ފާއިތުވި ދިހަވަރަކަށް އަހަރު ތެރޭގައި، ގިނަ ބަޔަކަށް އިރުޝާދު ދެމުން އައިސްފައިވަނީ ހިތުގެ ބަލިތަކުން ރައްކާތެރިވުމަށާއި ބަރުދަން ކޮންޓްރޯލް ކުރުމަށްޓަކައި، ފުލް-ފެޓް ކިރުގެ ބަދަލުގައި ފެޓް މަދު ކިރު ބޭނުންކުރުމަށެވެ. ނަމަވެސް، ޔުނިވާސިޓީ އޮފް ޓޮރޮންޓޯއިން ހެދި އާ ދިރާސާއަކުން ދައްކާގޮތުގައި، ކިރުގެ ބާވަތްތަކުގައި ހުންނަ ސަރުބީއަކީ ކުރިން ހީކުރެވުނުހާ ގެއްލުންހުރި އެއްޗެއް ނޫނެވެ.

މި ދިރާސާގައި ބައިވެރިވި ބޮޑެތި މީހުން 12 ހަފުތާ ވަންދެން ކޮންމެ ދުވަހަކު ތިން ފަހަރު ފުލް-ފެޓް ކިރުގެ ބާވަތްތައް ބޭނުންކުރުމުން، އެމީހުންގެ ހަށިގަނޑުގެ ބަރުދަނަށް، ކޮލެސްޓްރޯލް ލެވެލްއަށް ނުވަތަ އިންސިއުލިން ރެސިސްޓެންސަށް އެއްވެސް ނޭދެވޭ ބަދަލެއް އައިސްފައެއް ނުވެ އެވެ. މީގެ އިތުރުން، ބައެއް ބައިވެރިންގެ ލޭގެ ޕްރެޝަރަށް ހެޔޮ ބަދަލުތަކެއް އައިސް، ހަށިގަނޑަށް ބޭނުންވާ މުހިންމު މާއްދާތައް ކަމަށްވާ ކެލްސިއަމް، ޕްރޮޓީން އަދި ވިޓަމިން ޑީ ލިބުނު މިންވަރު އިތުރުވެފައިވާކަން ފާހަގަކުރެވުނެވެ.

'ދަ ޖާނަލް އޮފް ނިއުޓްރިޝަން' ގައި ޝާއިއުކޮށްފައިވާ މި ނަތީޖާތަކަކީ، ކިރުގެ ބާވަތްތަކުގެ ސިއްހީ ފައިދާ ނުވަތަ ގެއްލުން ބިނާވެފައިވަނީ ހަމައެކަނި އޭގައި ހިމެނޭ ސަރުބީގެ މިންވަރަށް ނޫންކަން ހާމަކޮށްދޭ އިތުރު ހެއްކެކެވެ.

ކޮންމެ ދުވަހަކު ފުލް-ފެޓް ކިރު ބޭނުންކުރުމުން ދިމާވީ ކޮންކަމެއް؟

މި ދިރާސާގައި ބަރުދަން އިތުރު ނުވަތަ މާބޮޑަށް ފަލަ 74 މީހުން ބައިވެރިކޮށް، ތިން ގްރޫޕަކަށް ބަހާލެވުނެވެ. ފުރަތަމަ ގްރޫޕަށް ދެވުނީ ކެލޮަރީ މަދު އަދި ކިރުގެ ބާވަތްތައް މަދުން ހިމެނޭ ކެއުމެކެވެ. ދެވަނަ ގްރޫޕަށް ކޮންމެ ދުވަހަކު ތިން ފަހަރު ކިރުގެ ބާވަތްތައް ހިމެނޭ، ވަކި މިންވަރަކަށް ހަކަތަ ހިފެހެއްޓިފައިވާ ކެއުމެއް ދެވުނުއިރު، ތިންވަނަ ގްރޫޕަށް ކެލޮަރީއަށް ބެލުމެއް ނެތި ދުވާލަކު ތިން ފަހަރު ކިރުގެ ބާވަތްތައް ބޭނުންކުރުމަށް ދެވުނެވެ.

