އިންޑިއާގެ ކޮޗިންއަށް ބޭސްފަރުވާއަށް ދިޔަ ދިވެއްސަކު ގެއްލިގެން ހޯދަން ފަށައިފި އެވެ.

ގެއްލިގެން ހޯދަމުންދަނީ، ކ. ތުލުސްދޫއަށް ނިސްބަތްވާ އުމުރުން 35 އަހަރުގެ މުހައްމަދު މަހުދީއެވެ.

މަހުދީގެ އާއިލާ އިން ބުނީ އޭނާ ގެއްލުނީ މިއަދު ހެނދުނު 9:00 ހާއިރު، ޑޮކްޓަރަށް ދެއްކުމަށް އަމްރިތާ ހޮސްޕިޓަލަށް ގޮސް ހުއްޓައި ކަމަށެވެ.

މަހުދީ އަކީ ބައިޕޯލާ ޑިސްއޯޑާ ވަރަށް ބޮޑަށް ހުންނަ މީހެކެވެ. އޭނާ އިންޑިއާއަށް ދިޔައީ އެ ބައްޔަށް ފަރުވާ ހޯދުމަށެވެ.

މިއަދު ޑޮކްޓަރަށް ދެއްކިތަނުން މާބޮޑަށް ވަޔަލަންޓްވެ، ކޮންޓްރޯލް ނުވެގެން ހޮސްޕިޓަލުން ނިކުމެގެން ދިޔަގޮތަށް ގެއްލިފައިވާ ކަމަށް އާއިލާ އިން ބުންޏެވެ.

"ކޮށްކޮގެ ފަހަތުން ވެސް ދިޔައިން. އެކަމަކު ވަކި ހިސާބަކުން ލޯމަތިން ގެއްލުނީ،" އާއިލާއިން ވާހަކަދެއްކި މީހާ ކިޔައިދިނެވެ.

މަހުދީ ގެއްލުނުތާ ގަޑިއެއްހާއިރު ތެރޭ ވަނީ ކޮޗިން ފުލުހުންނަށް ރިޕޯޓްކޮށްފަ އެވެ. ސަރުކާރުގެ ކަމާބެހޭ އިދާރާތަކުން އަންނަނީ އެކަމުގައި އެ އާއިލާއަށް އެހީތެރިކަންފޯރުކޮށްދެމުންނެވެ.

އެ ބަލީގައި މަހުދީއަށް ފަރުވާ ހޯދާތާ ހަތަރު އަހަރުވެއްޖެ އެވެ. އެންމެފަހުން ބޭސްފަރުވާއަށް އޭނާ ގޮވައިގެން އިންޑިއާ އަށް ދިޔައީ އިއްޔެ އެވެ.