މ. ރަތްމަންދޫ މީހުން ކ. ތުލުސްދުއަށް ބަދަލުކުރަން 44 ގޯތި އެރަށު ކައުންސިލުން ހަމަޖައްސައިފި އެވެ.

ހައުސިން މިނިސްޓްރީން ރަތްމަންދޫ ކައުންސިލަށް މިދިޔަ ބުދަ ދުވަހު ފޮނުވި ސިޓީއެއްގައި ވަނީ ރަތްމަންދޫ މީހުން ތުލުސްދުއަށް ބަދަލުކުރުމުގެ މަސައްކަތް ކުރިއަށް ގެންދިއުމަށް އެ ރަށުން 44 ގޯތި ހަމަޖައްސާފައިވާ ކަން ތުލުސްދޫ ކައުންސިލުން މިނިސްޓްރީއަށް އަންގާފައިވާ ކަމަށެވެ.

އެހެންކަމުން އެ ގޯތިތަކުގައި ގެދޮރު އިމާރާތް ކުރުމަށްޓަކައި ކުރަންޖެހޭ މަސައްކަތައް ކުރަމުން އަންނަ ކަމަށް އެ މިނިސްޓްރީން ބުންޏެވެ.

ރަތްމަންދޫގެ އާބާދީގައި 200އަށް ވުރެ ގިނަ މީހުން އެބަތިއްބެވެ. އެކަމަކު އެ ރަށުގައި ދިރިއުޅެނީ 80 ވަރަކަށް މީހުންނެވެ.

ސަރުކާރުން ވަނީ ހދ. ހިރިމަރަދޫ ރައްޔިތުން އެ އަތޮޅު ހަނިމާދުއަށް ބަދަލުކުރަން ވެސް ނިންމާފަ އެވެ. ހިރިމަރަދޫގައި ހަނިމާދޫ ރައްޔިތުންނަށް ހައުސިން ޔުނިޓް އެޅުމަށް އެޗްޑީސީއާ ވަނީ ހަވާލުކޮށްފަ އެވެ.