ކާންޔޭ ވެސްޓްގެ ހާއްސަ ޑީޖޭއެއް ރީތިރަށް ރިސޯޓްގައި ބާއްވައިފި
ކާތިކް އޭނާގެ ކުރިއަށް އޮތް ފިލްމަށް ނެގީ ރެކޯޑް އަގެއް؟
އެސްއޯއީތަކުން ދެން ބޯނަސް ދެވޭނީ ފިނޭސްގެ ހުއްދަ ލިބިގެން
ދިވެހި ރާއްޖޭގެ އަޑަށް އިއްޔެ 62 އަހަރު ފުރުނީ އެވެ. އަޑުގެ ހުރިހާ މުއައްޒަފުންނަށް މުބާރަކްބާދީ އާއި ތަހުނިޔާ ހައްގެވެ. މިހާރުގެ ޚިދުމަތްތެރިންނާއި ކުރީގެ ޚިދުމަތްތެރިން ހިމެނޭ ގޮތުންނެވެ. ތަނަކަށް އަހަރެއް ފުރޭއިރު ދައްކަން އެންމެ ރަނގަޅު އެއް ވާހަކައަކަށް ވާނީ އެތަނެއްގެ މާޒީގެ ވާހަކަ އެވެ. ދިވެހި ރާއްޖޭގެ އަޑަކީ ދިވެހިންގެ ފަޚުރުވެރި ގައުމިއްޔަތަކާއި ސަގާފަތެއް ރަމްޒު ކޮށްދޭ ތަނަކަށް ވުމުން އެވާހަކަ ދެއްކުން އައުލާކަން ބޮޑެވެ.
"ދިވެހިރާއްޖޭގެ އަޑު"ގެ ތާރީޚާ ބެހޭ ގޮތުން ލިބެންހުރި މައުލޫމާތުތައް ނުވަތަ ލިޔެ ހާމަކޮށްފައިވާ މައުލޫމާތުތަކުގައި ފުށު އެރުންތަކެއް އެބަހުއްޓެވެ. ސަރުކާރުން ފަތުރާ ރަސްމީ މައުލޫމާތުގެ ދަށުން އެނގެން އޮތް ގޮތުގައި އަޑުގެ އުފަން ދުވަހަކީ 29 ޑިސެންބަރު 1962 އެކެވެ. ފުރަތަމަ ރޭޑިއޯ ސްޓޭޝަނުގެ ނަމަކީ މާލޭ ރޭޑިއޯ އެވެ. އެ މައުލޫމާތުން އެނގޭ ގޮތުގައި އެ ރޭޑިއޯ ސްޓޭޝަނެއް ހެދީ ހޮބީއެއްގެ ގޮތުން އެކަން ކުރުމުގެ ޝައުގުވެރިކަން ހުރި ދިވެހި ބައެކެވެ. އެކަމަށް ބޭނުންވާ ސާމާނު ވެސް އުފެއްދީ އެމީހުން އަމިއްލައަށެވެ. އެހެން ނަމަވެސް އެއީ ކޮންބައެއް ކަމެއް އެކަން ކުރީ ކިހިނެއް ކަމެއް ވެސް ބަޔާން ކޮށްފައެއް ނެތެވެ. ވޮއިސް އޮފް މޯލްޑިވްސް އާ ބެހޭގޮތުން އިނގިރޭސި ބަހުންނާއި ދިވެހި ބަހުން ލިޔެފައިވާ ވިކިޕީޑިއާގައި ވެސް ހުރީ ހަމަ އެއް ވާހަކައެކެވެ. އެއީ ކާކު ކިހިނެއް އުފެއްދި ތަނެއްކަން އެނގޭކަށް ނޯވެ އެވެ. ލިޔުނު ބަޔަކު އެވާހަކަ ވަނީ ގަސްދުގައި ދޫކޮށްލާފަ އެވެ.
ރާއްޖޭގައި އެންމެ ފުރަތަމަ ރޭޑިއޯ ސްޓޭޝަނެއް އުފެދުނު ގޮތާ ބެހޭގޮތުން އެންމެ ތަފުސީލުކޮށް ލިޔުއްވާފައިވާ އެއްބޭފުޅަކީ މަރުހޫމު ކޮލި އަލިމަނިކެވެ. އަލިމަނިކަކީ ދިވެހި ސަރުކާރުގެ ވިޔަފާރި އެޖެންޓެއްގެ ގޮތުގައްޔާއި ރާއްޖޭގެ ޝިޕިން ލައިން ހިންގުމުގެ މަސްއޫލިއްޔަތާ ހަވާލުވެ ވަޑައިގެން ކޮޅުނބުގައި ހުންނެވި ބޭފުޅެކެވެ.
