ހުޅުމާލެއިން އެސްޖޭ ކޮންސްޓްރަކްޝަނަށް 15 މިލިއަން ރުފިޔާއަށް ބިމެއް ވިއްކައިފި އެވެ.

އެސްޖޭއަށް ވިއްކި ބިމުގެ މިލްކުވެރިކަން އެ ކުންފުންޏަށް ބަދުކޮށް ސިވިލް ކޯޓުން ވަނީ ހުކުމެއް ކޮށްފަ އެވެ. އެ ހުކުމްގައިވާގޮތުން އެޗްޑީސީ އިން އެސްޖޭއަށް ވިއްކާފައިވަނީ ހުޅުމާލެ ލޮޓު ނަމްބަރު 20317 ބިމެވެ. ދެވަނަ ފިޔަވަހީގެ ބީޗް ސައިޑު މި ބިމުގެ ބޮޑުމިނަކީ 2538 އަކަފޫޓެވެ. އެ ބިން ވިއްކާފައި ވަނީ 15 މިލިއަން ރުފިޔާ އެޗްޑީސީއަށް ދެއްކުމަށްފަހު އެވެ.

އެސްޖޭއަށް ބިމެއް ވިއްކަން އުޅުނު މައްސަލާގައި އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދާ މަޖިލީހުގެ މާލިއްްޔަތު ކޮމިޓީން މީގެކުރިން ސުވާލުކޮށްފައިވެ އެވެ. ބިން ވިއްކާ އަގު ސާފުކުރަން ތަކުރާރުކޮށް ސުވާލުކުރުމުން ވެސް ފަޒުލް ޖަވާބުދެއްވާފައެއްނުވެ އެވެ.

ފަޒުލް އޭރު ވިދާޅުވީ އެސްޖޭ މޯލްއާ ޖެހިގެން އޮތް ބިން އެ ކުންފުންޏަށް ވިއްކާލުމުން އެޗްޑީސީ އަށް އާމްދަނީ ހޯދެން އޮތް ބިމެއް ގެއްލޭނެ ކަމަށެވެ. އެހެންކަމުން އޭގެ ބަދަލުގައި އެޗްޑީސީ އަށް އާމްދަނީ ލިބޭނެ މަގެއް ހޯދައި، އެ ކަމަށް އެސްޖޭއިން އިވެންސްޓް ކުރަން ޖެހޭ ގޮތަށް ނިންމި ކަމަށް އޭނާ ވިދާޅުވި އެވެ.

އެގޮތުން ހުޅުމާލެ ރުއްގަނޑު ތެރޭގައި 20 މިލިއަން ރުފިޔާގެ ހަޓުތަކެއް އަޅަން އެސްޖޭއާ ހަވާލުކުރި ކަމަށާއި އެކަން އެ ކުންފުނިން ކުރަން ނިންމާފައިވަނީ މޯލްއާ ޖެހިގެން އޮންނަ ބިން ވިއްކުމުގެ މުއާމަލާތުގެ ތެރޭގައި ހިމެނޭ ސީއެސްއާރުގެ ދަށުން ކަމަށް ފަޒުލް ވިދާޅުވި އެވެ.

ބިން ވިއްކާލަން ނިންމާފައިވަނީ ކޮން އަގެއްގައިތޯ މެމްބަރު އަބްދުލް ގަފޫރު މޫސާ ސުވާލުކުރެއްވުމުން ފަޒުލް ޖަވާބެއް ނުދެއްވި އެވެ. ސީއެސްއާރުގެ ދަށުން ހަޓުތައް އަޅާ ބިން އަދި އެސްޖޭ އާ ހަވާލުނުކުރާ ކަމަށް ފަޒުލް ވިދާޅުވި އެވެ.

ފާހަގަކޮށްލެވޭ ގޮތުގައި ހުޅުމާލެގެ ޕްރައިމް ސަރަހައްދަކުން އަގު ބޮޑު އެ ބިން އެސްޖޭއަށް އެޗްޑީސީން ވިއްކިއިރު، އެ ބިން ވިއްކުމަށް އެއްވެސް އިއުލާނެއް ކޮށްފައިނުވެ އެވެ.

އެހެންކަމުން އެޗްޑީސީގެ މި މުއާމަލާތަކީ ކޮރަޕްޝަނަށް މަގުފަހިވާގޮތަށް ކޮށްފައިވާ މުވާމަލާތެއްކަމަށް ގިނަ ބަޔަކު ދަނީ ތުހުމަތު ކުރަމުންނެވެ.