އަބަދު ކައިރީގައި އުޅޭ މައިމީހާ ނުވަތަ ބަލަހައްޓާ މީހާ ކުޑަ ހިނދު ކޮޅަކަށް ލޯމަތިން ގެއްލުނަސް ކުޑަކުދިންނަށް ރޮވެ އެވެ. ދޮރު ލައްޕައިގެން ކޮޓަރިއެއްގަ ނުވަތަ ފާޚާނާގައި ހުރި ނަމަވެސް މަންމަ ކުރަނީ ކީއްތޯ ދޮރު ކައިރީގައި ހުރެގެން އެ ކުދިން އަހައި އޮޅުންފިލުވަ އެވެ. އަޅާނުލި ނަމަ ނުވަތަ ވާހަކަ ނުދައްކައިފި ނަމަ އެ ކުދިން ދެރަވެ އެވެ. މިވަނީ ކިހިނެތް ހެއްޔެވެ؟
ކުޑަދަރިފުޅު ބޮޑުވަނީ މައިމީހާގެ ފުރިހަމަ ހިމާޔަތުގެ ދަށުގަ އެވެ. ފުރިހަމަ ލޯތްބާއި ރައްކާތެރިކަން ލިބިގެންނެވެ. ފަހުގެ ހޯދުންތަކުން ދައްކާ ގޮތުގައި ކުޑަކުދިންނަށް އެ ކުދިންގެ މަންމަ ކުޑަ ހިނދުކޮޅަކަށް ގެއްލުނު ނަމަ ވެސް އެއީ ފުރާނައަށް ނުރައްކާތެރި ވަގުތެއް ކަމަށް، އެ ކުއްޖާގެ ސިކުނޑިން މެސެޖް ފޮނުވަ އެވެ.
ސައިންސުގެ ހޯދުންތަކުން ހާމަވާ ގޮތުގައި ކުޑަކުދިންގެ ސްޓްރެސް ނިޒާމަކީ ވަރަށް ލޮއީފް އެއްޗެކެވެ. މަންމަ ކުރިމަތިން ގެއްލުމާ އެކީ ސިކުޑިން "ކޯޓިސޯލް" ކިއުނު ސްޓްރެސް ހޯމޯނެއް ވަރަށް މަދު ސިކުންތެއްގެ ތެރޭގަ ވަރަށް ގިނަ އަދަދަކަށް އުފައްދަ އެވެ. އެއީ 200 ނުވަތަ 300 ޕަސެންޓެވެ.
ކޯޓިސޯލްއަކީ ހަށިގަނޑުގެ މުހިންމު މަސައްކަތަށް ބޭނުންވާ، އެއްވަރެއްގައި ހިފަހައްޓަން ޖެހޭ ހޯމޯނެކެވެ. އެހެން ނަމަވެސް މަންމަ ނުފެނިއްޖެނަމަ، ސިކުނޑިން ކުއްލިއަކަށް ކޯޓިސޯލް އުފައްދާ މިންވަރު ގިނަވުމުން އެ ކުއްޖަކަށް ހާސްކަމާއި ކަންބޮޑުވުމުން އިތުރު ކޮށްދެ އެވެ. އެ ކުދިންގެ ސްޓްރެސް ލެވެލް މައްޗައް ދެ އެވެ.
މަންމަ ހުރި ތަނެއް ނޭނގުނު ނަމަ، ކުދިންނަށް އެކަނިވެރިކަން އިހްސާސްވެ އެވެ. ކަންތައް ބޮޑު ވެ އެވެ. ބިރުވެރިކަން އިހުސާސްވެ އެވެ. އޭގެ ސަބަބުން ނުރައްކާތެރި މާހައުލެއްގައިވާ ކަމަށް އެ ކުދިންގެ ސިކުނޑި ބުނެދޭން ފަށަ އެވެ.
މި ކަމަކީ އެ ކުދިންނަށް ހިފިފައިވާ އާދައެއް ނޫނެވެ. ވަކި ގޮތަކަށް ގެންގުޅެގެން ވާ ކަމެއް ނޫނެވެ. ނުވަތަ އެ ކުދިންނަށް ކުރުމާ ނުކުރުމުގެ އިޚްތިޔާރެއް ވާ ކަމެއް ވެސް ނޫނެވެ. މަންމައާ އަވަހަށް ދިމާވެ ލިބުނު ބިރުވެރިކަމުން ސަލާމަތް ވުމަށް އެޅޭ ފިޔަވަޅެކެވެ. "ސަވައިވަލް" ސްކިލް އެކެވެ.
މާހައުލެއްގެ ރައްކާތެރިކަމާ ނުރައްކާތެރި ކަމަކީ ކުޑަކުދިން ދަންނަ އެއްޗެއް ނޫނެވެ. އޭގެ ބަދަލުގައި ކުދިން ރައްކާތެރި ކަން ދެނެގަންނަނީ އަބަދު ބަލަހައްޓާ މީހާ ކައިރީގައި ހުރުމުންނެވެ. މަންމަ ނުފެނިގެން ރޯ ކުއްޖަކީ ބަލާ މީހަކަށް އާދައިގެ ކަމެއް ކަމަށް ހީވިއަސް، ހަގީގަތުގައި އެ ކުދިންނަށް ރޮވެނީ ސިކުނޑިން މެސެޖްތަކެއް ލިބި ހަށިގަނޑު "އެލާޓަށް" ގެނައުމަށެވެ.
މަންމަ ގެއްލުމުން ކުޑަކުދިންގެ މިޒާޖަށް މިއަންނަ ބަދަލު ދެނެގަތުމަކީ ދުޅަހެޔޮ ސިއްޚަތެއްގައި ކުދިން ބޮޑުކުރުމަށް މުހިންމު ކަމެކެވެ.
