އިޒްރޭލުގެ އުދުވާނާއި އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ގާޒާގެ ހާލަތު ގޯސްވަމުންދާތީ، މިހާރުން މިހާރަށް ބޭނުންވާ އެހީތައް ފޯރުކޮށްދިނުމުގައި ބައިނަލްއަގުވާމީ މުޖުތަމައު އިން މިހާރަށް ވުރެ އަވަސް މަސައްކަތްތަކެއް ކުރުމަށް ރާއްޖެ އިން މިއަދު ގޮވާލައިފި އެވެ.

ރާއްޖެއިން މިގޮތަށް ގޮވާލާފައިވަނީ އެމެރިކާގެ ނިއު ޔޯކުގައި މިހާރު ކުރިއަށްދާ އދ.ގެ އާއްމު މަޖިލީހުގެ 78 ވަނަ ސެޝަނުގެ އިގްތިސޯދީ އަދި މާލީ ކަންކަމާބެހޭ ކޮމިޓީ (ސެކަންޑް ކޮމިޓީ)ގައި އިއްވި ބަޔާނެއްގަ އެވެ

ގާޒާގެ އާންމު ރައްޔިތުންނާއި އާއްމު ބޭނުންތަކަށް ބޭނުންކުރެވޭ އުމްރާނީ ވަސީލަތްތަކަށް ހަމަލާ ދިނުން ހުއްޓާލުމަށް ރާއްޖެއިން ވަނީ ގޮވާލައިފަ އެވެ.

ފޮރިން މިނިސްޓްރީގެ ބައިލެޓްރަލް ސެކްރެޓަރީ ޑރ. ހާލާ ހަމީދު އިއްވި ބަޔާނުގައި ވަނީ ގާޒާގެ އުތުރުގައި ދިރިއުޅެމުންދާ 1.2 މިލިއަން ރައްޔިތުން 24 ގަޑިއިރުތެރޭގައި ގާޒާގެ ދެކުނަށް ދިއުމަށާއި އެންމެ ހަ ގަޑިއިރުތެރޭގައި ގެތަކުން ނުކުތުމަށް އެތައް މިލިއަން ބަޔަކަށް އިޒްރޭލުން އެންގި އެންގުމަކީ ބައިނަލްއަގުވާމީ އަދި އިންސާނީ ހައްގުތަކާ ބެހޭ ގާނޫނުތަކާ ހިލާފު ކަމެއް ކަމަށެވެ. އެހެންކަމުން އިޒްރޭލުން އެ އަމުރު އަނބުރާ ގެންދިޔުމަށް ރާއްޖެއިން ވަނީ ގޮވާލާފައިފަ އެވެ.

ގާޒާއަށް ދެމުންދާ ހަމަލާތައް މިހާރުން މިހާރަށް ހުއްޓުވުމަށް ބާރުއެޅުމަށް ރާއްޖެ އިން ވަނީ ބައިނަލްއަގުވާމީ މުޖުތަމައުއަށް ގޮވާލާފަ އެވެ.

އާންމުންނާއި ހަނގުރާމަވެރިންނާ ތަފާތުކުރުމެއްނެތި ދޭ ހަމަލާތަކަކީ "ކަލެކްޓިވް ޕަނިޝްމަންޓް"ކަން ފާހަގަކޮށް ފަލަސްތީނުގެ ރައްޔިތުންނަށް ބޭނުންވާ ބޭހާއި ކާބޯތަކެއްޗާއި ޒަރޫރީ ބޭނުންތަކަށް ބޭނުންވާ ސާމާނު މިހާރުން މިހާރަށް ފޯރުކޮށްދިނުމަށް އިންސާނިއްޔަތުކަމުގެ މަގުތަކެއް ހުޅުވުމުގެ މުހިއްމުކަން ރާއްޖެއިން އިއްވި ބަޔާނުގައި ފާހަގަކޮށްފައިވެ އެވެ.