މޫނުމައްޗާއި ހަށިގަނޑުގެ އެކި ހިސާބުތަކުގައި ހަންގަނޑުގެ ކުލަ ތަފާތުވުން (ޕިގްމެންޓޭޝަން)އަކީ ގިނަ ބަޔަކު އެކަމަކަށް ފަރުވާކުރާ ކަމެއް ނަމަވެސް ވަރަށް ގިނައިން ތަކުރާރުވާ ކަމެކެވެ.

މިއީ ހަމައެކަނި އަވީގައި އުޅުމުން ދިމާވާ ކަމެއް ނޫނެވެ. ދިރިއުޅުމުގެ އާދަކާދައާއި، ބޭނުންކުރާ ސްކިންކެއާ އުފެއްދުންތަކުގެ ސަބަބުންވެސް މި މައްސަލަ އަލުން ތަކުރާރު ވެދާނެ އެވެ.

1. އަވީގެ ނުރައްކަލާއި ސަންސްކްރީން ބޭނުން ނުކުރުން

އަވީގައި ހުންނަ އުލްޓްރާވައިލެޓް ދޯދިތަކަކީ ހަމުގެ ކުލަ ގަދަކޮށްދޭ "މެލަނިން" އުފެއްދުމަށް އެންމެ ބޮޑަށް ބާރުއަޅާ ކަންތަކެވެ. ފަރުވާއަށްފަހު ހަމުގެ ކުލަ އަލިވި ނަމަވެސް، ކުޑަ ވަގުތުކޮޅަކަށް އަވީގައި އުޅުމުންވެސް ހަމުގެ ކުލަ ބަދަލުކުރާ ސެލްތައް އަލުން އެކްޓިވްވެ އެވެ. ގޭތެރޭގައި އުޅުނުކަމުގައި ވިޔަސް އަދި ވިއްސާރަ ދުވަސްތަކުގައިވެސް ސަންސްކްރީން ބޭނުން ކުރުމަކީ މުހިންމު ކަމެކެވެ.

2. ހޯމޯންތަކަށް އަންނަ ބަދަލުތައް

މެލާސްމާ ނުވަތަ މޫނުގައި ނަގާ ކަޅު ލައްތަކަކީ ހޯމޯންތަކާ ވަރަށް ބޮޑަށް ގުޅިފައިވާ ކަމެކެވެ. މާބަނޑު ދުވަސްވަރާއި ދޭތެރެ ދުރުކުރާ ގުޅަ ބޭސް ބޭނުން ކުރުމާއި ނުވަތަ ތައިރޮއިޑް އަދި ޕީސީއޯއެސް ފަދަ ހޯމޯނަލް މައްސަލަތަކުގެ ސަބަބުން މެލަނިން އުފައްދާ މިންވަރު އިތުރުވެ އެވެ. އެހެންކަމުން، ހޯމޯނަލް މައްސަލައަށް ހައްލެއް ނުލިބެނީސް ހަމައެކަނި ހަމަށް ދޭ ފަރުވާއަކުން މިކަން މުޅިން ރަނގަޅެއް ނުކުރެވޭނެ އެވެ.

3. ހޫނުގަދަ މާހައުލުގައި އުޅުން

ގިނަ މީހުންނަށް ހީވެފައި އޮންނަނީ ޕިގްމެންޓޭޝަން އިތުރުވަނީ ހަމައެކަނި އަވީގެ ސަބަބުން ކަމަށެވެ. ނަމަވެސް ހޫނުގެ ސަބަބުންވެސް މެލަނިން އުފައްދާ ސެލްތައް ހަރަކާތްތެރިވެ އެވެ. ކައްކާއިރު އުނދުނުގެ ހޫނު މޫނަށް ހުށައެޅުން، ސައުނާ ނުވަތަ ހޫނު ފެނުން ގިނައިން ފެންވަރުމަކީވެސް ލައްތައް އަލުން އެނބުރި އައުމަށް މެދުވެރިވާ ސަބަބުތަކެކެވެ.

4. ނުބައި ސްކިންކެއާ އުފެއްދުންތައް ބޭނުން ކުރުން

ހަމާ ނުގުޅޭ ނުވަތަ ވަރުގަދަ ކެމިކަލްތައް ހުންނަ އުފެއްދުންތައް ބޭނުން ކުރުމުން ހަމުގެ ރައްކާތެރިކަން ހަލާކުވެ، ހަންގަނޑު ހިރުވައި ދިލަނަގާ ގޮތްވެ އެވެ. ހަންގަނޑު އިންފްލޭމް ވުމުން އުފެދޭ "ޕޯސްޓް-އިންފްލެމޭޓަރީ ހައިޕަޕިގްމެންޓޭޝަން"ގެ ސަބަބުން، ކުރިއަށްވުރެ ބޮޑަށް މޫނުގައި ލައްތައް އުފެދެން ފަށަ އެވެ.

5. ފަރުވާ ފުރިހަމަ ނުކޮށް ހުއްޓާލުން

ޕިގްމެންޓޭޝަން ހުންނަނީ ހަމައެކަނި ހަމުގެ މަތީ ފަށަލައަކު ނޫނެވެ. ބައެއް ފަހަރު ހަމުގެ އަޑީގެ ފަށަލަތަކަށްވެސް މި ލައްތައް ފޯރާފައި ހުރެ އެވެ. ފަރުވާ ކުރަން ފެށުމުން މަތީ ފަށަލަ އަލިވި ނަމަވެސް، އަޑީގެ ފަށަލައިގައި ހުންނަ ލައްތައް މުޅިން ނައްތާ ނުލެވި ފަރުވާ ހުއްޓާލައިފިނަމަ، ދުވަސްކޮޅެއްގެ ތެރޭގައި އެ ލައްތައް އަލުން މަތީ ފަށަލައަށް ފާޅުވާން ފަށާނެ އެވެ.