އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ މައްޗަށް ކުރަނީ އެ ކުންފުނީގެ ލިޔެކިޔުންތަކެއް ނައްތާލަން މަސައްކަތް ކުރިކަމުގެ ތުހުމަތު ކަމަށް ފުލުހުން މިއަދު ބުނެފި އެވެ.

ފަޒުލް އެޗްޑީސީގެ މެނޭޖިން ޑިރެކްޓަރުކަމުން އިސްތިއުފާ ދިނީ ފޯޖު ލިޔުމެއް ތައްޔާރުކޮށް އޭނާގެ ބޭބެ މުހައްމަދު ފަޒީލް ރަޝީދަށް ގޯއްޗެއްކަނޑައި ދިން މައްސަލައާ ގުޅިގެން ސަސްޕެންޑުކޮށްފައި ހުއްޓައެވެ.

ފުލުހުންގެ މީޑިއާ އޮފިޝަލް މިއަދު ވިދާޅުވީ ތަހުުގީގުގައި ކުރެވޭ ތުހުމަތުތަކާ ގުޅިގެން ފަޒުލްއާ ސުވާލުކޮށް ބަޔާން ނަގާފައިވާ ކަމަށެވެ.

"ފަޒުލްގެ މައްޗަށް ކުރަނީ އެޗްޑީސީގެ ރަސްމީ ލިޔެކިޔުންތަކެއް ނައްތާލަން މަސައްކަތް ކުރިކަމުގެ ތުހުމަތު،" އޮފިޝަލް ވިދާޅުވި އެވެ.

އެ މައްސަލައިގެ ތަހުގީގަށް ފަޒުލްގެ ޕާސްޕޯޓް ވަނީ ހިފަހައްޓާފަ އެވެ. ފަޒުލްއާ ގުޅޭ ގިނަ އަދަދެއްގެ ކޮރަޕްޝަންގެ މައްސަލަތަކެއް ފެންމަތިވިޔަސް އެ މައްސަލަތައް ފުލުހުން ތަހުގީގެއް ނުކުރެ އެވެ. ފަޒުލްގެ ގެއިން ފުލުހުން ވަނީ މިލިއަނަކަށްވުރެ ގިނަ ރުފިޔާ ހޯދާފަ އެވެ. އެކަމަކު އެކަމާ ގުޅޭގޮތުން އެއްވެސް އެއްޗެއް ފުލުހުން ނުބުނެ އެވެ. އެކަން ވެސް ރައްޔިތުންނަށް އެނގުނީ ސޯޝަލް މީޑިއާއިންނެވެ.

ފަޒުލްގެ މައްސަލަ ތަހުގީގު ކުރާ ކަމަށް ބުނެ ފުލުހުން ކުޅެނީ "ޑްރާމާ" ކަމަށް އިދިކޮޅު ފަރާތްތަކުން އޭރުވެސް ދިޔައީ ބުނަމުންނެވެ.