ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲގެ އިތުބާރު ނެތް ކަމުގެ މައްސަލަ އަނބުރާ ގެންގޮސްފި އެވެ.

އެ މައްސަލަ އަނބުރާ ގެންދިޔައީ މާދަމާ އޮންނަ މަޖިލީހުގެ ޖަލްސާއަށް އެ މައްސަލަ އެޖެންޑާކޮށްފައި ވަނިކޮށެވެ.

އެމްޑީޕީގެ ޕާލިމެންޓްރީ ގްރޫޕްގެ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވީ, އެ މައްސަލަ އަނބުރާ ގެންދަން ނިންމީ ޕާލަމެންޓްރީ ގްރޫޕްގެ އަޣުލަބިއްޔަތުން ކަމަށެވެ.

އަސްލަމް ވިދާޅުވީ އެފަދައިން ނިންމީ މަޖިލީސް ހަލަބޮލި ނުވެ ރަނގަޅަށް ކުރިއަށްގެންދެވޭނެ މަގެއް ހޯދުމުގެ ގޮތުން ކަމަށެވެ.

ނަޝީދާއި އީވާގެ އިތުބާރު ނެތް ކަމުގެ މައްސަލަ ހުށަހެޅީ ސަރުކާރާ ދެކޮޅަށް މަސައްކަތް ކުރަން ފެށުމުންނެވެ. ސަރުކާރުން ހުށަހަޅާފައިވާ މުހިންމު ބިލްތައް އެޖެންޑާ ނުކޮށް ނަޝީދު މަޖިލިސް ކުރިއަށްގެންދަވާތީ އެމްޑީޕީން މީގެކުރިން ވަނީ ކަންބޮޑުވުންފާޅުކޮށްފަ އެވެ.