އީރާނާއެކު ހަނގުރާމައެއް ފެށުމަށް މަގުފަހިވާފަދަ ސިޔާސަތުތަކެއް އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާތީ، ޔޫއޭއީގެ މަހުޖަނަކު އޭނާއަށް ވަރަށް ބޮޑަށް ފާޑުވިދާޅުވެ، ބަހުގެ ހަމަލާތަކެއް އަމާޒުކުރައްވައިފި އެވެ.

2.3 ބިލިއަން ޑޮލަރުގެ މިލްކިއްޔާތެއް އޮންނަ މި މަހުޖަނު ވަނީ މެދުއިރުމަތީގެ މަސްލަހަތު ގެއްލޭގޮތަށް ޓްރަމްޕް ކުރައްވާ މަސައްކަތްތަކާ މެދު ސުވާލު އުފައްދަވާފަ އެވެ.

މިކަމާ ގުޅިގެން އޭނާ ވަނީ މި ސަރަހައްދު ހަނގުރާމައިގެ މައިދާނަކަށް ބަދަލުކުރުމުގެ ބާރު ޓްރަމްޕަށް ދިނީ ކާކުތޯ ސުވާލުކޮށްފަ އެވެ. އަދި ޓްރަމްޕްގެ އަމަލުތަކުގެ ސަބަބުން ގަލްފް ކައުންސިލްގެ ގައުމުތަކާއި އަރަބި ގައުމުތައް، އެ ގައުމުތަކުން މުއްމީދު ނުކުރާ ނުރައްކާތެރި އަނދަވަޅަކަށް ވައްޓާލާފައިވާ ކަމަށްވެސް އޭނާ ފާހަގަކުރި އެވެ.

ސަރަހައްދީ ރައްކާތެރިކަމާ ގުޅޭގޮތުން ވާހަކަ ދައްކަވަމުން އޭނާ ވިދާޅުވީ، "މާތްﷲގެ އިރާދަފުޅުން އަހަރެމެންނަކީ ވަރުގަދަ އަދި އަމިއްލަ ނަފްސު ދިފާއުކުރުމުގެ ގާބިލްކަން ހުރި ބައެއް ކަމަށެވެ. އަދި އަމިއްލަ ވަތަން ހިމާޔަތްކުރާނެ ލަޝްކަރުތަކާއި ދިފާއީ ނިޒާމުތައް އެބަހުރި ކަމަށް ވެސް އޭނާ ބުންޏެވެ.

މީގެ އިތުރުން، ޓްރަމްޕްގެ 'ބޯޑް އޮފް ޕީސް' އިސްނެގުމަށް މަލާމާތް ކުރައްވަމުން އޭނާ ފާހަގަކުރެއްވި ގޮތުގައި، އެ މަޝްރޫއަށް ބޭނުންވާ ފަންޑުގެ ބޮޑު ބައެއް ދީފައިވަނީ މެދުއިރުމަތީގެ ގައުމުތަކުންނެވެ. އޭގެ ތެރޭގައި ގަލްފްގެ ގައުމުތައް ހިމެނޭކަން އޭނާ ފާހަގަކުރެއްވި އެވެ.

މި މައުޟޫއު ނިންމަވާލައްވަމުން އޭނާ ވިދާޅުވީ، އެ ފައިސާ ދިން ގައުމުތަކަށް މިއަދު ޓްރަމްޕާއި ސުވާލުކުރުމުގެ ހައްގު އެބައޮތް ކަމަށެވެ. އަދި އެ ފައިސާއަށް ވީ ކިހިނެއްތޯ ސުވާލުކުރުމުގެ ހައްގު އެ ގައުމުތަކަށް މިއަދު އެބައޮތް ކަމަށް އޭނާ ބުންޏެވެ.