މީހުން ޖީބަށް އަތްޖަހައިގެން ހިނގަނީ ކީއްވެގެން ހެއްޔެވެ؟ އެކަމުގައި ފޮރުވިފައިވާ ހަގީގަތެއް ވޭ ހެއްޔެވެ؟ ސައިކޮލޮޖިސްޓުން ބުނާގޮތުގައި އެކަން ކުރުމުގެ ފަހަތުގައި ފޮރުވިފައިވާ ހަގީގަތްތަކެއްވެ އެވެ.
ޖީބަށް އަތްޖަހައިގެން މީހުން ހިނގާ ސަބަބުތަކުގެ ތެރެއިން އެއްސަބަބަކީ ހިތުގައިވާ ނުތަނަވަސްކަން ފިލުވާލައި ހިތްހަމަޖެހިލުމެވެ. ޚާއްސަކޮށް ނުދަންނަ މީހުން ގިނަ މާހައުލުތަކުން ލިބޭ ހިތްނުތަނަވަސްކަން ފިލުވައިލާ ހިތްހަމަޖެހިލުމަށް މީހުން ޖީބަށް އަތްޖަހައިކަން ފާހަގަވެ އެވެ.
އެގޮތަށް ޖީބަށް އަތްޖަހާލުމުން، ބޮޑު ބިރުވެރިކަމެއްގެ ތެރޭގައި ހުރެފައި އަމާން ރައްކާތެރި ތަނަކަށް ދެވުނު ފަދަ އިހްސާސްއެއް އެމީހުނަށް ކޮށްލެވެ އެވެ. އޭގެ ސަބަބުން ހަށިގަނޑަށް އަރާފައި ހުންނަ ބާރު ކުޑަކޮށްދީ ހިތްހަމަޖެހުން ގެނެސްދެ އެވެ. ވީމާ ފަޓުލޫނު ނުވަތަ ހެދުމުގައި ހުންނަ ޖީބަށް އަތްޖަހަނީ އެ މީހަކު އެވަގުތަކު ހުރި ހާލަތާއި، ވިސްނުމަށް ބިނާކޮށްފައިކަން އެނގިގެންދެ އެވެ. އަދި އެކަމުން އެމީހެއްގެ ހިތުގައި އެވަގުތަކު ހިނގާ ގިނަ އިހްސާސްތަކެއް ހާމަކޮށްދެ އެވެ.
ކަމަކާ މަޝްވަރާއެއް ހިނގާ ވަގުތެއްގައި އެހިނގާ ކަމަކާ ނުވަތަ ދެކެވުނު ވާހަކައަކާއި އެއްބަސްނުވާކަމާއި އެކަމާ ހިތްހަމަނުޖެހޭނަމަ މީހުން ޖީބަށް އަތްޖަހާކަމަށް ސައިކޮލޮޖިސްޓުން ބުނެ އެވެ. އެފަދަ ވަގުތެއްގައި ޖީބަށް އަތްޖެމުން އެ އަންގައިދެނީ އެމީހެއްގެ ފަރާތުން އެ ހިނގަމުންދާ ކަމަށް އެއްބަސްވެވެން ނެތްކަމާއި އިތުރަށް ދައްކާނެ ވާހަކައެއް ނެތްކަމެވެ. އޭގެ މިސާލަކީ ހަމަހަމަކަން ނުގެންގުޅޭ ތަފާތުކުރުން ހިމެނޭ ބައްދަލުވުމެއް ނިންމާލާފައި ބައެއް މީހުން ޖީބަށް އަތްޖަހައިގެން ހިނގުމެވެ. ޖީބަށް އަތްޖަހައިގެން ހިނގުމަކީ ނުވަތަ ހުރުމަކީ އެމީހެއްގެ ނަފްސާނީ ދުޅަހެޔޮކަން ހުރި މިންވަރުވެސް ބުނެދޭ ވެސް ކަމެކެވެ. އޭގެ އިތުރުން އެމީހުން އަމިއްލަ ނަފްސަށް ކުރާ އިތުބާރުގެ މިންވަރު ވެސް އެކަމުން ބުނެދެ އެވެ.
ޖީބަށް އަތްޖަހާ ތަފާތު ހާލަތްތައް އާދޭ
މީހާގެ ހައިބަތާއި ޝަޚްސިއްޔަތު ދެއްކުމުގައި ވެސް ޖީބަށް އަތްޖެހުން ހިމެނެ އެވެ. ކޫލްކަން ދެއްކުމަށް ވެސް ޖީބަށް އަތްޖަހަ އެވެ. އެވަގުތަކު ހިނގަމުންދާ ކަންތަކާ ބައިވެރިނުވުމުގެ ގޮތުންވެސް ޖީބަށް އަތްޖަހާކަން ވަނީ ސައިކޮލޮޖިސްޓުންނަށް ދެނެގަނެވިފަ އެވެ.
އެއްޖީބަށް އަތްޖަހައިގެން އަނެއް އަތް އެލުވައިލައިގެން ހުރުމުން އަންގައިދެނީ އެއްވުމުގައި ބައިވެރިވެފައި، އެތާ ތިބި ބައިވެރިންނާ ބައްދަލުވެ ނަމަވެސް، ކަމަކާ ގޮތެއް ނިންމަން ކުރި މަޝްވަރާގައި އެމީހަކަށް ވަކިގޮތަކަށް ނުވަތަ ވަކި ކޮޅަކަށް އެއްބަސްނުވެވިގެން އުޅޭ ކަމެވެ. މިގޮތަށް ތިބޭކަމަށް އާންމުކޮށް ފާހަގަ ކުރެވިފައި ވަނީ ވެރިންނާއި ލީޑަރުންނެވެ. އެފަދަ މީހުންނަކީ އެތަނެއްގެ ފުލްކޮންޓްރޯލު އޮތުމާއެކު ހަމަޖެހިގެން ހުންނަ މީހެކެވެ.
ޖީބަށް އަތްޖަހާފައި ބޮޑުވާ އިނގިލި ބޭރަށް ލާފައި ހުންނަ ނަމަ، އެއީ މީހުންގެ ސަމާލުކަން ހޯދުމަށް އުޅޭ މީހެއް ކަމަށާއި އަދި އެމީހަކަށް ބާރުތަކެއް ލިބިފައިވާކަން އަންގައިދެ އެވެ.
އެއްވެސް އިނގިއްޔެއް ނުފެންނަ ގޮތަށް މުޅި އަތްތިލަ ޖީބުތެރެއަށްލައި ފޮރުވާލެވިފައިވާނަމަ، އެ ހަރަކާތުން ބުނެދެނީ ލިބޭ ނުތަނަވަސްކަމަކުން ރައްކާތެރިވެގެން ހުރިކަމެވެ.
ޖީބަށް އަތްޖެހުމަކީ ސައިކޮލޮޖިސްޓުން ބުނާ ގޮތުގައި އެ ވަގުތަކު ހިނގާކަމެއްގެ ސަބުން އެމީހަކަށް ކުރެވޭ އިހުސާސްގެ މައްޗަށް ބިނާވެފައިވާ އަތުގެ ހަރަކާތެކެވެ. އެފަދަ ހަރަކާތް ދެނެގަތުމަކީ ބައެއް ހާލަތްތަކުގައި މީހުންގެ ނުތަނަވަސްކަން ފިލުވައިދިނުމަށް އެހީތެރިވެވިދެވޭނެ ކަމެކެވެ.
