ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ ރިޔާސީ ޕްރައިމަރީ ކެމްޕެއިން މިއަދު ހަވީރު ފަށައިފި އެވެ.

"އަންނި 2023" ގެ ނަމުގައި އެމަނިކުފާނުގެ ކެމްޕެއިން ފެށީ މިއަދު ހަވީރު 4:00ގައި އެމްޕީއެލް ސަރަހައްދާއި ރާޅުގަނޑު ސަރަހައްދުގައި އެވެ.

މިރޭ އެމްޑީޕީ ހަރުގެ ކުރިމަތީގައި ވެސް ފޯމް ފުރުމުގެ މަސައްކަތް ކުރިޔަށް ގެންދިޔުމަށް އެމަނިކުފާނުގެ ކެމްޕެއިން ޓީމުން ކުރާނެ އެވެ.

ނަޝީދުގެ ކެމްޕެއިންގައި އިސްކޮށް އުޅުއްވަނީ ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ އާއި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ އާއި ހުޅުދޫ ދާއިރާގެ މެންބަރު އިލްޔާސް ލަބީބެވެ.

ނަޝީދުގެ އިތުރުން ރައީސް އިބްރާހީމް މުހައްމަދު ސޯލިހު ވެސް ވަނީ ރިޔާސީ ޕްރައިމަރީގައި ވާދަކުރައްވަން ނިންމަވާފަ އެވެ. އެމަނިކުފާނު ރޭ ވަނީ އެމްޑީޕީގެ ގައުމީ މަޖިލީހުގެ މެންބަރުންނާ ރޭ ބައްދަލުކުރައްވާފަ އެވެ.

އެމްޑީޕީގެ ރިޔާސީ ޕްރައިމަރީގައި ވާދަކުރުމަށް މަދުވެގެން 500 މީހުންގެ ސޮޔާ އެކު ފޯމު ހުށަހަޅަންޖެހެ އެވެ. ރައީސް ސޯލިހާއި ނަޝީދު ވެސް ގެންދަވަނީ ސޮއި ހަމަކުރުމުގެ މަސައްކަތް ކުރިއަށްގެންދަވަމުންނެވެ.