ބޮޑުވެގެން ކުރާނީ ކޮން ކަމެއްތޯ ކުޑަ ކުއްޖަކާ ސުވާލު ކޮށްލައިފިނަމަ، އެ ކުދިން ދޭ ޖަވާބު ބިނާވެފައި ވަނީ އެ ވަގުތަކު ޝައުގުވެރިކަން ހުރި ކަމެއްގެ މައްޗަށެވެ. ބައެއް ފަހަރު ކުޑައިރު ކަމަކަށް ހުރި ޝައުގުވެރިކަން ހާލަތާއި، ވަގުތާއި، އުމުރަށް ބަދަލު އައުމުން ބަދަލުވެ ދެ އެވެ. ނަމަވެސް މި ހުނަރުވެރިޔާ ހުރީ އެންމެ ފުރަތަމަ ހުރި ގޮތުގައި އެ ވިސްނުމުގަ އެވެ.
ޝަމްރާ ސަލީމް (ޝަމް) އޭނާގެ ފޮތުގައި، ބޮޑުވެގެން ވާނީ ފިޓްނަސް ޓްރެއިނާއަކަށް ކަން ލިޔެލި ހަނދާން އަދި ވެސް އެބަހުއްޓެވެ. އެ ދުވަހުން ފެށިގެން ވެސް އޭނާ ކުރަން ބޭނުންވާ މަސައްކަތަށް ދެވޭނެ މަގުތަކަށް އޭނާ ފާރަވެރިވި އެވެ. ކަސްރަތު ކުލާސްތަކަށް ދެވޭވަރު ވުމުން އެކަން ކުރި އެވެ. ކުރެހުމާއި ކޭކު އެޅުމަކީ ވެސް އޭނާ ވަރަށް ފަރިތަ ދެ މަސައްކަތެކެވެ. އެހެން ނަމަވެސް އެއީ ފަހުން ހުސް ވަގުތުތަކުގައި ހޮބީއެއްގެ ގޮތުން ކުރާ ކަމަކަށް ބަދަލު ކުރި އެވެ. ފިޓްނަސް ޓްރޭނާއަކަށް ވުމަށް ނިންމި ހިސާބުންނެވެ.
"އަޅުގަނޑު ޓީބީސީ (ދަ ބޮޑީ ކްލަބް) ކިޔާ ޖިމްއަކަށް 2012 ގައި ފުރަތަމަ ގުޅުނީ އެ ވިސްނުމުގައި. އެ ތަނުގެ ސްޓެޕް ދެ ކުލާހަށް ދަން އޭރު. ދެން އެ ޖިމް އިން ދިމާވި ޓްރޭނާ ފަރީ ކައިރީ އަޅުގަނޑު ބުނިން އަޅުގަނޑު ޓްރޭނާއަކަށް ވުމަށް ޝައުގުވެރިވާ ކަމަށް،" ޝަމް އެ ދާއިރާއަށް ނުކުތް ގޮތް ކިޔައިދިނެވެ.
ޓީބީސީ ޖިމްގެ ޓްރޭނާސް ޝަމްއަށް އެ ދާއިރާއިން ކުރިއަށް ދިއުމަށް މަގު ކޮށައިދިނެވެ. އެހީތެރިކަން ދިނެވެ. ސްޓެޕް ކްލާސްތަކުގައި ސްޓޭޖްގައި ކްލާސް ނަގަން ފުރުސަތު ދިނެވެ. ޚާއްސަ ޓްރޭނިން ހެދުމަށްފަހު އޭނާ ގްރޫޕް ފިޓްނަސްގެ އިތުރު ކުލާސްތައް ނަގަން ފެށި އެވެ. އޭނާ މިހާރު ވެސް ދަނީ ރެޑިކަލް ފިޓްނަސްގެ އާ ޕްރޮގްރާމެއް ކަމަށްވާ ރެޑިކަލް ފިޓްނަސްގެ މެގާޑަންޒް އަދި އެކްސް-55 މާސްޓާ ޓްރެއިނާކަމަށް ވެސް ޓްރެއިން ވަމުންނެވެ.
"ޒުންބާއަކީ ޝަމްގެ ފޭވަރިޓް. ޒުންބާ ޓްރޭނިން އަށްފަހު ބޮޑީ ޕަމްޕް ޓްރޭނިން އާއި އަދި އިތުރު ވަރަށް ގިނަ ޓްރޭނިންސް ހެދިން،" ޝަމް އިތުރަށް ކިޔައިދިނެވެ.
ޕާސަނަލް ޓްރޭނާއަކަށް
ޝަމްގެ އަބަދުވެސް ކުރާ އުއްމީދަކީ ފިޓްނަސްގެ ރޮނގުން ދެވެން ހުރި އެންމެ މައްޗަކަށް ފޯރުމެވެ. ލިބެން ހުރި ހުރިހާ ޓްރޭނިންތަކެއް ފުރިހަމަ ކުރުމެވެ. ޒުމްބާ އަދި ބޮޑީ ޕަމްޕްއަށް ފަހު، ފަހުން ޕާސަނަލް ޓްރޭނިންގެ ރޮނގުން ޓްރެއިންވެ، އޭނާގެ ލިސްޓަށް އިތުރު ބޮޅެއް އަމުނާލި އެވެ.
