މާލޭގައި މިރޭ ހިނގި އަލިފާނުގެ ބޮޑު ހާދިސާގައި އެކަކު ފިހިގެން މަރުވެއްޖެ އެވެ.

މިރޭ 12:30 ހާއިރު އަލިފާން ރޯވެފައި ވަނީ މާލޭގެ އިސްކަންދަރު މަގާއި ކޯރުކެނޑި މަގާ ގުޅޭ ކަންމަތީގައި ހުރި ގަރާޖެއްގަ އެވެ.

ސިފައިން ވަނީ އަލިފަނާނުގެ ހާދިސާ ހިނގި އިމާރާތުގެ މަތީ ބުރިތަކުގައި ތިބި މީހުން ނެރެފަ އެވެ. އެތަނުން ނެރުނު އެކަކު ވަރަށް ބޮޑަށް ފިހިގެން ވަނީ މަރުވެފަ އެވެ. އެނގިފައިވާގޮތުގައި އެއީ ބިދޭސީ އަންހެނެކެވެ.

އެނގިފައިވާގޮތުގައި އެ އަންހެން މީހާގެ އިތުރުން އިތުރު ދެ މީހަކު ވަނީ އައިޖީއެމްއެޗަށް ގެންގޮސްފަ އެވެ.

އެމްއެންޑީއެފްގެ އިންފޮމޭޝަން އޮފިސަރު ކެޕްޓަން ހަނާ މުހައްމަދު ވިދާޅުވީ މ. ނިރުފެހި ގޭގައި ރޯވި އަލިފާނުގެ 90 ޕަސެންޓް މިހާރު ކޮންޓްރޯލް ކުރެވިފައިވާ ކަމަށެވެ.

ހަނާ ވިދާޅުވީ އެ ހާދިސާއާ ގުޅޭ މައުލޫމާތު ދޭނީ ފަޔާ އެންޑް ރެސްކިއު ސާވިސްގެ ސިފައިން ކަމަށެވެ. އަދި އެހެނިހެން ސިފައިންގެ ލޮލަށް ފެންްނަ ކަންކަމުގެ މައްޗަށް އެމްއެންޑީއެފް އިން މައުލޫމާތު ހިއްސާ ނުކުރާނެ ކަމަށް ވެސް އޭނާ ވިދާޅުވި އެވެ.

"އެފްއާރްއެސްގެ ކޮންޓްރޯލް ރޫމުން ކޮންފާމްކޮށްދިނީމަ މީޑިއާއަށް މައުލޫމާތު ދޭނީ،" ހަނާ ވިދާޅުވި އެވެ.

އަލިފާނުގެ ހާދިސާ ހިނގަން މެދުވެރިވި ސަބަބެއް އަދި ނޭނގެ އެވެ.