ގިރާވަރުފަޅުގެ ލޭންޑް ޔޫސް ޕްލޭނަށް ބަދަލު ގެނެވިފައިވާތީ، ކުރީ ސަރުކާރުގެ "ބިންވެރިޔާ" ސްކީމްގެ ދަށުން ގޯތި ލިބުނު އެންމެންގެ ގޯތިތައް އަލުން ކަނޑައަޅަން، އަންނަ ހޮނިހިރު ދުވަހު ގުރުއަތު ނެގުން ބާއްވަން ނިންމައިފި އެވެ.

ހައުސިން މިނިސްޓްރީން ކުރި އިއުލާނެއްގައި ބުނީ، ގިރާވަރުފަޅުގެ ލޭންޑް ޔޫސް ޕްލޭނަށް ބަދަލު ގެނެވި, އާ ލޭންޑް ޔޫސް ޕްލޭނެއް ތައްޔާރުކުރެވިފައިވާތީ، އެ ޕްލޭނަށް ރިއާޔަތްކޮށް ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކުގެ ގޯތީގެ ސަރަހައްދަށް ބަދަލު އައިސްފައިވާ ކަމަށެވެ. އެހެންކަމުން އާ ލޮޓް ނަންބަރެއް ކަނޑައެޅިގެން ދިއުން އެކަށީގެންވާ ކަމަށް މިނިސްޓްރީން ބުންޏެވެ.

އެހެންވެ، އެ ބަދަލާ ގުޅިގެން، ގޯތި ލިބުނު އެންމެންނަށް ލިބިފައިވާ ގޯތި އަލުން ކަނޑައެޅުމަށްޓަކައި އަންނަ ހޮނިހިރު ދުވަހުގެ ހެނދުނު 9:30 އިން ފެށިގެން މާފަންނު ޒުވާނުންގެ މަރުކަޒުގައި ގުރު ނެގުން ކުރިއަށް ދާނެ ކަމަށް މިނިސްޓްރީން ބުންޏެވެ.

މިނިސްޓްރީން ބުނި ގޮތުގައި ގުރު ނެގުން ކުރިއަށް ގެންދާނީ ހާޒިރީންނާއި މިނިސްޓްރީގެ މުވައްޒަފުންގެ ކުރިމަތީގަ އެވެ.

ގުރުއަތު ނެގުން ކުރިއަށްދާއިރު، ގޯތި ލިބިފައިވާ ފަރާތްތަކަށް ހަމަޖެހިގެންދާ ޕްލޮޓް ހައުސިން މިނިސްޓްރީގެ ހިޔާވެހި ޕޯޓަލުން ވަގުތުން ފެންނާނެ ކަމަށާއި، އެ ފަރާތްތަކަށް ލިބޭ ޕްލޮޓް ނަންބަރު މެސެޖަކުން އަންގާނެ ކަމަށް މިނިސްޓްރީން ބުންޏެވެ.

މިނިސްޓްރީން ބުނީ، ގޯތި ލިބޭ ފަރާތްތަކުގެ ގުރުނަގާ ނިމުމުން، ގޯތި ހަވާލުކުރުމުގެ އެއްބަސްވުމުގައި ސޮއިކުރުމާއި ގޯތީގެ ރަޖިސްޓްރީ ހަވާލުކުރުމުގެ މަސައްކަތް ކުރިއަށްގެންދާނެ ގޮތުގެ މައުލޫމާތު ފަހުގެ ތާރީޚެއްގައި ހިއްސާކުރެވޭނެ ކަމަށެވެ.

މި އިއުލާނާއެކު މިނިސްޓްރީން ވަނީ، ގިރާވަރުފަޅުން ގޯތި ދޫކުރާނެ ގޮތުގެ ޗާޓެއް ހިއްސާކޮށްފަ އެވެ.

ގިރާވަރުފަޅުން ގޯތި ދޫކުރާ ގޮތުގެ ޗާޓު. ފޮޓޯ: ހައުސިން މިނިސްޓްރީ

އެގޮތުން 1،250 އަކަފޫޓުގެ 2،605 ޕްލޮޓާއި، 1،650 އަކަފޫޓުގެ 1،213 ޕްލޮޓާއި، 2050 އަކަފޫޓުގެ 253 ޕްލޮޓާއި، 2،450 އަކަފޫޓުގެ ޕްލޮޓެއް ދޫކުރާނެ ކަމަށް، އެ ޗާޓުގައިވެ އެވެ.

ފާހަގަކުރެވޭ ގޮތުގައި، ކުރީ ސަރުކާރުން ފެށި ބިންވެރިޔާ ސްކީމުގެ ދަށުން ގިރާވަރުފަޅުން ފުރަތަމަ ނިންމީ 2،000 ގޯއްޗެވެ.

އެކަމަކު، ގިރާވަރުފަޅުން ބިން ދޫކޮށްފައިވާ އަދަދަށް ގޯތި ނުނެގޭތީ، ބާކީ ގޯތި ގުޅިފަޅުން ދޭން ސަރުކާރުން ނިންމައި، ގޯތި

ބަދަލުކުރުމަށް އެދި ހުށަހެޅުމަށް އޭޕްރީލް ހަތެއް، 2024ގައި ހުޅުވާލި އެވެ.