ރިޔާސީ ޕްރައިމަރީގެ ކެމްޕެއިނަށް އެމްޑީޕީގެ ރައީސް މުހައްމަދު ނަޝީދު އުތުރުގެ އަތޮޅުތަކަށް ދަތުރުފުޅެއް ފައްޓަވައިފި އެވެ.

މިއަދުން ފެށިގެން މި މަހުގެ 31 ގެ ނިޔަލަށް ކުރައްވާ އެ ދަތުރުފުޅުގައި އެމަނިކުފާނު ވަޑައިގަންނަވަން ހަމަޖެހިފައިވަނީ ހއ. ބާރަށް، އިހަވަންދޫ، ދިއްދޫ، ކެލާ އަދި ހދ. ކުޅުދުއްފުށި، ވައިކަރަދޫ، ކުމުންދޫ އާއި މިލަންދޫ، ކޮމަންޑޫ އަށެވެ.

ނަޝީދުގެ ކެމްޕެއިން ފެށުމުގެގޮތުން ރޭ ވަނީ ސަލްޓަންޕާކްގައި ޚާއްސަ ޖަލްސާއެއް ބާއްވާފަ އެވެ.

ނަޝީދުގެ ކެމްޕެއިން ޓީމުން ބުނީ މި ދަތުރުގައި ނަޝީދު އެމްޑީޕީގެ މެމްބަރުންނާ ބައްދަލު ކުރައްވާނެ ކަމަށެވެ. އަދި ބޮޑެތި ޖަލްސާތަކެއް ބޭއްވުމުގެ ބަދަލުގައި އިސްކަންދެއްވާނީ ވަކިވަކިން މީހުންނާ ބައްދަލުކުރަން ކަމަށް ކެމްޕޭން ޓީމުން ބުންޏެވެ،

މީގެއިތުރުން ދޮރުން ދޮރަށް ހިންގަވާ، އެމްޑީޕީ މެމްބަރުންގެ ގޭގެއަށް އެމަނިކުފާނު ޒިޔާރަތް ކުރައްވާނެ އެވެ.

އެމްޑީޕީ ރިޔާސީ ޕްރައިމަރީގައި އެމަނިކުފާނާ ދެން ވާދަކުރައްވަނީ ޒަމާންވީ ގާތް އެކުވެރިޔާ ރައީސް އިބްރާހީމް މުހައްމަދު ސޯލިހެވެ.