީޕީ ގައުމީ މަޖިލިސް ވަޓްސްއެޕް ގްރޫޕްގައި ނަޝީދު ދެއްކެވި ބައެއް ވާހަކަފުޅު

"އަޅުގަނޑުމެން މި ހަދާގޮތުން ޔޫއޭއީ ޕީއެންސީއަށް ދެވުނީ،" ނަޝީދު ފޮނުއްވި މެސެޖުގައި ވިދާޅުވެފައިވެ އެވެ.

މި މައްސަލައިގައި ޕާޓީގެ ތެރޭގައި ހިޔާލުތަފާތުވުން އިންތިހާއަށް ބޮޑުވެފައިވާއިރު، އެމްޑީޕީގެ ޤައުމީ މަޖިލީހުގެ ގިނަ މެންބަރުން ދަނީ ރަސްމާލެ މަޝްރޫއު މައްސަލައިގައި ގައުމީ މަޖިލީހުގެ ރަސްމީ ބައްދަލުވުމެއް ބޭއްވުމަށް ގޮވާލަމުންނެވެ. ނަމަވެސް، ރައީސް ނަޝީދު ގެންދަވަނީ ފާޅުކަން ބޮޑު ގޮތެއްގައި އެފަދަ ބައްދަލުވުމެއް ބޭއްވުމާ ދެކޮޅު ހައްދަވަމުންނެވެ.