އޭނާ ވަނީ މާލޭގެ ގިނަ ޖިމްތަކެއްގައި ފިޓްނަސް އިސްޓްރަކްޓަރެއްގެ ގޮތުގައި މަސައްކަތްކޮށް ގިނަ ތަޖުރިބާތަކެއް ލިބިފަ އެވެ. މިވަގުތު ވެސް ވަރަށް "ޕެޝަނޭޓްލީ" މަސައްކަތް ކުރަމުން އެ ދަނީ "ވީރު- ލޭޑީސް ފިޓްނަސް ޒޯން" ނަމަކަށް ކިއުނު ޖިމްއެއްގަ އެވެ. އެ ތަނަކީ އަންހެނުންގެ ދުޅަހެޔޮކަމަށް އަމާޒުކޮށް، މީގެ އަހަރުތަކެއް ކުރިން ހުޅުވުނު އަންހެނުންނަށް ޚާއްސަ ޖިމްއެކެވެ.
"ވީރު ޖިމް ފެށުނީއްސުރެ މި ތަނުގައި އަޅުގަނޑު މި މަސައްކަތް ކުރަނީ. މިއަދު އުފާކުރަން މިތަނުގައި މަސައްކަތް ކުރަން ލިބުނު ފުރުސަތު ގަބޫލު ކުރެވުނީތީ. ވަރަށް ހިތްހަމަޖެހޭ މިތަނުގައި މަސައްކަތް ކުރަން. ވަރަށް އެއްބާރުލުން ލިބޭ އަދި ހުނަރު ތަރައްގީކުރަން ފުރުސަތު ލިބޭ،" ޝަމް ބުންޏެވެ.
އޭނާގެ ސެޝަންތަކަކީ ބައިވެރިންގެ މެދުގައި ވަރަށް މަގުބޫލު ސެޝަންތަކެކެވެ. ގަވައިދުން ޝަމްގެ ކުލާސްތަކަށް ހާޒިރުވާ ކުދިންގެ ފަރާތުން ރަނގަޅު ބަދަލުތައް ފެންނަ ކަމަށާއި އެ ކަމަކީ އޭނާ މި މަސައްކަތުގައި އެންމެ އުފާވާ ކަންތައް ކަމަށް ބުންޏެވެ.
"އެންމެ ހިތްހަމަޖެހެނީ އަޅުގަނޑާއެކު ވާކްއައުޓް ކުރަން އެ ބައިވެރިން ޝައުގުވެރި ވާތީ. ހަމައެއާއެކު ވަރަށް ދެރަވޭ ބައިވެރިންގެ ހިތްވަރު އެލޭ ފަދަ ގޮތްތަކަށް ބައެއް ފަރާތްތަކުން ބައެއް ބަސްތައް ރައްދު ކުރާތީ. ބައެއް މީހުން ތިބޭނެ ކިތަންމެ މަސައްކަތެއް ކުރިއަސް ސަރުބީ ވިރުވަން އުނދަގޫ މީހުން. ވީމާ އެއްބާރުލުން ދިނުމާ އެކަކު އަނެކަކާ އަޅާ ނުކިއުމަކީ އަޅުގަނޑު ވަރަށް ބޮޑަށް އެދޭ އެދުމެއް،" ބައިވެރިންނާ ގާތްގުޅުމެއް ބާއްވާ ޝަމް ބުނެލި އެވެ.
ކަސްރަތު ކުރުމަކީ ދުޅަހެޔޮ ސިއްޚަތެއްގައި ހުރުމަށް ވަރަށް މުހިންމު ކަމެއްކަން ހުރިހާ އެންމެނަށް ވެސް ޝަމް ހަނދާން ކޮށްދެ އެވެ. މަސައްކަތާ ހުރެ ކަސްރަތު ކުރުމަށް ވަގުތު ނުދެވޭ މީހުންނަށް އޭނާ ދޭ ނަސޭހަތަކީ ގަވާއިދުން ކަސްރަތުކުރާ މީހުން ވަގުތު މެނޭޖް ކުރާ ގޮތް ހޯދާ ބެލުމެވެ. އަދި ކަސްރަތު ކުރުމަށް ހިތްނުޖެހޭ ނަމަ ރައްޓެއްސަކާއެކު ފެށުމަކީ އެކަމުގައި ދެމިހުރުމަށް ކުރެވިދާނެ ކަމެއް ކަމަށް އޭނާ ދެކެ އެވެ.
ޝަމްއަށް މިއަދު އޭނާ ހުރި ހިސާބަށް އާދެވުނީ އާއިލާއާއި ރައްޓެހިންގެ ފަރާތުން ލިބޭ އެހީތެރިކަމާއި އެއްބާރުލުމުގެ ސަބަބުން ކަމަށް އޭނާ ގަބޫލު ކުރެ އެވެ. ވީމާ އެ ފަރާތްތަކަށް ވަރަށް ލޯތްބާއެކު ޝުކުރު އަދާކުރެ އެވެ.