އަލި މަނިކު އޭނާގެ ދުވަހު ފޮތުގައި ލިޔުއްވާފައިވާ ގޮތުގައި އެދުވަސްވަރު ބޯޓު ފަހަރުން އެއްވެސް ބާވަތެއްގެ އިލެކްޓްރޯނިކް ސާމާނެއް އުކާލަން ވެއްޖެނަމަ އެއެއްޗެއް ޖެހެނީ ރާއްޖެ ފޮނުވާށެވެ. އެއީ އޭރު ދިވެހި ސަރުކާރު ހިންގަވަމުން ގެންދެވި ބޮޑު ވަޒީރު އިބްރާހިމް ނާސިރުގެ އެންގެވުމަށެވެ. އެގޮތަށް ފޮނުވާ ސާމާނު ގެންދަނީ ބޮޑުވަޒީރުގެ ހައިސިއްޔަތުން ނާސިރު ދިރިއުޅުވާ ގެކޮޅު ކަމަށްވާ އަތިރީ މާފަންނުގެ އަށެވެ.
އަލި މަނިކު ވިދާޅުވެފައިވާ ގޮތުގައި އަތިރީ މާފަންނުގޭގެ ބިއްދޮށު ފެންޑާ ނާސިރު ބޭނުންކުރެއްވީ ވޯކްޝޮޕެއްގެ ގޮތުގަ އެވެ. ނާސިރަކީ ވަރަށް ތޫނުފިލި، އެހާމެ ޓެކްނިކަލް ވިސްނުންފުޅު ގެންގުޅުއްވި ބޭފުޅެއް ކަމަށް ވިދާޅުވަމުން އަލިމަނިކު ވިދާޅުވެފައި ވަނީ ނާސިރުގެ ވޯކްޝޮޕްގައި ކަރަންޓް ސާމާނާއި ކުޅުއްވުމުގައި ވަރަށް ގިނަ ވަގުތު ހޭދަ ކުރައްވާ ކަމަށެވެ. އެގޮތުން ބޯޓުން ދޫކޮށްލި ރިސީވަރަކާއި ޓްރާންސްމީޓަރަކަށް ބަދަލުތަކެއް ގެންނަވައިގެން ބްރޯޑްކާސްޓް ކުރެވޭ ގޮތަށް ނާސިރު ބަދަލުކުރެއްވި އެވެ.
އަލިމަނިކު ވިދާޅުވި ގޮތުގައި ނާސިރު ވިދާޅުވީ އެމަނިކުފާނު މަސައްކަތް ކުރައްވަމުން ގެންދަވަނީ އެސާމާނު ބޭނުންކޮށްގެން މިއުޒިކާއި އަޑު ދުރަށް ފޮނުވޭނެ ގޮތް ހެއްދެވުމަށެވެ. އެންމެ ފަހުން އެ ސާމާނު ބޭނުންކުރައްވައިގެން މިއުޒިކާއި ޚަބަރު ފޮނުވުމުގެ މަސައްކަތް އެމަނިކުފާނު ކާމިޔާބު ކުރެއްވި އެވެ. އެއީ ދިވެހި ރާއްޖޭގެ އަޑުގެ އުފެދުން ކަމަށް މިހާރު ފާހަގަ ކުރާ 1962 ވަނަ އަހަރެވެ.
