ޕަބްލިކް ސާވިސް މީޑިއާގެ ޑިރެކްޓަރުންގެ ބޯޑުގެ މެންބަރުކަމަށާއި ޗެއާޕާސަން ކަމުގެ މަގާމަށް ޓީވީއެމްގެ ޕްރެޒެންޓަރު އާމިނަތު ނަމްޒާ އަދި ފެނަކަ ކޯޕަރޭޝަން ލިމިޓެޑްގެ ޑިރެކްޓަރުންގެ ބޯޑުގެ މެންބަރުކަމަށާއި މެނޭޖިން ޑިރެކްޓަރު ކަމުގެ މަގާމަށް މޭޖަ (ރިޓަޔާޑް) މުހައްމަދު ނަޖާހު އައްޔަންކޮށްފި އެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން މިއަދު ބުނީ ޕީއެސްއެމްގެ ބޯޑު މެންބަރުކަމަށާއި ޗެއާޕާސަން ކަމަށް މ. ހަނީކޯމްބް، އާމިނަތު ނަމްޒާ ހަމަޖައްސާފައިވާ ކަމަށެވެ. މީގެ އިތުރުން ޕީއެސްއެމްގެ ޑިރެކްޓަރުންގެ ބޯޑުގެ މެންބަރު ކަމަށާއި މެނޭޖިން ޑިރެކްޓަރުކަމުގެ މަގާމަށް ލ. އިސްދޫ، މާގަސްދޮށުގެ، އިބްރާހީމް ނަސްރީން (ނައްޓު) ވަނީ އައްޔަންކޮށްފަ އެވެ .

ޕްރެޒެންޓަރު ނަމްޒާ މި ސަރުކާރުގައި ފުރަތަމަ އައްޔަން ކުރީ ޖެންޑާ މިނިސްޓްރީގެ ޑެޕިއުޓީ މިނިސްޓަރުގެ މަގާމަށެވެ. ފަހުން ހެލްތުގެ ޑެޕިއުޓީ މިނިސްޓަރަކަށް ބަދަލުކުރުމަށްފަހު މިއަދު ވަނީ ޕީއެސްއެމްގެ ބޯޑަށް އައްޔަންކޮށްފަ އެވެ.

ފެނަކަ ކޯޕަރޭޝަން ލިމިޓެޑްގެ މެނޭޖިން ޑިރެކްޓަރުކަމުގެ މަޤާމުގައި ހުންނެވި މުއާޒު މުހައްމަދު ރަޝީދު މިއަދު އިސްތިއުފާ ދެއްވުމާއި ގުޅިގެން އެ ކުންފުނީގެ ޑިރެކްޓަރުންގެ ބޯޑުގެ މެންބަރުކަމަށާއި މެނޭޖިން ޑިރެކްޓަރު ކަމުގެ މަގާމަށް ހ. ޔެލޯރޯޒް 2، މޭޖަ (ރިޓަޔާޑް) މުޙައްމަދު ނަޖާހް މިއަދު އައްޔަންކޮށްފައިވާ ކަމަށް ޕީސީބީން ބުނެ އެވެ.

ފެނަކަގެ މެނޭޖިން ޑިރެކްޓަރު ކަމަށް ހަމަޖައްސާފައިވާ މޭޖާ (ރިޓަޔާޑް) މުހައްމަދު ނަޖާހް --- ފޮޓޯ: ދުވެލި އޮންލައިން

ސަރުކާރުގެ ކުންފުނިތަކަށް ބަދަލުތަކެއް ގެންނަން ފަށާފައި މިވަނީ ހިޔާނާތުގެ ބޮޑެތި ތުހުމަތުތައް އެ ކުންފުނިތަކަށް ކުރެވެމުންދާ ވަގުތެއްގަ އެވެ. އެގޮތުން ފެނަކައިގައި ވެސް ކޮރަޕްޝަންގެ ބޮޑެތި މައްސަލަތަކެއް ވަނީ ފެންމަތިވެފަ އެވެ.

ނަސްރީން އަކީ މި ސަރުކާރުގެ ތިން ވަނަ ޕީއެސްއެމްގެ އެމްޑީ އެވެ. އެގޮތުން އެންމެ ފުރަތަމަ އައްޔަން ކުރި ޒީނާ ޒާހިރު އާއި ފަހުން އައްޔަންކުރި މުހައްމަދު ސައީދު ވެސް ވަނީ ކުރު މުއްދަތެއްގެ ތެރޭގައި ޕީއެސްއެމްގެ އެމްޑީކަމުން އިސްތިއުފާ ދެއްވާފަ އެވެ.