12 ހަފުތާގެ މި ދިރާސާ ނިމުނުއިރު، ކޮންމެ ދުވަހަކު ތިން ފަހަރު ފުލް-ފެޓް ކިރު ބޭނުންކުރި މީހުންގެ ބަރުދަނާއި، ހަށިގަނޑާއި، އަދި ލޭގެ ކޮލެސްޓްރޯލް ލެވެލް، ކިރު މަދުން ބޭނުންކުރި މީހުންނާ އަޅާބަލާއިރު މާބޮޑު ތަފާތެއް ނެތްކަން ފާހަގަކުރެވުނެވެ.

ކިރުގެ ބާވަތްތައް ގިނައިން ބޭނުންކުރި ގްރޫޕްތަކުގެ ލޭގެ ޕްރެޝަރު ރަނގަޅުވެ، ކެލްސިއަމް، ޕްރޮޓީން އަދި ވިޓަމިން ޑީ ލިބުނު މިންވަރު އިތުރުވި އެވެ. މިއީ ކަށިތަކުގެ ދުޅަހެޔޮކަމަށާއި މަސްތަކުގެ މަސައްކަތަށް ވަރަށް ބޭނުންތެރި މާއްދާތަކެކެވެ.

މިކަމާ ގުޅޭގޮތުން އޮތް އެއް ނަޒަރިއްޔާއަކީ 'ޑެއިރީ މެޓްރިކްސް ހައިޕޮތެސިސް' އެވެ. މީގެ މާނައަކީ ކާނާގެ ބާވަތްތަކުގައި މި މާއްދާތައް އެކުލެވިފައިވާ ގޮތުން، ހަށިގަނޑުން އެ މާއްދާތައް ބޭނުންކުރާ ގޮތަށް ބަދަލު އައުމެވެ. ކިރުގައި ކޭސިން އަދި ވޭ ފަދަ ޕްރޮޓީންތަކާއި، ސަރުބީ އަދި އެހެނިހެން މާއްދާތައް އެކުލެވިގެންވަނީ ހަޖަމުކުރުމުގެ މަރުހަލާގައި އެކަތި އަނެކައްޗާ ގުޅިގެން މަސައްކަތްކުރާ ގޮތަށެވެ. އެހެންކަމުން، ހަމައެކަނި ވަކިކުރެވިފައިވާ ސަރުބީއަށްވުރެ، ކިރުގެ ބާވަތްތަކުގައި ހުންނަ ސަރުބީއަށް ހަށިގަނޑުން އިޖާބަދޭ ގޮތް ތަފާތުވެދާނެ އެވެ.

ނަމަވެސް، މި ހޯދުންތަކާ މެދު ވިސްނަންޖެހޭ ބައެއް ކަންކަން އެބަހުއްޓެވެ. މިއީ އެންމެ 12 ހަފުތާގެ ދިރާސާއަކަށް ވެފައި، ބައިވެރިވީ އެންމެ 74 މީހުން ކަމަށްވާތީ، މީގެ ދިގު މުއްދަތުގެ އަސަރުތައް ދެނެގަތުމަށް ބޮޑެތި އަދި ދިގު ދިރާސާތަކެއް ބޭނުންވެ އެވެ.

އަދި މީގެ މާނައަކީ ސަރުބީއަކީ އެއްވެސް ގެއްލުމެއް ނެތް އެއްޗެއް ކަމެއް ނުވަތަ އެންމެން ފުލް-ފެޓް ކިރަށް ބަދަލުވާންވީއެއްވެސް ނޫނެވެ. އޭގެ ބަދަލުގައި މި ދިރާސާއިން އެނގެނީ، ކިރުގެ ބާވަތްތަކާއި ސިއްހަތާ ހުރި ގުޅުމަކީ ހަމައެކަނި އޭގައި ހުންނަ ސަރުބީގެ މިންވަރަށްވުރެ މާ ފުން ގުޅުމެއް ކަމެވެ. މިވަގުތަށް ދިރާސާވެރިން އިރުޝާދު ދެނީ ތަފާތު ބާވަތްތައް ހިމެނޭ، ހުރިހާ މާއްދާއެއް ހަމަހަމަ ކެއުމެއް ބޭނުންކުރުމަށެވެ.