ނާސިރު އަމިއްލަފުޅަށް ތައްޔާރު ކުރެއްވި ސިސްޓަމަކުން ކުޑަގޮތަކަށް ރޭޑިއޯގެ ޚިދުމަތް ފެށްޓެވުމަށްފަހު ދެން މަސައްކަތް ކުރެއްވީ އެސިސްޓަމުން އެއަށް ވުރެ ދުރަށް އަޑު ފޮނުވޭ ގޮތަށް އަޕްގްރޭޑް ކުރެއްވުމަށެވެ. އެ މަސައްކަތަށް އެމނިކުފާނުގެ އެހީތެރިންގެ ގޮތުގައި ގެންގުޅުއްވީ މައިޒާން އަހުމަދު މަނިކާއި ނ.ތ. ހަސަން ދީދީ އެވެ. ޓެލެކްސް އިން ގުޅުމަށް ތައްޔާރުކޮށްފައިވާ ވެސްޓްރެކްސް ޓްރާންސްމީޓަރެއް ފާޑުފާޑަށް ބަދަލުގެނަނަވައިގެން ދުރަށް އަޑު ފޮނުވާ ޓްރާންސްމީޓަރަކަށް ބަދަލު ކުރައްވައި ރޭޑިއޯގެ ޚިދުމަތް ފެށްޓެވީ އެ ދެ އެހީތެރިންނާއެކު ނާސިރު އަމިއްލަފުޅަށް ކުރެއްވި މަސައްކަތްޕުޅުންނެވެ. އެ މަސައްކަތް ފެށްޓެވުމަށްފަހު ނާސިރު އަލި މަނިކު ގާތުގައި ވިދާޅުވި ކަމަށް ވަނީ މުޅި ރާޢްޖެއަށާއި ސައުތު އިންޑިއާއަށާއި ސިލޯނަށް އަޑު ފޯރާ ފެންވަރުގެ ރޭޑިއޯ ސްޓޭޝަނެއް އުފެއްދުމަށް މަސައްކަތް ކޮށްދޭނެ ޓެކްނީޝަނެއް ހޯއްދަވައި ދެއްވުމަށެވެ. އެކަމަށްޓަކައި އަލި މަނިކު މެދުވެރިވެގެން ގެނައީ ސްރީލަންކާގެ ތަޖުރިބާކާރެކެވެ.
މަސައްކަތަށް ބޭނުންވާ ސާމާނު ގަންނާނެ މާބޮޑު ފައިސާއެއް ނެތެވެ. ދުވަސްވަރަކީ ދެވަނަ ބޮޑު ހަނގުރާމައިގައި ބޭނުންކޮށްފައި ހުރި ބައެއް ސާމާނު ބާމުދަލުގެ ގޮތުގައި ޔޫރަޕްގައި ވިއްކި ދުވަސްވަރެވެ. އެހެންކަމުން ނާސިރާއި އަލި މަނިކުގެ މަޝްވަރާގެދަށުން ލަންކާގެ ޓެކްނީޝަން އިނގިރޭސި ވިލާތަށް ފޮނުވި އެވެ. ހަނގުރާމައިގައި ބޭނުންކޮށްފައި ހުރި ބާ މުދާ ވިއްކާ މާރުކޭޓަކުން ރޭޑިއޯ ސްޓޭޝަން ހެދުމަށް ބޭނުންކުރެވިދާނެ ސާމާނު ގަތުމަށް ފަހު އެތަކެތި ރާއްޖެ ގެނަ އެވެ. އެއަށްފަހު އެއަށް ގެންނަން ބޭނުންވާ ބަދަލު ގެނެސް ރާއްޖޭގެ ރޭޑިއޯސްޓޭޝަން ގާއިމުކުރެވުނެވެ.
އަތިރީ މާފަންނުގޭގައި ހުރި ވޯކްޝޮޕްގައި ގާއިމްކުރި ސެޓަޕް ނާސިރު ހިތްޕުޅު ހަމަޖެހިވަޑައިގަންނަވާ ވަރަށް ޓެސްޓްކޮށް ނިމުމުން 12 މާޗް 1964 ގައި މާލޭ ސިނެކޯ ރޭޑިއޯގެ ނަމުގައި ބްރޯޑްކާސްޓު ކުރަން ފެށި އެވެ.
އަތިރީ މާފަންނުގޭގެ ފެންޑާއިން އޭރުގެ ބޮޑު ވަޒީރު އިބްރާހިމް ނާސިރުގެ މަސައްކަތް ޕުޅުން އުފަންވެގެން އައި ރޭޑިއޯ ސްޓޭޝަނަށް 62 އަހަރުވީއިރު އެ ސްޓޭޝަނާ ބެހޭ އެއްވެސް ލިޔުމަކުން ނާސިރުގެ ނަންފުޅެއް ފެންނާކަށް ނެތެވެ. އެވާހަކަ ވަނީ ގަސްދުގައި ދޫކޮށްލައިފަ އެވެ. ބަޔަކު އެވާހަކަ ނުލިޔެ ދޫކޮށްލި ކަމުގައި ވިޔަސް އަޑުގެ އަހަރީ ދުވަހުގެ މުނާސަބާގައި ދަންނަވާ މަރުހާބާއެއްގެ ފުރިހަމަ ހައްގުވެރިޔަކީ ކުރީގެ ރައީސް ސުމުއްވުލް އަމީރު އިބްރާހިމް ނާސިރު ރަންނަބަނޑޭރި ކިލެގެފާނެވެ.
ވަރަށް ރަގަޅު އާޓިކަލެއް ކަމަށް ބެލެވެނީ!
ރިޕްލައި